الماتىدا دەمالىس كۇندەرى ساۋدا ورتالىقتارى نەگە جۇمىس ىستەمەيدى

الماتى. قازاقپارات - الماتى اكىمى باقىتجان ساعىنتايەۆ الماتى تەلەارناسىنداعى تىكەلەي ەفيردە قالادا ساۋدا جانە ويىن- ساۋىق ورتالىقتارى دەمالىس كۇندەرى نەگە اشىلماي تۇرعانىن ءتۇسىندىردى، دەپ حابارلايدى قازاقپارات ءتىلشىسى.

«مەن بيزنەسمەندەردىڭ الاڭداۋشىلىعىن ءتۇسىنىپ وتىرمىن. الايدا توتەنشە جاعداي بولعان كەزدى ەسكە تۇسىرسەك، ءبىز كارانتيننەن كەيىن اشتىق، ءبىراق 1 ايدان سوڭ بارلىعى قايتا جابىلدى. ارينە، ولار شىعىنعا باتقان سوڭ تەزىرەك اشىلعىسى كەلەدى. الايدا، قازىر اشىپ الىپ، قايتا جابىلساق، ونىڭ قاجەتى قانشا؟ حالىق تاعى جۇمىسىنان ايرىلادى. تابىستان قاعىلادى. ازىرشە جاعداي تۇراقتالعانشا كۇتە تۇرامىز. قازىر ساۋدا ورىندارى اپتاسىنا 5 كۇن جۇمىس ىستەپ تۇر. ولاردىڭ تەزىرەك اشىلعانىنا ءبىز دە مۇددەلىمىز»، - دەدى اكىم.

ونىڭ ايتۋىنشا، ساۋدا جانە ويىن- ساۋىق ورتالىقتارى كەلۋشىلەردىڭ سانيتارلىق قاۋىپسىزدىگىن ساقتاۋ شارالارىن تۇگەل قامتاماسىز ەتىپ وتىر.

«بەلگىلى ءبىر تەتىكتەرمەن قاۋىپ سەيىلگەنىنە كوز جەتكىزسەك، اكىمدىك، البەتتە وسى قادامعا بارادى. مەملەكەتتىك كوميسسياعا ۇنىسىس بەرەمىز. وسى جانە كەلەسى جۇما باقىلاپ كورەمىز. الايدا دەمالىس كۇندەرى ادام كوپ شوعىرلاناتىنىن ەستەن شىعارمايىق»، - دەدى اكىم.

ايتا كەتۋ كەرەك، الماتى قالالىق باس سانيتار دارىگەردىڭ قاۋلىسىنا سايكەس، قالادا دەمالىس كۇندەرى ساۋدا، ويىن- ساۋىق ورتالىقتارى، دەمالىس ورىندارى جابىق تۇرادى. الماتى اكىمى كارانتين ۋاقىتىندا وسىمەن 7- رەت تىكەلەي ەفيردە حالىقتىڭ ساۋالىنا جاۋاپ بەرىپ وتىر.