قىتايدىڭ رۋيلي قالاسىندا كوروناۆيرۋسقا جاپپاي تەكسەرۋ ءجۇرىپ جاتىر
بىرەر كۇن بۇرىن شاھاردا ميانمادان كەلگەن ەكى ازاماتتان ۆيرۋس انىقتالدى. ولارمەن بايلانىستا بولعان 200 دەن استام تۇرعىن باقىلاۋعا الىندى. ناۋقاستار تۇرعان اۋدان كارانتينگە جابىلىپ، قالا حالقىنا ءبىر اپتاعا دەيىن ۇيدەن شىقپاۋعا ەسكەرتۋ بەرىلدى. گونكونگتە حالىقتى كوروناۆيرۋسقا قارسى جاپپاي تەستىلەۋ اياقتالعانىنا كوپ ۋاقىت وتپەگەن ەدى. قىتايدىڭ يۋننان پروۆينتسياسىنداعى جۋيلي قالاسىندا جاڭا دەرەك تىركەلىپ، تاعى جاپپاي تەكسەرۋ باستالدى. 2 شەتەلدىك ازاماتتان ۆيرۋس انىقتالا سالىسىمەن جەرگىلىكتى بيلىك ىندەتتىڭ كەڭىنەن تارالۋىن تەجەۋ ءۇشىن وسىنداي شەشىم قابىلداعان. تەست جۇرگىزۋ بارىسىندا تۇرعىندارعا ۇيدەن شىقپاۋ بۇيىرىلعان. قالادا تەك ءدارىحانا، ازىق- تۇلىك دۇكەندەرى مەن بازارلارى عانا جۇمىس ىستەپ جاتىر. شاھاردان شىعۋعا تىيىم سالىنعان.
گۋڭ يۋجۋن، رۋيلي قالاسى پارتيا كوميتەتىنىڭ حاتشىسى:
- قازىر 2 ناۋقاسپەن بايلانىستا بولعان 201 ادام باقىلاۋعا الىنعان. ولاردىڭ 190 ى تەكسەرىستەن ءوتىپ، ساراپتاماسى زەرتتەلىپ جاتىر. بۇدان بولەك 2 شەتەلدىك ناۋقاس تۇرعان اۋدانداعى 1745 تۇرعىن دا تەست تاپسىردى. ازىرگە ولاردىڭ ەشبىرىنەن ۆيرۋس انىقتالعان جوق. قىتايدا ەلگە كەلگەن شەتەلدىك ازاماتتار اراسىنان دەرتكە شالدىققاندار كۇن سايىن تىركەلۋدە. ولاردىڭ اراسىندا اۋرۋ نىشاندارى جوق ناۋقاستار دا بار. ولار تەك ەكى اپتالىق كارانتيندە تەست تاپسىرۋ كەزىندە انىقتالۋدا. وقشاۋلانعان ازاماتتار 2 رەت تاپسىرۋى مىندەتتى.
قىتايدا كوروناۆيرۋسقا قارسى ۆاكتسينا جاساۋ ءىسى دە قىزۋ ءجۇرىپ جاتىر. بۇگىندە 5 ۆاكتسينا كلينيكالىق سىناقتىڭ ءۇشىنشى كەزەڭىنە وتكەن.
ۋ گۋيجىن، قىتاي جۇقپالى اۋرۋلاردى باقىلاۋ جانە الدىن الۋ ورتالىعىنىڭ باس ساراپشىسى:
- ۆاكتسينانى دايىنداۋدا اكىمشىلىك پروتسەدۋراعا كەتەتىن ۋاقىتتى ازايتۋعا قول جەتكىزدىك. ءبىراق بۇل عىلىمي زەرتتەۋلەر مەن ونىڭ مەرزىمىنە ەش اسەر ەتكەن جوق. كوروناۆيرۋستىڭ شىققانىنا كوپ ۋاقىت بولماعاندىقتان ەكپەنى دايىنداۋعا دا كوپ ۋاقىت كەتكەن جوق. ءبىراق بۇرىنعى زەرتتەۋلەر تاجىريبەسى مەن ناتيجەسىنە سۇيەنە وتىرىپ، قازىرگى ۆاكتسينانىڭ تيىمدىلىگى 1 جىلدان 3 جىلعا دەيىن جالعاسادى دەپ ويلايمىز. جەرگىلىكتى ماماندار جىل سوڭىنا دەيىن كەم دەگەندە 2 ۆاكتسينا دايىن بولادى دەگەن پىكىردە. مەملەكەت ازىرگە ىندەتتىڭ كەلەسى تولقىنىنا دايىندالىپ جاتىر. زەرتحانالاردى كەڭەيتىپ، اۋرۋحانالاردا توسەك ورىندارىن كوبەيتىپ، تەستىلەۋ ارتتىرىلىپ جاتىر. قازىردىڭ وزىندە قىتايدا تەست جۇرگىزەتىن 5 مىڭعا جۋىق مەديتسينالىق مەكەمە بار.