تۇماۋعا قارسى ۆاكسينالاۋ كوروناۆيرۋسقا قاتىستى جاعدايدى جەڭىلدەتەدى - جازيرا ەمبەرديەۆا

نۇر- سۇلتان. قازاقپارات - تۇماۋعا قارسى ۆاكسينالاۋ كوروناۆيرۋس ينفەكسياسىنا قاتىستى احۋالدى جەڭىلدەتەدى. ۇلتتىق دەنساۋلىق ساقتاۋ ورتالىعىنىڭ قوعامدىق دەنساۋلىقتى نىعايتۋ ورتالىعىنىڭ جەتەكشىسى جازيرا ەمبەرديەۆا وسىلاي ءمالىم ەتتى، دەپ حابارلايدى قازاقپارات ءتىلشىسى.

«كۇزگى ءارى قىسقى مەرزىمدە ءبىزدىڭ كليماتتىق اۋماقتا ۇنەمى ج ر ۆ ي مەن تۇماۋعا شالدىعۋ دەڭگەيى جوعارىلايدى. جىل سايىن قازاقستاندا 500 مىڭنان 1 ميلليونعا دەيىن ج ر ۆ ي جاعدايى تىركەلەدى، ونىڭ ىشىندە ج ر ۆ ي- مەن اۋىرعانداردىڭ باسىم بولىگىن 14 جاسقا دەيىنگى بالالار قۇرايدى. قازىرگى ەپيدەميالىق ماۋسىم COVID-19 بويىنشا ەپيدەميولوگيالىق احۋالعا بايلانىستى الاڭداتىپ وتىر. بۇل تۇرعىدا تۇماۋعا قارسى ەكپە سالدىرۋعا كەڭەس بەرەمىز. كوروناۆيرۋس ينفەكسياسى ىندەتىنە بايلانىستى بيىل ەكپە سالۋ ناۋقانى ەكى اپتا بۇرىن باستالدى، ياعني 2020 -جىلعى 15 - قاڭتاردان ىسكە اسىرىلدى. ول ءۇشىن وڭىرلەردە 5 مىڭنان استام پۋنكت ۇيىمداستىرىلدى. ج ر ۆ ي مەن تۇماۋدىڭ ەپيدەميالىق ماۋسىمى قازان ايىنان باستاپ مامىر ايىنا دەيىن جالعاسادى»، - دەيدى ج. ەمبەردييەۆا.

ونىڭ ايتۋىنشا، الداعى ەپيدەميولوگيالىق كەزەڭدەگى قازاقستانداعى تۇماۋ ءۇش شتاممەن بەلگىلەنىپ وتىر. بۇل رەتتە A (H1N1) ، A (H3N2) ، سونداي- اق B شتامى قامتىلعان. دۇنيەجۇزىلىك دەنساۋلىق ساقتاۋ ۇيىمىنىڭ نۇسقاۋى بويىنشا بۇلار ۇشۆالەنتتى ۆاكسينا قۇرامىنا ەنگىزىلدى. مۇنىمەن قوسا ول تۇماۋعا قارسى ۆاكسينالاۋدان بولەك ج ر ۆ ي مەن تۇماۋدىڭ الدىن الۋعا ارنالعان ءتيىستى شارالار بار ەكەنىن ەسكە سالدى.

بۇل تۇرعىدا ادامدار كوپ جينالاتىن جەرلەردە كوپ جۇرمەۋ، جابىق عيماراتتار مەن قوعامدىق ورىنداردا ماسكا تاعۋ، رەسپيراتورلىق ءتارتىپتى ساقتاۋ، اۋرۋ بەلگىلەرى بار ادامدارمەن قارىم- قاتىناستى شەكتەۋ، قولدى ءجيى جۋىپ وتىرۋ، عيمارات ءىشىن ءجيى جەلدەتۋ سەكىلدى قاراپايىم شارالاردى ورىنداۋ كەرەك.

«ءار ادام ءتيىستى نۇسقاۋلاردى ورىنداي وتىرىپ، يممۋنيتەتىن كوتەرە الادى. وسى ورايدا س دارۋمەنى بار ونىمدەردى كوبىرەك الۋ كەرەك، ياعني مۇكجيدەك، يتمۇرىن، قاراقات، ليمون جانە باسقا دا جەمىستەر بار. دارىگەردىڭ كەلىسىمى بويىنشا يممۋنيتەت كوتەرەتىن پرەپاراتتاردى قابىلداۋ كەرەك، دارۋمەندەرمەن. سونىمەن قاتار سالاۋاتتى ءومىر سالتىن ۇستانىپ، دەنە شىنىقتىرۋمەن، تازا اۋادا جۇگىرۋمەن شۇعىلدانعان ءجون. كۇندەلىكتى اقۋىزى بار تاعامدارعا، كوكونىستەر مەن جەمىس- جيدەككە ەرەكشە ءمان بەرۋ كەرەك. قانت كولەمى جوعارى گازدالعان سۋسىنداردان تارتىنۋ قاجەت»، - دەدى مامان.

ورتالىق جەتەكشىسىنىڭ سوزىنە قاراعاندا، تۇماۋعا قارسى ۆاكسينالاۋ كوروناۆيرۋس ينفەكسياسى جەڭىل فورمادا وتۋىنە، ياعني اۋرۋدى اسقىندىرماۋعا ىقپال ەتەدى.

«تۇماۋعا قارسى ماۋسىمدىق ۆاكسينا 50 جىلدان استام ۋاقىت پايدالانىلىپ كەلەدى. ەكپەنى ميلليونداعان ادام الادى، ونىڭ قاۋىپسىز ەكەنى ۋاقىتپەن تەكسەرىلگەن. جىل سايىن دارىلىك زاتتاردى رەتتەۋ بويىنشا مەملەكەتتىك ءارى ۇلتتىق ورگاندار جاڭا ۆاكسينانى تىڭعىلىقتى زەرتتەيدى. تەك وسىدان كەيىن ليتسەنزيا بەرىلەدى. سونىمەن قاتار، بارلىق ەلدەردە تۇماۋعا قارسى يممۋنداۋدان كەيىن كەرى اسەر بولعان جاعدايلاردى باقىلاۋ مەن زەرتتەۋ جۇيەلەرى قىزمەت ەتەدى»، - دەدى ج. ەمبەردييەۆا.

COVID-19-عا قارسى ۆاكسينالاۋعا توقتالعان ول، اتالعان ۆاكسينا ازىرگە دايىن ەمەستىگىن، سونداي- اق الەمنىڭ ءبىرقاتار ەلىندە عىلىمي زەرتتەۋلەر ءجۇرىپ جاتقانىن ەسكە سالدى. «ەكىنشىدەن، تاجىريبە كورسەتكەندەي، كوروناۆيرۋس ينفەكسياسىنىڭ الدىن الۋدىڭ ۇتىمدى شاراسى رەتىندە الەۋمەتتىك اراقاشىقتىقتى ساقتاۋ، قوعامدىق ورىنداردا ماسكا تاعۋ، قولدى ءجيى جۋىپ وتىرۋ ماڭىزدى. سونىمەن قاتار، COVID-19 ىندەتى 80 پايىز جاعدايدا سيمپتومسىز فورمادا ءوتۋى مۇمكىن ەكەنىن بىلەمىز»، - دەدى جازيرا ەمبەرديەۆا.

اۆتور: رۋسلان عابباسوۆ