+7 (701) 759 90 19
10 °С : نۇر-سۇلتان
23 °С : الماتى
USD 412.55 EUR 468.66
RUB 5.79 CNY 58.80
جاڭالىقتار

كوروناۆيرۋسپەن كۇرەستە مەملەكەت پەن حالىقتىڭ جاۋاپكەرشىلىگى قاجەت -  باقىت كوشەروۆا

16 قىركۇيەك 14:31
:ءبولىسۋ
كوروناۆيرۋسپەن كۇرەستە مەملەكەت پەن حالىقتىڭ جاۋاپكەرشىلىگى قاجەت -  باقىت كوشەروۆا

نۇر-سۇلتان. قازاقپارات - COVID-19-بەن كۇرەستە مەملەكەت پەن حالىقتىڭ ىنتىماقتى جاۋاپكەرشىلىگى قاجەت.

مۇنداي پىكىردى قاراعاندى مەديتسينا ينستيتۋتىنىڭ كلينيكالىق جۇمىستار جونىندەگى پرورەكتورى، مەديتسينا عىلىمدارىنىڭ دوكتورى، پروفەسسور باقىت كوشەروۆا ءبىلدىردى، دەپ حابارلايدى قازاقپارات ءتىلشىسى.

ونىڭ اتاپ وتۋىنشە، وپتيميستىك سەناريگە سايكەس، ەمحانالار، ستاتسيونارلار، فەلدشەرلىك- اكۋشەرلىك جانە مەديتسينالىق پۋنكتتەر ءىس جۇزىندە كوروناۆيرۋس ىندەتىنىڭ جاڭا تولقىنىنا دايىن دەسەك تە بولادى. ولار قاجەتتى قۇرال- جابدىقتارمەن جابدىقتالعان جانە بۇل باعىتتاعى جۇمىستار ءالى دە جالعاسىپ جاتىر. توسەك- ورىن قورى دا كەڭەيتىلۋ ۇستىندە. كوروناۆيرۋس ىندەتىنىڭ العاشقى تولقىنى كەزىندە دارىگەرلەر ۇلكەن تاجىريبە جيناقتادى.

دەگەنمەن، مەديتسينا ۋنيۆەرسيتەتتەرى مەن ۇلتتىق ورتالىقتاردىڭ پروفەسسور- وقىتۋشى قۇرامى قازىرگى ۋاقىتتا ولارعا دياگنوستيكالاۋ، سارالانعان دياگنوز قويۋ، Covid-19-دى دياگنوستيكالاۋ مەن ەمدەۋدىڭ كلينيكالىق حاتتاماسى نەگىزىندە پاتسيەنتتەردى قاراۋ بويىنشا وقىتىپ تا جاتىر. بۇل رەتتە ورتا مەديتسينا قىزمەتكەرلەرىن پاتسيەنتتەرگە ساپالى كۇتىم جاساۋدى ۇيرەتۋ وتە ماڭىزدى بولىپ وتىر.

«كۇز- قىس كەزەڭى تۇماۋ مەن ءجىتى رەسپيراتورلىق ۆيرۋستى ينفەكسيالاردىڭ ماۋسىمدىق ورشۋىمەن تۇسپا-تۇس كەلەدى. مۇنداي ىندەت جاعدايىندا مەديتسينا قىزمەتكەرلەرىن جۇمىسقا دايىنداۋ وتە قاجەت. ءدارى- دارمەكپەن قامتاماسىز ەتۋگە قاتىستى ايتار بولساق، مەديتسينا ۇيىمدارىنىڭ وتىنىمدەرى دايىندالىپ، ساتىپ الۋلار جۇرگىزىلىپ جاتىر. بۇل نەگىزگى باسىمدىق سانالادى. جالپى ەلىمىزدىڭ دەنساۋلىق ساقتاۋ جۇيەسى ىندەتتىڭ جاڭا تولقىنىنا دايىندىق ۇستىندە. بۇعان قوسا، جۇيە قانشالىقتى دايىندىق جۇرگىزسە دە كوپ جايت حالىقتىڭ وزىنە تىكەلەي بايلانىستى. وپتيميستىك جانە پەسسيميستىك بولجامدار بار. وپتيميستىك سەناري مەملەكەت پەن حالىقتىڭ ىنتىماقتى جاۋاپكەرشىلىگى كەزىندە جۇزەگە اسىرىلادى. دەنساۋلىق ساقتاۋ جۇيەسى دايىن. حالىق تا الدىن الۋ شارالارىن ساقتاپ وتىر. پەسسيميستىك سەناريدە دەنساۋلىق ساقتاۋ جۇيەسى دايىن بولعانىمەن تۇرعىندار تارتىپكە باعىنبايدى، الدىن الۋ شارالارىن ساقتامايدى. مۇنداي كەزدە اۋرۋ جۇقتىرۋشىلار سانى ارتادى. ءتىپتى وتە جاقسى دايىندىققا كەلتىرىلگەن دەنساۋلىق ساقتاۋ جۇيەسى دە وكىنىشكە قاراي مۇنداي كەزدە اۋرۋعا قارسى تۇرا المايدى»، - دەدى پروفەسسور.

ۋنيۆەرسيتەت پرورەكتورىنىڭ اتاپ وتىنشە، حالىق ماسكانى دۇرىس تاعىپ، قولىن ۇنەمى سابىنداپ جۋۋى جانە زالاسىزداندىرۋ سۇيىقتىعىمەن تازالاپ وتىرۋى قاجەت. سونىمەن قاتار الەۋمەتتىك ارا قاشىقتىقتى ساقتاپ، ادامدار كوپ جينالاتىن جەرلەرگە بارماۋى كەرەك. بۇل ءار ادامعا ءوزىنىڭ دەنساۋلىعىن قورعاۋعا مۇمكىندىك بەرەدى. مۇنان بولەك، الداعى كۇز- قىس كەزەڭىندە يممۋنيتەت مىقتى بولۋى ءۇشىن بايلانىستاردى دا بارىنشا شەكتەگەن ءجون.

«بۇل تەك قانا Covid-19-دىڭ عانا ەمەس تۇماۋ مەن ج ر ۆ ي سياقتى وزگە دە جۇقپالى اۋرۋلاردىڭ الدىن الۋعا سەپتىگىن تيگىزەدى. ادام اعزاسى بوگدە جۇقپالاردى جۇقتىرماۋى جانە يممۋندىق جۇيەسىنە قوسىمشا جۇكتەمە تۇسىرمەۋى ءتيىس. ۇيقىنى قاندىرۋ، دۇرىس تاماقتانىپ، تازا اۋادا سەرۋەندەۋ، سالاماتتى ءومىر سالتىن ۇستانۋ دا ماڭىزدى. سۋىق تيۋ بەلگىلەرى بايقالعان جاعدايدا اعزاعا كومەكتەسىپ، جىلى سۋدى از- ازداپ ىشكەن ءجون. دەنە قىزۋى كوتەرىلىپ، اۋرۋ بەلگىلەرى اسقىنا باستاسا مەديتسينالىق كومەككە جۇگىنۋ قاجەت. سونىمەن قاتار تۇماۋدىڭ الدىن الۋ ماقساتىندا ۆاكتسيناتسيا جاساۋعا كەڭەس بەرەر ەدىم»، - دەدى باقىت كوشەروۆا.

اۆتور: مارلان جيەمباي


:ءبولىسۋ
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
بەيسەن سۇلتان
بەيسەن سۇلتان
954-049
رەداكتور
كۇنسۇلتان وتارباي
كۇنسۇلتان وتارباي
954-049

مۇراعات