پاندەميا: الەۋمەتتىك وسال توپتاعى جاستار ب ۇ ۇ دامۋ باعدارلاماسى ارقىلى تاعىلىمدامادان ءوتتى
كارانتين كەزىندە جۇمىسىنان ايىرىلعان جاستار كاسىبي بىلىكتىلىكتەرىن ارتتىرۋ ترەنينگتەرى مەن مەنتورلىق قولداۋدى قامتيتىن ءۇش ايلىق تاعىلىمدامادان ءوتتى، دەپ حابارلايدى قازاقپارات.
«قاتىسۋشىلار نۇر-سۇلتان، الماتى قالالارى جانە قاراعاندى وبلىسىنداعى كاسىپورىندار، ۇكىمەتتىك ەمەس ۇيىمدار جانە مەملەكەتتىك ورگاندارعا جىبەرىلدى. جاستار جاڭا كاسىپ يگەرۋ، تاجىريبە جيناقتاۋ مۇمكىندىگىنە يە بولىپ، وعان قوسا اي سايىن 60000 تەڭگە كولەمىندە شاكىرتاقى الىپ وتىردى. ءۇش اي ارالىعىندا جۇمىس بەرۋشىلەر ولاردى بايقاپ كورىپ، ۇزدىكتەرىنە تاعىلىمدامادان سوڭ ەڭبەك كەلىسىمشارتتارىن ۇسىندى»، دەلىنگەن باسپا ءسوز بايانىندا.
ايتا كەتەرلىگى، تاعىلىمدامادان وتۋشىلەردىڭ باسىم بولىگى (84 ادام) - ايەلدەر ەكەن. قازاقستاندا اتاۋلى الەۋمەتتىك كومەك الۋشىلاردىڭ %90 استامى دا ايەلدەر ەكەنى ءمالىم.
«قازاقستاندا، بۇكىل الەمدە سياقتى، COVID-19 پاندەمياسىنىڭ ەلەۋلى الەۋمەتتىك-ەكونوميكالىق زارداپتارى بايقالادى، بۇل اسىرەسە الەۋمەتتىك از قورعالعان حالىققا اۋىر اسەر ەتۋدە. ب ۇ ۇ د ب باستاماسى ەكونوميكالىق بەلسەندىلىكتىڭ باسەڭدەۋى جانە جالپى ەڭبەك نارىعىنداعى بەلگىسىزدىك جاعدايىندا الەۋمەتتىك وسال توپتاعى جاستاردىڭ ەكونوميكالىق مۇمكىندىكتەرىن كەڭەيتۋ مەن كاسىبي بىلىكتىلىكتەرىن دامىتۋعا ۇلەس قوسۋعا باعىتتالعان»، - دەپ اتاپ ءوتتى قازاقستانداعى ب ۇ ۇ د ب تۇراقتى وكىلى ياكۋپ بەريش.
جوباعا الەۋمەتتىك وسال توپقا كىرەتىن جاستارىمەن جۇمىس ىستەۋگە ارنايى وقىتىلعان 25 تالىمگەر جۇمىلدىرىلدى.
تالىمگەرلەر قاتىسۋشىلارمەن تۇراقتى تۇردە توپتىق جانە جەكە كەزدەسۋلەر، ماقسات قويۋ، ءوزىن-ءوزى ۇيىمداستىرۋ، كوماندادا جۇمىس ىستەۋ جانە تايم-مەنەدجمەنت نەگىزدەرى بويىنشا ترەنينگتەر وتكىزدى.
كوروناۆيرۋس ينفەكتسياسىنىڭ تارالۋىنا بايلانىستى ۆيرۋسقا قارسى شارالاردى ساقتاۋ جانە قاشىقتان ءتيىمدى جۇمىس ىستەۋ تاقىرىپتارى دا وزەكتى بولدى.
بۇل باستاما - ب ۇ ۇ دامۋ باعدارلاماسىنىڭ جاستاردى جۇمىسپەن قامتۋ بويىنشا قازاقستانداعى كەڭ كولەمدى ستراتەگياسىنىڭ ءبىر بولىگى، قايتا دايارلاۋ جانە كاسىبي بىلىكتىلىكتىلىكتى ارتتىرۋ، سونىمەن قاتار ەڭبەككە قاجەت كاسىپكەرلىك ماشىقتى، سەنىمدىلىك پەن ورنىقتىلىقتى نىعايتۋ ارقىلى جۇمىسقا ورنالاستىرۋدا قولداۋ كورسەتۋگە باعىتتالعان.