استانادا تۇرعىن ءۇي سەرتيفيكاتىن الاتىنداردىڭ ءتىزىمى ارتتى

نۇر-سۇلتان. قازاقپارات - ەلوردادا تۇرعىن ءۇ̆ سەرتيفيكاتىن الاتىن ازاماتتاردىڭ سانى ارتتىرىلادى.

بۇل تۋرالى قالا اكىمى التاي كولگىنوۆ ءمالىم ەتتى، دەپ حابارلايدى قازاقپارات ءتىلشىسى.

نۇر-سۇلتان باسشىسى اتاپ وتكەندەي، بۇرىن تىزىمدە تولىق ەمەس، كوپبالالى، مۇگەدەك بالا باعىپ وتىرعان وتباسىلار عانا بولسا، قازىر وعان حالىقتىڭ الەۋمەتتىك از قامتىلعان ساناتتارىنىڭ بارلىعى قوسىلىپ وتىر. ونىڭ ىشىندە جەتىم بالالار دا بار.

«ازاماتتاردى قابىلداۋ كەزىندە ءجيى كوتەرىلەتىن ماسەلەنىڭ ءبىرى - باسپانا. پاتەر الۋ جولدارىن قاراستىرۋدى وتىنگەن اسىراۋشىسى جوق بالالارمەن بىرنەشە رەت كەزدەستىم. ساناتتى كەڭەيتۋ قۇجاتىنىڭ جوسپارىن ءماسليحاتتىڭ الداعى سەسسياسىنا قاراۋعا بەرەمىز. قۇقىقتىق-نورماتيۆتىك پروتسەدۋرالار اياقتالعان سوڭ، سەرتيفيكات الۋشىلار ساناتىنىڭ جاڭا ءتىزىمىن بەكىتەمىز. تۇرعىن ءۇي سەرتفيكاتىنىڭ كولەمى - 1 ميلليون تەڭگە. ولاردى «شاڭىراق» (5-10-20) جوباسىنا قولدانۋعا دا بولادى. وسىلايشا، ەرتەرەكتە بەكىتىلگەن تىزىمگە ەندى: جەتىم بالالار؛ I جانە II توپ مۇگەدەكتەرى؛ زەينەتكەرلەر؛ ۇ و س ارداگەرلەرى جانە سولارعا تەڭەستىرىلگەندەر؛ مەملەكەتتىك، قوعامدىق نەمەسە اسكەري تاپسىرما ورىنداۋ كەزىندە قازا بولعانداردىڭ وتباسىلارى قوسىلادى. سونىمەن بىرگە ەكولوگيالىق اپات كەزىندە، تابيعي نەمەسە تەحنوگەندىك ت ج كەزىندە باسپاناسىنان ايىرىلعاندار؛ بوتەن ەلدەردىڭ اۋماعىندا ۇرىسقا قاتىسقاندار؛ «التىن القا»، «كۇمىس القا» يەگەرى نەمەسە ەرتەدە «باتىر انا» اتاعىن العان كوپبالالى انالار؛ I جانە II دارەجەلى «انا داڭقى» وردەنىمەن ماراپاتتالعاندار؛ كوپبالالى وتباسىلار جانە ت. ب. كىرەدى»، - دەپ جازدى ا. كولگىنوۆ Instagram-دا.

ءمالىم ەتىلگەندەي، مەملەكەت باسشىسىنىڭ تاپسىرماسىمەن بيىل قولجەتىمدى باسپانا قۇرىلىسى ءۇش ەسەگە ۇلعايتىلعان. بۇعان قوسا، قازاقستان يپوتەكالىق كومپانياسىمەن بىرلەسىپ، الەۋمەتتىك پاتەر الاتىنداردىڭ ساناتى دا كەڭەيتىلگەن. بيىل 1 مىڭ پاتەردى دارىگەرلەر مەن مۇعالىمدەردەن باسقا - الەۋمەتتىك قىزمەتكەرلەر، پوليتسيا، مادەنيەت جانە سپورت قايراتكەرلەرى دە الا الادى.