اباي مەرەيتويى: ەل وڭىرلەرى سەمەي قالاسىن اباتتاندىرىپ جاتىر

سەمەي. قازاقپارات - سەمەي قالاسىندا ابايدىڭ 175 جىلدىعىنا وراي شىمكەنت پەن جامبىل وبلىسىنىڭ، اتىراۋ، اقتوبە جانە پاۆلودار قالاسىنان كەلگەن ماماندار كوپقاباتتى ۇيلەردىڭ اۋلالارىن اباتتاندىرۋدا، دەپ حابارلايدى قازاقپارات ءتىلشىسى.

قالالىق اقپارات ورتالىعىنىڭ مالىمەتىنشە، بۇگىنگى تاڭدا اباتتاندىرۋ جۇمىستارى اياقتالۋعا جاقىن.

جوبا بويىنشا اۋلالاردا ۆوركاۋت، فۋتبول الاڭدارى جاسالىپ، جەرگىلىكتى تۇرعىندارعا دەمالىس ورىندارى سالىنعان. سونداي-اق اۋلالارعا اسفالت توسەلىپ، جارىقتاندىرۋ جۇمىستارى دا قولعا الىنۋدا.

«جامبىل وبلىسى ۇلى اقىننىڭ مەرەيتويىنا وراي دوكۋچايەۆ جانە زاسيادكو كوشەلەرىنىڭ اۋلالارىن اباتتاندىرۋمەن اينالىسىپ جاتىر. بالالار جانە سپورت الاڭدارى بوي كوتەرىپ، اسفالت جامىلعىسى جاڭارتىلدى. بۇدان بولەك، جارىق باعانالارى ورناتىلىپ، فۋتبول الاڭى جابدىقتالدى. ەندى تەك فۋتبول الاڭىن قورشاپ، اسفالتتاۋدى اياقتاۋ عانا قالدى»، - دەيدى ۋچاسكە باستىعى باۋىرجان سۇلەيمەنوۆ.

بۇل اۋلالارداعى جۇمىستار ەكى اي بۇرىن باستالعان بولاتىن. جوبا بويىنشا اباتتاندىرۋعا 3 جارىم اي مەرزىم بەرىلگەن. الايدا بۇگىندە جۇمىستاردىڭ 80 پايىزى اياقتالدى. سوندىقتان وسى ايدىڭ اياعىنا دەيىن اۋلالار تولىقتاي اباتتاندىرىلماق.