+7 (701) 759 90 19
8 °С : نۇر-سۇلتان
24 °С : الماتى
USD 412.55 EUR 468.66
RUB 5.79 CNY 58.80
جاڭالىقتار

ادامزاتتىڭ مارسقا قونىس اۋدارۋى مۇمكىن بە؟

15 قىركۇيەك 21:57
:ءبولىسۋ
ادامزاتتىڭ مارسقا قونىس اۋدارۋى مۇمكىن بە؟

نۇر-سۇلتان. قازاقپارات - عالامدىق عىلىمي ورتا مەن الەمدىك ماسس-مەديادا تالقىلانىپ جاتقان قازىرگى ءىرى تاقىرىپ - يلان ماسكتىڭ مارستى جاۋلاپ الۋ وپەراتسياسى.

بۇعان بىرەۋ سەنسە، ەندى ءبىرى سىنمەن قارايدى. قالاي دەسەك تە، ادامزاتتىڭ مارسقا ۇشۋى مەن وندا تىرشىلىك ورتاسىن قۇرۋى، تىم بولماعاندا، سوعان ۇمتىلۋى - عىلىم ءۇشىن زور جەتىستىك پەن جەمىس ەكەنى تۇسىنىكتى.

ءبىراق سوندا دا مارستى جاۋلاۋعا كەتكەن شىعىن مەن رەسۋرستى جەردى يگەرۋ مەن كليماتتىق ماسەلەلەرىن رەتتەۋگە نەگە جۇمساماسقا دەگەن وي كەلەدى. جالپى، قىزىل جۇلدىز پلانەتاسىنا كوشۋ مەن قونىس اۋدارۋ قانشالىقتى راس ءارى اقىلعا قونىمدى؟

ماسكتىڭ يدەياسى

مارس - شولپانعا قاراعاندا تىرشىلىككە ءبىرشاما قولايلى، تابيعي سيپاتى، كولەمى، جەرگە ۇقساس ەڭ جاقىن عالامشار. قىزىل عالامشارعا ۇشۋ باسقا عارىش وبەكتىلەرىنە قاراعاندا از ەنەرگيا كەتەدى. بۇل عالامشاردا مينەرال زاتتار بار، سوندىقتان مىس، تەمىر، ۆولفرام، ۋران، رەني، التىن سىندى كەندى مەتالداردىڭ دا مول قورى بولۋى مۇمكىن. مۇنىڭ ءبارى ادامزاتتىڭ كولونيزاتسيا جاساۋىن جەڭىلدەتپەك.

«NASA» باستاعان عىلىمي قاۋىمنىڭ مارستى زەرتتەۋگە كوشۋدەگى سەبەبى وسى. ءارى ولاردىڭ قازىرگى نەگىزگى ماقساتى - مارستا تۇراقتى عىلىمي بازا قۇرىپ، ونى زەرتتەۋ.

الايدا كورشى پلانەتاعا ۇشىپ بارۋ وڭاي ەمەس، جۇك پەن ادام تاسىمالداۋ وتە قيىن. شىعىنى كوپ. ماسەلەن، «NASA» 2017-جىلى مارسقا جىبەرىلگەن 900 كەلىلىك مارسوحودتى ۇشىرۋ ءۇشىن 2,5 ميلليارد دوللار قارجى كەتكەن. ءبىر عانا اپپاراتتى ازىرلەۋ ءۇشىن كەتكەن قىرۋار قارجىمەن مارستا جاقىندا عىلىمي بازا قۇرۋ مۇمكىن ەمەس.

يلون ماسكتىڭ زىمىران قۇراستىرۋعا كىرىسكەنى سوندىقتان. ونىمەن ەكيپاج، تەحنيكا مەن قۇرال-جابدىقتار تاسىمالدانادى. ونىڭ ۇستىنە، بارىنشا جىلدام ۇشقانى ءجون ءارى جەرگە قايتىپ ورالسا ءتىپتى جاقسى.

يلون ماسك قىزىل جۇلدىز بەن جەر شارىن بايلانىستىراتىن ترانسپورت جۇيەسىن قۇرۋ يدەياسىن 2016-جىلى ۇسىندى. قۇراستىرىپ جاتقان زىمىراننىڭ اتى - Starship. بيىكتىگى - 118 مەتر، ديامەترى - 9 مەتر، سالماعى - 5 مىڭ توننا. زىمىران ەكى بولىكتەن تۇرادى: عارىش كەمەسى مەن زىمىران قوزعالتقىشى ورنالاسقان ايماق (Super Heavy). 43 زىمىران قوزعالتقىشى ورناتىلماق.

قۇراستىرۋشىلاردىڭ ەسەبىنشە، زىمىران وربيتاعا دەيىن 100 توننا جۇك كوتەرىپ شىعارادى.

ال زىمىران تەحاستاعى عارىش ايلاعىنان ۇشپاق. ويتكەنى بۇل ەكۆاتورعا بارىنشا جاقىن ايلاق. ءارى عارىش بەلدەۋىنە شىعۋ وڭايىراق: ءوز بىلىگىنەن اينالعان جەر زىمىراننىڭ عارىشقا ۇشىپ شىعۋىن جەڭىلدەتەدى، وتىن دا از كەتەدى.

ماسكتىڭ جوسپارىنشا، Starship 2022-جىلى وربيتاعا ۇشىپ شىقپاق. جەر شارىن ءبىر اينالىپ شىعىپ (جانارمايدى تاۋىسۋ ءۇشىن، ال زىمىرانعا جاعارماي تولتىرۋ ءۇشىن عارىش تانكەرى جىبەرىلەدى)، ارى قاراي مارسقا اتتانادى.

2022-جىلدىڭ جازى - مارستىڭ جەرگە جاقىن كەلەتىن ۋاقىتى. ال مارسقا دەيىنگى ساپار 1 جىلعا دەيىن سوزىلۋى مۇمكىن. دەمەك، ماسكتىڭ ەسەبىنشە، عارىش كەمەسى مارسقا 2023-جىلى بارىپ قونباق. ال 2025-جىلدان باستاپ ەكيپاج جىبەرىلمەك. 2028-جىلى بازا سالىنىپ بىتەدى.

مارستاعى بازانىڭ ۇلگىسى قازىر گوبي مەن اريزونا شولىندە، گاۆايداعى جانارتاۋ ەتەگىندە سالىنىپ جاتىر.

ال مارسقا كولونيزاتسيا جاساۋدىڭ سوڭعى كەزەڭى - بۇل ادامداردى قونىستاندىرۋعا ارنالعان كولونيا مەن وسىمدىك وسىرەتىن جىلىجايدىڭ، جانارماي وندىرەتىن بەكەتتىڭ سالىنۋى.

يلوننىڭ ەسەبىنشە، وسى عاسىردىڭ اياعىنا دەيىن مارسقا 1 ميلليون ادام جىبەرىلمەك.

مارسقا قونۋدىڭ قيىندىعى

يلون ماسكتىڭ يدەياسى مەن جوسپارى ءبىر قاراعاندا تۇسىنىكتى، قاراپايىم ادام ءۇشىن ىسكە اساتىن دۇنيە سياقتى كورىنۋى مۇمكىن. ءبىراق ءبارى وڭاي ەمەس. جەرمەن كىندىكتەس ادامزاتتىڭ جات عالامعا كوشىپ بارىپ، تىرشىلىك ورناتۋى ەكوجۇيەگە دە، ادام اعزاسىنا دا وتە قاۋىپتى.

ەڭ ءبىرىنشى قاۋىپ - عارىش رادياتسياسى. جەردىڭ ەرەكشەلىگى دە سول - اتموسفەراسىن قورشاپ جاتقان الىپ وزون قاباتى بار. ول عارىشتان كەلەتىن رادياتسيا مەن كۇن ساۋلەسىن كەرى شاعىلىستىرىپ، جەردى كۇيىپ كەتۋدەن ساقتايدى. مارستا اۋا جوق، ال عارىش رادياتسياسى ءجۇز ەسە قۋاتتى. مۇنى توقتاتا الاتىن عىلىمدا ەش تەحنولوگيا جوق.

مارستى تىرشىلىك ورتاسىنا اينالدىرۋدىڭ ءبىر جولى - تەررافورمالاۋ. ياعني، قىزىل عالامشاردىڭ كليماتىن وزگەرتىپ، اتموسفەرا مەن قالىپتى تەمپەراتۋرا، ەكولوگيالىق جاعداي قۇرۋ. ءبىراق بۇل عىلىم ءۇشىن فانتازيامەن بىردەي.

ەكىنشى قاۋىپ - ادام اعزاسى مەن ەكوجۇيە. مارستا تىرشىلىك بار ما جوق پا - ول جاعى بەلگىسىز. ءبىراق بار دەگەننىڭ وزىندە، ونىڭ جەر ەكوجۇيەسىنەن بولەك ورتا ەكەنى انىق. مارستا قىسىم تومەن: جەردەگى قىسىمنان 170 ەسە از. ياعني، 35 شاقىرىم بيىكتىكتەگى تومەن قىسىممەن بىردەي. ال ءوزىڭىز ەلەستەتىپ كورىڭىز: جەر بەتىندەگى ەڭ بيىك تاۋ ەۆەرەستتىڭ بيىكتىگى 9 شاقىرىمعا جەتەر-جەتپەس.

كورشى عالامشاردا وتتەگى جوق، كومىرقىشقىل گازدىڭ مولشەرى - 96 پايىز. ال اتموسفەرا قۇرۋ ءۇشىن عالامشاردى قىزدىرۋ قاجەت.

ادامزات مارستى يگەرە الا ما؟

ۇلكەن سۇراق، ءىرى ماسەلە. «جويقىن جارىلىس» تەورياسىنىڭ يەسى ستيۆەن حوكينگ جەر بەتىندەگى رەسۋرس پەن تابيعي بايلىق 2100-جىل تاۋسىلادى، حالىققا جەر جەتپەيدى دەپ بولجاعان. سودان ادامزاتتىڭ باسقا عالامشارعا كوشۋىنەن باسقا امالى قالمايدى دەگەن ەدى. يلون ماسكتىڭ مارسقا اتتانۋعا كىرىسكەنى دە سودان بولسا كەرەك .

ءبىراق جاراتىلىستانۋ مەن استرونوميامەن اينالىسقان عالىمدار مارسقا كوشۋ جاقىن ارادا بولاتىن ءىس ەمەس دەپ توقتام ايتۋدا. ماسەلەن، كۇن جۇيەسىنىڭ 9-عالامشارىن ىزدەپ، زەرتتەۋ جاساپ جۇرگەن امەريكا استروفيزيگى كونستانتين باتىگيننىڭ ايتۋىنشا، ادامزات قازىرگى عىلىممەن، تەحنولوگيامەن مارستى يگەرە الماسى انىق.

«مارستى مۇلدەم يگەرە المايمىز دەۋدەن اۋلاقپىز. ءبىراق قازىر ول مۇمكىن ەمەس نارسە. ودان دا وعان كەتكەن شىعىندى قازىر ءبىز جەردى ساقتاپ قالۋعا، ونىڭ كليماتىن جاقسارتۋعا جۇمساۋىمىز كەرەك. مارستى قانشا بەيىمدەسەك تە، ادامزاتقا جەردەي بولمايدى. ال مارستى يگەرۋ 10 مىڭ جىلدىق عىلىمي پروگرەستى قاجەت ەتەدى»، - دەيدى باتىگين.

سول سىندى «ۆەنەرا» جوباسىنىڭ اۆتورى، فۋتۋرولوگ جاك فرەسكونىڭ ايتۋىنشا، مارستى كولونيزاتسيالاۋعا كەتكەن شىعىندى سۋى جوق ايماقتارعا اۋىز سۋ تارتۋ ارقىلى الدەقايدا پايدالى ءىس جاساۋعا بولادى.

ال امەريكا عالىمى، استرونوم كارل ساگان مارسقا قونعان ادام جەرگە قايتىپ كەلۋى وتە قاۋىپتى دەيدى.

«ويتكەنى گالاكتيكادا بيولوگيالىق تىرشىلىكتىڭ قانداي دا ءبىر فورماسى مەن ءتۇرى بولاتىنى ءسوزسىز. ءبىراق مارستا قانداي ءتىرى اعزا بارىن ءبىز بىلمەيمىز. بىلگەننىڭ وزىندە، ونىڭ جەرگە تيگىزەر قاۋپى مول ەكەنى تۇسىنىكتى. جەردەگى بيوجۇيەنىڭ تاس-تالقانىن شىعارۋى مۇمكىن. سوندىقتان مارسقا قونعان ادامنىڭ قايتا ورالۋى قاۋىپتى»، - دەيدى عالىم.

جەر عالامشارىنىڭ بار رەسۋرسى مەن بايلىعىن، ەكوجۇيەسى مەن اتموسفەراسىن ساقتاپ قالا الماعان ادامنىڭ مارستى يگەرىپ، ونى ساقتاپ قالۋى ەكىتالاي. ال جەر جويىلسا، مارستىڭ قاۋىپسىز مەكەن بولۋى سەنىمسىز دۇنيە. ادامدى مارسقا كوشىرگەنشە، جەر بەتىندە الىپ بۋنكەر سالىپ امان الىپ قالۋ الدەقايدا ءتيىمدى، شىعىنى از.

جەردە اپوكاليپسيس بولدى دەگەننىڭ وزىندە، ادامزات ءۇشىن ەڭ قولايلى مەكەن جەردىڭ ءوزى بولىپ قالماق. ءبىر سوزبەن ايتقاندا، جەر-انانىڭ ادام ءۇشىن ورنى بولەك، تۋعان كىندىگى. ادام ودان اجىراپ كەتە المايدى. ال يلون ماسك باستاعان كوماندانىڭ مارستى زەرتتەۋى مەن ونىڭ ناتيجەسى - اتالمىش ويدىڭ دۇرىس ەكەنىن تاعى ءبىر دالەلدەيدى.

massaget.kz


:ءبولىسۋ
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
بەيسەن سۇلتان
بەيسەن سۇلتان
954-049
رەداكتور
كۇنسۇلتان وتارباي
كۇنسۇلتان وتارباي
954-049

مۇراعات