يزرايلدە ءال-فارابيدىڭ ەسىمى ماڭگى ەستە ساقتالدى
ءىس-شارا يزرايلدەگى ق ر ەلشىلىگىنىڭ قولداۋىمەن ۇيىمداستىرىلدى. سالتاناتتى راسىمگە يزرايلدەگى ق ر ەلشىسى ساتىبالدى بۇرشاقوۆ، قازاقستاننىڭ يزرايلدەگى قۇرمەتتى كونسۋلى دەۆيد ليۋكسەمبۋرگ، حايفا قالاسى اكىمىنىڭ ورىنباسارى لازار كاپلان، يزرايلدىڭ ديپلوماتيالىق كورپۋسى مەن عىلىمي توپتارىنىڭ وكىلدەرى قاتىستى.
ايتا كەتۋ كەرەك، ونلاين رەجيمدەگى ءىس-شاراعا الەمنىڭ ءتۇرلى ەلدەرىنىڭ اكادەميالىق قوعامداستىق وكىلدەرى، سونىڭ ىشىندە قازاقستاندىق جەتەكشى جوعارى وقۋ ورنى - ءال-فارابي اتىنداعى قاز ۇ ۋ رەكتورى، اكادەميك عالىم مۇتانوۆ قاتىستى.
سالتاناتتى راسىمدە قازاقستاننىڭ يزرايلدەگى توتەنشە جانە وكىلەتتى ەلشىسى ساتىبالدى بۇرشاقوۆ ءسوز سويلەپ، قازاقستاننىڭ ءال-فارابي مۇراسىن ساقتاۋ مەن ىلگەرىلەتۋدەگى ماڭىزدى ءرولىن اتاپ ءوتتى.
بۇعان حالىقارالىق عىلىمي ىنتىماقتاستىقتى دامىتا وتىرىپ، اكادەميالىق قوعامداستىق ۇلكەن ۇلەس قوسۋدا.
«ءبىزدىڭ كورنەكتى جەرلەسىمىز ادامداردى باقىتقا جەتۋ جولىندا ءبىر-بىرىنە كومەكتەسۋگە، ءارى قايىرىمدىلىققا شاقىردى. يزرايلدىڭ ءىرى قالالارىنىڭ بىرىندەگى ءال-فارابي اتىنداعى كوشە ونىڭ ۇلى شىعارماشىلىق مۇراسىنىڭ مويىندالۋىنىڭ جانە ءبىزدىڭ ەلدەرىمىز اراسىنداعى دوستىق قاتىناستاردىڭ جوعارى دەڭگەيىنىڭ دالەلى»، - دەدى قازاقستان ەلشىسى.
ءوز سوزىندە قازۇۋ رەكتورى اكادەميك عالىم مۇتانوۆ ءىس-شارانى ۇيىمداستىرۋشىلارعا جىلى لەبىزىن ءبىلدىرىپ، ءال-فارابيدىڭ 1150 جىلدىعى يۋنەسكو قولداۋىمەن الەمدىك دەڭگەيدە اتالىپ جاتقاندىعىن تىلگە تيەك ەتتى.
«الەمدەگى ەڭ ادەمى تاريحي قالالاردىڭ ءبىرى، ءيزرايلدىڭ باستى تەڭىز قاقپاسى حايفا قالاسىندا ءال-فارابي كوشەسى بار ەكەندىگىن ماقتاپ تۇتامىز. وركەنيەتتىڭ ۇلى ويشىلىنىڭ ەسىمىن يزرايلدە ماڭگى قالدىرۋ ءال-فارابيدىڭ تەك ءبىر حالىقتىڭ عانا ەمەس، بۇكىل ادامزاتتىڭ مادەني جانە رۋحاني يگىلىگى ەكەندىگىنىڭ ايقىن دالەلى جانە مويىندالۋى بولدى. سونداي-اق، ءال-فارابيدىڭ ەڭبەكتەرىن اۋدارىپ، ولاردىڭ ەۋروپادا تارالۋىنا ىقپال ەتكەن يەۆرەي ويشىلدارىنىڭ زور ەڭبەگىن اتاپ وتكىم كەلەدى»، - دەدى قاز ۇ ۋ رەكتورى.
ەۋروپالىق ويشىلداردىڭ ءال-فارابي تراكتاتتارى ارقىلى ەجەلگى انتيكالىق يدەيالارعا ورالۋى ەۋروپادا رەنەسسانس - قايتا ورلەۋ ءداۋىرىنىڭ پايدا بولۋىنا اسەر ەتتى. سوندىقتان ءال-فارابيدىڭ شىعارماشىلىق مۇراسى مادەنيەتتەردىڭ جاقىنداسۋى مەن ءوزارا تۇسىنىستىگىنىڭ سيمۆولىن بىلدىرەتىن شىعىس پەن باتىس اراسىن بايلانىستىرۋشى رۋحاني كوپىرگە اينالدى.