فرانسيادا اباي مۇراسىن ناسيحاتتاپ جۇرگەن قازاق قىزى مادەنيەت سالاسىنىڭ ۇزدىگى اتاندى

نۇر-سۇلتان. قازاقپارات - بۇگىن ەلىمىزدىڭ مادەنيەت جانە سپورت ءمينيسترى اقتوتى رايىمقۇلوۆا فرانسيانىڭ برەتان ولكەسى، رەنن قالاسىنداعى قازاقستان رەسپۋبليكاسىنىڭ قۇرمەتتى كونسۋلى جانار اۆار تورەبايەۆانى قابىلدادى، دەپ حابارلايدى قازاقپارات ءتىلشىسى.

كەزدەسۋ بارىسىندا مينيستر جانار تورەبايەۆانى قازاقستان مەن فرانسيا اراسىنداعى دوستىق قارىم-قاتىناستى نىعايتىپ، قازاق مادەنيەتىن دامىتۋعا قوسقان ۇلەسى ءۇشىن «مادەنيەت سالاسىنىڭ ۇزدىگى» توسبەلگىسىمەن ماراپاتتادى.

«ءسىز گيپپوكرات الدىنداعى سەرتىڭىزدى قالتقىسىز ورىنداپ، مەديتسينا سالاسىندا بيىك بەلەستەردى باعىندىرىپ كەلە جاتقان ابزال جانسىز. وسىناۋ جاۋاپتى قىزمەتتىڭ قىر-سىرىن جەتىك مەڭگەرىپ، جاس ماماندارعا ۇلگى كورسەتىپ كەلەسىز. سونىمەن قاتار حالقىمىز ءسىزدى الەمدىك دەڭگەيدەگى ويشىل، قازاق رۋحانياتىنىڭ تەمىرقازىعى ابايدىڭ مول مۇراسىن فرانسيادا ناسيحاتتاۋعا ولشەۋسىز ۇلەس قوسىپ كەلە جاتقان ءور مىنەزدى ازامات رەتىندە دە جاقسى بىلەدى.

«الماتى-رەنن» قالالار باۋىرلاستىعى ءسىزدىڭ جەتەكشىلىگىڭىزبەن ەكى مەملەكەت اراسىنداعى سان سالاداعى قارىم-قاتىناستى جانداندىرا تۇسۋگە اتسالىسىپ وتىر. وسى ورايدا رەنن قالاسىنىڭ تورىندە حاكىم اباي اتامىزدىڭ ەسكەرتكىشىن قويۋعا كۇش سالىپ، قازاق مادەنيەت تانىتۋعا زور ەڭبەك سىڭىرگەنىڭىزدى اتاپ وتكىم كەلەدى. الداعى ۋاقىتتا دا قازاقستان مەن فرانسيا اراسىنداعى تىعىز مادەني، ساياسي، ەكونوميكالىق بايلانىستاردى دامىتۋ جولىندا قولعا العان باستامالارىڭىزعا ساتتىلىك سەرىك بولسىن!»، - دەدى اقتوتى رايىمقۇلوۆا.

ايتا كەتەيىك، جانار تورەبايەۆا 2018-جىلى قازاقستان رەسپۋبليكاسىنىڭ رەنن قالاسىنداعى قۇرمەتتى كونسۋلى قىزمەتىنە سايلانعان. سول كەزدەن باستاپ برەتان حالىقارالىق كوممەرتسيا پالاتاسى جانە فرانسيا سىرتقى ىستەرىنىڭ برەتان ولكەسىندەگى ەكونوميكالىق ديپلوماتىمەن بىرگە قازاقستانعا ينۆەستيتسيا تارتۋ بويىنشا قىرۋار شارۋا اتقارىپ كەلەدى.

قازاقستاننىڭ پاريجدەگى ەلشىلىگىمەن بىرلەسىپ، 2018-2019-جىلدان بەرى ەكى ەل اراسىندا اۋىل شارۋاشىلىعى، ەكونوميكا سالاسىندا ەكىجاقتى كەزدەسۋلەر ۇيىمداستىرىپ ءجۇر. سونىمەن قاتار ول 2014-جىلى رەنن قالاسىنداعى جوعارى كوممەرتسيا ۋنيۆەرسيتەتى مەن الماتى مەنەدجمەنت ۋنيۆەرسيتەتى اراسىندا كونۆەنتسيا جاساۋعا اتسالىسىپ، وسى جوعارى وقۋ ورنىندا وقىپ جۇرگەن قازاق ستۋدەنتتەرگە قامقورلىق جاساپ كەلەدى.

وتكەن جىلدان باستاپ اباي قۇنانباي ۇلىنىڭ 175 جىلدىق مەرەيتويىن رەنن قالاسىندا اتاپ وتۋگە قىزۋ دايىندىق جۇمىستارىن جۇرگىزگەن. برەتان فولكلورلىق مۋزىكا اسپاپتارى انسامبلىمەن ناسيحاتتاۋ جۇمىسىن جۇرگىزىپ، رەنن-الماتى باۋىرلاستىعى اياسىندا «الرەنن» كۆارتەتىن قۇرعان. ۇجىم حاكىم اباي ولەڭدەرىن فرانسۋز تىلىنە اۋدارىپ، رەنن قالاسىندا بولاتىن مەرەيتويعا دايىندادى. ەندى «الرەنن» كۆارتەتى اباي ولەڭدەرىن برەتان جانە دە باسقا ولكەلەردە جىل سايىن بولاتىن فولكلور فەستيۆالىندە ورىندايتىن بولادى.

ال 2016-جىلى جانار تورەبايەۆا جەرگىلىكتى بيلىكپەن ءۇش جىلداي كەلىسسوزدەر جۇرگىزىپ، رەنن قالاسىنداعى «الماتى» ساياباعىنان اباي ەسكەرتكىشىن اشقىزدى.

2019-جىلى قازاقستان ەلشىلىگى باستاعان اباي شىعارمالارىن ورىنداۋ باستاماسىنا قاتىسىپ، فرانسيادا جالعاسۋىنا ۇلەس قوستى. بيىل اقپاندا ق ر ۇلتتىق اكادەميالىق كىتاپحانانىڭ ۇسىنىسى بويىنشا رەنن ۋنيۆەرسيتەتى كىتاپحاناسىمەن كەلىسسوز جۇرگىزىپ، 15- قاراشادا اباي جانە وزگە دە قازاق جازۋشىلارىنىڭ كىتاپتارىن ۋنيۆەرسيتەت كىتاپحاناسىنا تاپسىرادى.

الداعى ۋاقىتتا رەنن ۋنيۆەرسيتەتىنىڭ حالىقارالىق ادەبيەت جانە تاريح فاكۋلتەتتەرىنىڭ ستۋدەنتتەرىنە ابايتانۋ جانە قازاق مادەنيەتى جايلى ءدارىس وقىماق. وسىلايشا جانار تورەبايەۆا فرانسيادا قازاق مادەنيەتىن، اباي تانۋ سالاسىن تانىتۋ جولىندا دا ەڭبەك ەتىپ جاتىر.

جانار تورەبايەۆا 1967-جىلى 20 ساۋىردە الماتى وبلىسى، شەلەك اۋىلىندا دۇنيەگە كەلگەن. 1990-جىلى سانك-پەتەربۋرگ مەملەكەتتىك مەديتسينا ۋنيۆەرسيتەتىن تامامداعان. 1999-جىلى فرانسياعا قونىس اۋدارعان.

قازىر نەگىزگى ماماندىعى دارىگەرلىكتەن بولەك رەنن قالاسىندا ءبىرقاتار قوعامدىق جۇمىس اتقارادى. 1999-جىلدان بەرى «الماتى-رەنن» قالالار باۋىرلاستىعىنىڭ مۇشەسى.