ساۋدا ءمينيسترى باعانى تۇراقتاندىرۋ شارالارىنا تۇسىنىك بەردى

نۇر-سۇلتان. قازاقپارات - ق ر ساۋدا جانە ينتەگراتسيا ءمينيسترى باقىت سۇلتانوۆ كوكتەم مەن جاز ايلارىندا باعانى تۇراقتاندىرۋ شارالارىنا تۇسىنىك بەردى، دەپ حابارلايدى قازاقپارات ءتىلشىسى.

«باعالاردى تۇراقتاندىرۋ ءۇشىن ساۋدا جانە ينتەگراتسيا، ۇلتتىق ەكونوميكا جانە اۋىل شارۋاشىلىعى مينيسترلىكتەرىنىڭ بىرلەسكەن بۇيرىعىمەن توتەنشە جاعداي رەجيمى كەزەڭىندە 9 الەۋمەتتىك ماڭىزى بار تاۋارعا شەكتى باعا بەلگىلەندى. سونىمەن قاتار، مينيسترلىك اكىمدىكتەرگە ىشكى ساۋدا سۋبەكتىلەرىنىڭ شەكتى بولشەك ساۋدا باعالارىنىڭ مولشەرىن ساقتاۋعا باقىلاۋ جۇرگىزۋ بويىنشا ۇسىنىستار جىبەردى. اتالعان ۇسىنىستاردى ورىنداۋ ءۇشىن اكىمدىكتەر مەن مينيسترلىكتىڭ اۋماقتىق بولىمشەلەرى تۇراقتى نەگىزدە مونيتورينگ جۇرگىزىپ، ونىڭ قورىتىندىسى بويىنشا 180 اكىمشىلىك ايىپپۇل سالدى»، - دەدى ب. سۇلتانوۆ ۇكىمەت وتىرىسىندا.

ونىڭ سوزىنە قاراعاندا، بيىلعى جىلدىڭ 22-ناۋرىزىنان باستاپ توتەنشە جاعداي رەجيمىنىڭ ارەكەت ەتۋ كەزەڭىندە 7 تاۋاردى ەكسپورتتاۋعا، سونداي-اق تاۋارلاردى اي سايىن شىعارۋدى كۆوتالاۋعا تىيىم سالىندى. بۇدان باسقا، باعانىڭ وسۋىنە جول بەرمەۋ ماقساتىندا بيىلدىڭ ناۋرىز ايىنان قىركۇيەك ايىنا دەيىن الەۋمەتتىك ماڭىزى بار ازىق- تۇلىك تاۋارلارىنىڭ يمپورتى مەن ساتىلۋىنا قوسىلعان قۇن سالىعىنىڭ ستاۆكاسى %12 تەن %8 كە دەيىن تومەندەتىلدى.

بۇدان بۇرىن حابارلانعانداي، 2020 -جىلدىڭ باسىنان بەرى الەۋمەتتىك ماڭىزى بار ازىق-تۇلىك تاۋارلارىنىڭ باعاسى 4,4 پايىزعا ءوستى.

اۆتور: رۋسلان عابباسوۆ