«توميريس» پاريجدەگى كينوفەستيۆالدە توپ جاردى
قازاقستان كينەماتوگرافياسى ءۇشىن مۇنداي قۋانىشتى جاڭالىقتى فيلمنىڭ رەجيسسەرى اقان ساتايەۆ ءبولىستى، دەپ حابارلايدى قازاقپارات ءتىلشىسى.
«دوستار، قۋانىشتى جاڭالىقتى بولىسۋگە اسىقپىز! «توميريس» كينوتۋىندىسى پاريجدە وتكەن 26- L’ەtrange Festival كينوفەستيۆالىنىڭ تولىق مەتراجدى فيلمدەر سەكتسياسىندا Nouveau Genre گران- ءپريىن جەڭىپ الدى. فەستيۆال سەرىكتەستەرىنىڭ ءبىرى، الەمدەگى ەڭ ءىرى فرانتسۋز تىلىندەگى اقىلى تەلەارنا CANAL+ ءبىزدىڭ فيلمدى پرايم- تايمدا كورسەتەدى» دەپ جازدى اقان ساتايەۆ Instragram پاراقشاسىندا.
ەسكە سالا كەتەيىك، بىلتىر جارىققا شىققان كينوتۋىندى ءبىزدىڭ زامانىمىزعا دەيىنگى VI عاسىردا بولعان وقيعانى سۋرەتتەيدى. فيلمدە كىشكەنتاي قىزدان ايبىندى جاۋىنگەرگە اينالعان، جاقىندارىنان ايرىلىپ، ساتقىنداردان ءوشىن العان جانە ساق تايپالارىن بىرىكتىرگەن ۇلى دالانىڭ اتى اڭىزعا اينالعان توميريس پاتشايىمىنىڭ تاعدىرى باياندالادى. فيلم ق ر مادەنيەت جانە سپورت مينيسترلىگىنىڭ تاپسىرىسىمەن «قازاق فيلم» كينوستۋدياسىندا Sataifilm كومپانياسىنىڭ قاتىسۋىمەن تۇسىرىلگەن. ءاليا نازاربايەۆا باس پروديۋسەر بولعان فيلمگە اقان ساتايەۆ رەجيسسەرلىك ەتكەن. فيلمنىڭ باستى رولدەرىندە الميرا تۇرسىن، ءادىل احمەتوۆ، ازامات ساتىبالدى، ەركەبۇلان دايىروۆ، بەرىك ايتجانوۆ، ايان وتەپبەرگەن، اسىلحان تولەپوۆ سىندى اكتەرلەر وينادى.
