تۇركىستاندا پارا بەرىپ، پاتەر العان تۇرعىندار باسپاناسىن تەز ارادا بوساتۋى ءتيىس
قالا اكىمدىگىنىڭ مالىمەتىنشە، پارا بەرۋ دەرەگى 2017 -جىلدىڭ جەلتوقسان ايىندا ورىن العان. قالانىڭ ءۇش تۇرعىنى وتىرار مولتەك اۋدانىندا جاڭادان بوي كوتەرگەن ۇيلەردەن پاتەر الۋ ءۇشىن ءوز كەزەگىن ىلگەرىلەتۋ ءۇشىن ءۇي ينسپەكتسياسى قىزمەتكەرىنە پارا بەرگەن. الايدا كەيىننەن بۇل قىلمىس اشكەرە بولىپ، پارا العان قىزمەتكەردىڭ ۇستىنەن قىلمىستىق ءىس قوزعالعان. ونىڭ ءىس- ارەكەتى بويىنشا ق ر ق ك 190-بابىنىڭ 3-بولىگىنىڭ 1-تارماعىمەن سوتقا دەيىنگى تەرگەۋ امالدارى جۇرگىزىلىپ، بۇگىندە پارا بەرگەن تۇرعىندارعا دا شارا قولدانىلىپ وتىر.
«زاڭسىز ءىس- ارەكەت ارقىلى جىلجىمايتىن مۇلىككە قول جەتكىزگەن ازاماتتارعا اپتا باسىندا سوت ورىنداۋشىلارى بارىپ، پاتەردى بوساتۋ جونىندە مىندەتتەمە الدى. تۇرعىندار بەكىتىلگەن 10 كۇن ارالىعىندا پاتەردى بوساتپاعان جاعدايدا قوسىمشا شارا قولدانىلىپ، جاۋاپقا تارتىلاتىنى جونىندە ءتىلحات تابىستالعان» دەلىنگەن اكىمدىكتىڭ حابارلاماسىندا.
اۆتور: اينۇر اقبايەۆا