باياناۋىلداعى عاجايىپ تاسقا «تانوستىڭ قولى» دەگەن اتاۋ ۇسىنىلدى
ول اۋدان ورتالىعىنان 70 شاقىرىمدا جاتىر. بۇعان دەيىن «اۋليەتاس» اتالىپ كەلگەن بيىكتىگى 30 مەتر جارتاستى بىرنەشە قىرىنان سۋرەتكە تۇسىرگەن ەكسپەديتسيا مۇشەلەرى تاڭعاجايىپ وقيعاعا تاپ بولعان. سۋرەت ءبىر قىرىنان بۇركىتكە، ەكىنشى قىرىنان شوگىپ جاتقان تۇيەگە ۇقسايدى. باسقا قىرىنان جەردەن شىعىپ تۇرعان ادامنىڭ قولىن كورۋگە بولادى. مۇنى كوپشىلىك «شەكسىزدىك قولعابى»، ياعني انيماتسيالىق فيلمدەردەگى كەيىپكەر تانوستىڭ قولىنا ۇقساتقان. عاجايىپ سۋرەتتى ءبىرىنشى بولىپ جاس عالىم مۇرابەك وماروۆ تۇسىرگەن. ول باياناۋىل اۋدانىندا تۋىپ- وسكەن. كونەكوز قاريالاردان جەتكەن اڭىزعا سۇيەنسەك، بۇل تاستىڭ كونە اتاۋى «اۋليەتاس» ەكەن.
ەرتەدە جارتاستىڭ باسىندا سۋ اتقىلاپ تۇرعان. مۇرابەك وماروۆ، گەوگرافيا ماگيسترى:
- نەگىزىندە بۇل تاستىڭ جەرگىلىكتى اتاۋى - «اۋليەتاس» نەمەسە «قويتاس». بۇل اڭىز بويىنشا بۇل تاستىڭ باسىندا بۇرقاق بولعان، اينالاسىنا سۋ كەلىپ تۇرعان دەيدى. ماڭى جايقالىپ، ۇستىندە ۇنەمى كەمپىرقوساق تۇراتىن دەلىنەدى. كەيىن يەسى بۇل جەرلەردى تارتىپ الاتىنىنا الاڭداپ تاس مۇسىنشىلەرىن ارنايى جالداپ، كوزىن، اۋزىن بەكىتىپ تاستاعان. سودان كەيىن ول بۇرقاق توقتاپ، اينالاسىنداعى سۋ تارتىلىپ قالعان دەپ جەتكەن. مۇرابەك وماروۆ ءوزىنىڭ سۋرەتتەرىن «QazaqGeoqraphy» قاۋىمداستىعىنا جىبەرىپتى. ەرەكشە قىزىعۋشىلىققا يە بولعان سۋرەتتى «تانوستىڭ قولى» دەپ اتاۋعا ۇسىنىس بىلدىرگەندەر تابىلىپ جاتىر. بۇل جەر باياناۋىلدىڭ كيەلى كارتاسىنا ەنگەن. ەندى تۋريستىك باعىت اشۋ قالدى. ولكە تانۋشىلاردىڭ ايتۋىنشا، باياناۋىل اۋدانىندا زەرتتەلمەگەن جەرلەر ءالى دە جەتكىلىكتى.
مۇرابەك وماروۆ، گەوگرافيا ماگيسترى:
- وسىنداي تاستار ءبىزدىڭ ايماعىمىزدا وتە كوپ. ولاردى ءالى دە زەرتتەپ، تۋريستەردى شاقىرۋعا، قىزىقتى دا كورىكتى جەرلەرىمىزدى كورسەتە ءبىلۋىمىز كەرەك دەپ ويلايمىن. ءدال قازىر بۇل جاققا ونداي مارشرۋتتار قاراستىرىلماعان. ويتكەنى بۇل ايماق باياناۋىل اۋدانىنىڭ ورتالىعىنان 70 شاقىرىمداي جەردە جۇمات شانين اۋىلىنىڭ ماڭىنداعى قويتاس ەلدى مەكەنىنە جاقىن ورنالاسقان.