اتىراۋدا وبلىس اكىمىنىڭ ءبىرىنشى ورىنباسارى ۇستالدى
اتىراۋ وبلىسىنىڭ سىبايلاس جەمقورلىققا قارسى ءىس- قيمىل دەپارتامەنتىنىڭ باسپا ءسوز قىزمەتىنىڭ حابارلاۋىنشا، بۇگىن اتىراۋدا وبلىس اكىمىنىڭ ءبىرىنشى ورىنباسارى نۇرلان تاۋبايەۆ پەن وبلىستىق قۇرىلىس باسقارماسىنىڭ باسشىسى تيمۋر باساروۆ ۇستالدى. ولار ايماقتىڭ ينفراقۇرىلىمدىق دامۋى مەن جول قۇرىلىسىمەن اينالىساتىن كومپانيالاردىڭ بىرىنەن 182 ميلليون تەڭگە كولەمىندە پارا الدى دەگەن كۇدىككە ءىلىندى. تەرگەۋ مۇددەسى ءۇشىن ءىستىڭ ءمان- جايى ءالى اشىلعان جوق.
ەسكە سالا كەتەيىك، سىبايلاس جەمقورلىققا قارسى قىزمەت نۇرلان تاۋبايەۆ قاتىسقان اتىراۋ وبلىسى اكىمدىگىنىڭ وكپەنى جاساندى جەلدەتۋ (ءو ج ج) اپپاراتتارىن ساتىپ الۋى تۋرالى ءىستى تەرگەپ جاتىر.
«ءبىز قۇجاتتاردى اتىراۋ وبلىسى بويىنشا ىشكى مەملەكەتتىك اۋديت دەپارتامەنتىنە جىبەردىك. ولار بىزگە قورىتىندى بەرۋى كەرەك، سودان كەيىن ءبىز قىلمىستىق ءىس قوزعالا ما، جوق پا، سونى شەشەمىز. مەنىڭ بىلۋىمشە، اۋديتورلاردىڭ جۇمىسى وتە كوپ، سول سەبەپتى ولار ۇلگەرمەي جاتادى. ءبىز دە كۇتۋدەمىز»، - دەپ ءو ج ج بويىنشا ءىستى تەرگەۋ بارىسىنا قاتىستى تۇسىنىك بەردى اتىراۋ وبلىسى بويىنشا سىبايلاس جەمقورلىققا قارسى ءىس- قيمىل دەپارتامەنتى باسشىسىنىڭ ءبىرىنشى ورىنباسارى ايدوس مامىت.
ەسكە سالا كەتەيىك، نۇرلان تاۋبايەۆ وبلىس اكىمىنىڭ ءبىرىنشى ورىنباسارى لاۋازىمىنا مامىر ايىندا، ال تيمۋر باساروۆ اتىراۋ وبلىسىنىڭ قۇرىلىس باسقارماسىنىڭ باسشىسى قىزمەتىنە ماۋسىم ايىنىڭ سوڭىندا تاعايىندالعان بولاتىن.
اۆتور: اياۋلىم التىنبەك