قىزىلوردادا ويىنشىق تاپانشامەن دۇكەن توناعان ادام قولعا ءتۇستى

قىزىلوردا. قازاقپارات - قىزىلوردا قالاسىندا ويىنشىق تاپانشامەن دۇكەن توناعان ازامات قولعا ءتۇستى، دەپ حابارلايدى قازاقپارات ءتىلشىسى.

بۇل وقيعا 9 - قىركۇيەكتە ساعات 19.00 شاماسىندا تىركەلدى. سول ۋاقىتتا قىزىلوردا قالالىق پوليتسيا باسقارماسىنىڭ كەزەكشى بولىمىنە وبلىس ورتالىعىنىڭ 42 جاستاعى تۇرعىنىنان حابارلاما ءتۇستى. وبلىس ورتالىعىنداعى دۇكەننىڭ بىرىندە ساتۋشى بولىپ جۇمىس ىستەيتىن ول ءوزىن بەلگىسىز جاس جىگىتتىڭ تاپانشاعا ۇقساس زاتپەن قورقىتىپ، دۇكەننەن اراق- شاراپ پەن سۋسىن الىپ كەتكەنىن حابارلاعان. سالدەن كەيىن سوعان ۇقساس تاعى ءبىر حابارلاما كەلىپ ءتۇستى. وندا بەلگىسىز ازاماتتىڭ كاسساداعى بارلىق اقشانى بەرۋىن تالاپ ەتەدى. دەگەنمەن ساتۋشى ايەل وعان قارسى ارەكەت ەتەدى. كاسسانى كىلتپەن جاۋىپ، دۇكەندە بەينەباقىلاۋ بار ەكەنىن ايتادى. دۇكەندە كۇيەۋى جۇرگەنىن جەتكىزەدى. سول ۋاقىتتا كۇدىكتى دەرەۋ قاشىپ كەتەدى.

جابىرلەنۋشىلەردەن توناۋشىنىڭ بەت الپەتىنىڭ سيپاتتاماسىن العان ءتارتىپ ساقشىلارى بارلىق پوليتسيا ەكيپاجىنا باعىت- باعدار بەردى. پوليتسەيلەر تاراپىنان جۇرگىزىلگەن جەدەل- ىزدەستىرۋ جۇمىستارىنىڭ ناتيجەسىندە كۇدىكتى قولعا ءتۇستى. ول بۇرىن سوتتالعان ازامات بولىپ شىقتى.

«ودان ايعاقتى زاتتار تاركىلەندى. ولاردىڭ ىشىندە ويىنشىق تاپانشا دا بار. تەكسەرۋ بارىسىندا كۇدىكتى ازاماتتىڭ ەكى توناۋ دەرەگىنە قاتىسى بار ەكەنى انىقتالدى. كۇدىكتىگە قاتىستى ق ر قىلمىستىق كودەكسىنىڭ 191-بابى 2-بولىگىنىڭ 1-تارماعىمەن سوتقا دەيىنگى تەرگەپ- تەكسەرۋ باستالدى. وندا جابىرلەنۋشىنىڭ ومىرىنە نەمەسە دەنساۋلىعىنا قاۋىپتى ەمەس كۇش قولدانۋ قاتەرىن ءتوندىرىپ جاساعان توناۋ جاعدايى كورسەتىلگەن»، - دەپ ءمالىم ەتتى قىزىلوردا وبلىستىق پوليتسيا دەپارتامەنتىنىڭ باسپا ءسوز قىزمەتى.

قازىرگى تاڭدا كۇدىكتى ۋاقىتشا ۇستاۋ اباقتىسىنا قاماققا الىندى. مونداي- اق، قىزىلوردا وبلىسى جاڭاقورعان اۋدانىندا قۇم اراسىنان 2 ەسىرتكى القابى تابىلدى.

اۆتور: ءادىلجان ۇمبەت