تانىمال كومپوزيتور: تورەعالي قايرات نۇرتاستىڭ ورنىن باسادى

نۇر-سۇلتان. قازاقپارات - قازاق ەسترادا انشىلەرىنىڭ ءبىرازىنا دەرلىك ءان ءماتىنىن، اۋەنىن جازعان اۆتور باۋىرجان ەسەبايەۆ سۇحبات بەردى.

ول قايرات نۇرتاس، ەرنار ايدار، قۋاندىق راحىم، ءابدىجاپپار ءالقوجالارعا مەگاحيت اندەر جازدى. سازگەر قازاق انشىلەرىن سالىستىرا وتىرا، ولاردىڭ قايسىسى سۇرانىسقا يە ەكەنىن اتادى.

بۇل تۋرالى «ۋاقىت كورسەتەدى» باعدارلاماسىندا ايتىلدى.

باۋىرجان ەسەبايەۆتان قايرات نۇرتاس، تورەعالي تورەالى، ەرنار ايدار، قۋاندىق راحىم، ءابدىجاپپار ءالقوجا بەسەۋىنىڭ قايسىسى الداعى ۋاقىتتا سۇرانىسقا يە بولادى، قايسىسى كورەرمەن جيناي الادى دەگەن ساۋال قويىلدى.

«بەسەۋىنىڭ ىشىندە قايرات نۇرتاس سۇرانىستا بولادى. ودان كەيىن تورەعالي سۇرانىستى بولادى. قايراتتىڭ ورنىن تورەعالي باسا الادى. ەگەر تورەعاليدى الىپ تاستاساق، ۇشەۋىنىڭ ىشىندە قۋاندىق راحىم الدىعا شىعادى. ەرنار ايدار سوڭعى وقيعاعا بايلانىستى، لوتەرەيا ويناتقانى ءۇشىن، ازداپ تىڭدارمانىن جوعالتىپ الۋى مۇمكىن»، - دەگەن جاۋاپ ايتتى.

باۋىرجان ەسەبايەۆ ەرنار ايداردىڭ باسى داۋعا قالىپ، ەلدىڭ اشۋىنا قالعان تۇست اعالىق اقىلىن ايتقان.

«ول لوتەرەيا ويىنىن جارناما سەكىلدى ويناتا سالماق بولعان. قاتەلىكپەن وسىناي جاعدايعا تاپ بولىپتى. جارناما ءۇشىن 6 ميلليون تەڭگە العان. قالعانىن ۇيىمداستىرۋشىلار العان. لوتەرەيا زاردابىنان 195 ميلليون تەڭگە شىعىن كەلدى. مەن سول سومانى شاماڭ كەلگەنشە حالىققا قايتار دەدىم. ءوزىنىڭ العان 6 ميلليون تەڭگەسىنەن بولەك قايتار دەدىم. باسقاشا اقتالا المايتىنىن ايتتىم. سودان كەيىن ەكىنشى مارتە مۇنداي جولعا جولاما دەدىم»، - دەدى ەسەبايەۆ.

سازگەر قايرات نۇرتاستىڭ العاشقى كونسەرتىندە الدىڭعى ورىنداردا وتىرىپ كەلگەنىن، كەيىن ورتاڭعى، سوڭعى ورىندارعا شاقىرعانىن ايتىپ قالدى. ءتىپتى كەي كونتسەرتىنە شاقىرمايتىن بولعان.

«ءوزىڭ قاناتىڭمەن سۋ سەۋىپ، شاكىرت سەكىلدى تاربيەلەگەن انشىلەر جوعارى كوتەرىلىپ، سامعاعاندا ودان اجىراپ قالاسىڭ. ونىڭ قاسىندا اقىن دا، سازگەر دە، ۇرى دا، قارى دا كوبەيىپ كەتەدى. سودان ءبىزدىڭ ارامىز اجىراي باستادى. قايراتتىڭ اكەسىنە قالجىڭداپ، ەندى كەيىنگى كونتسەرتتەردى سوڭعى ورىنداردا وتىراتىن شىعارمىز دەدىم. كەي كونتسەرتىنە شاقىرمايتىن دا بولدى. مەن قايراتتى جاماندامايمىن. قايرات سونداي التىن بالا. وتە اقكوڭىل بالا. بۇل قاسىنداعى ۇيىمداستىرۋشى، ديرەكتور، پروديۋسەرلەردىڭ جۇمىسى»، - دەدى اندەردىڭ اۆتورى.