ورىنباسارى جەمقورلىقپەن ۇستالعان قۇرمانعازى اۋدانىنىڭ اكىمى جۇمىسىنان كەتتى

اتىراۋ. قازاقپارات - قۇرمانعازى اۋدانى اكىمىنىڭ ورىنباسارى وركەن تاجىبايەۆقا قاتىستى سوتقا دەيىنگى تەرگەۋ اياقتالدى.

ول اۋداندىق سوتتىڭ ۇكىمىمەن مەملەكەتتىك قىزمەتتە قىزمەت اتقارۋ قۇقىعىنان ءومىر بويى ايىرىلدى جانە 2750000 مولشەرىندە ايىپپۇل تولەيتىن بولدى، دەپ حابارلايدى قازاقپارات اتىراۋ وبلىسى سىبايلاس جەمقورلىققا قارسى ءىس- قيمىل اگەنتتىگىنە سىلتەمە جاساپ.

3 - شىلدەدە سوت اتىراۋ وبلىسى قۇرمانعازى اۋدانى اكىمىنىڭ بۇرىنعى ورىنباسارى وركەن تاجىبايەۆقا ۇكىم شىعاردى. ول بيلىكتى اسىرا پايدالاندى، كاسىپكەرلىك قىزمەتكە زاڭسىز قاتىسۋ جانە الاياقتىق جاسادى دەپ ايىپتالدى. ماسەلەن، تاجىبايەۆ تۋىسقاندارىنا تىركەلگەن ج ش س جانە ج ك باسقارماسىنا ارتىقشىلىقتار بەرگەن، بالىقشى كۇنىنە ارنالعان ءىس- شارانى وتكىزۋ سىلتاۋىمەن ج ش س قۇرىلتايشىسىنىڭ 150 مىڭ تەڭگە مولشەرىندەگى اقشالاي قاراجاتىن يەمدەگەن.

سونداي- اق وندىرىستىك كووپەراتيۆتەردىڭ بىرىنە 500 مىڭ تەڭگە زيان كەلتىردى. مۇنىمەن قوسا اۋداننىڭ از قامتىلعان ازاماتتارى ءۇشىن قورعانىس مەديتسينالىق ماسكالارىن ساتىپ الۋعا قارجىلىق كومەك كورسەتۋ سىلتاۋىمەن كاسىپكەرلەردىڭ جالپى سوماسى 125 مىڭ تەڭگە اقشالاي قاراجاتىن جىمقىرعان. ناتيجەسىندە ەكس- شەنەۋنىككە 2 ميلليون 750 مىڭ تەڭگە كولەمىندە ايىپپۇل سالىندى. ول مەملەكەتتىك قىزمەتتە قىزمەت اتقارۋ قۇقىعىنان ءومىر بويىنا ايىرىلدى.

«مەملەكەتتىك قىزمەت جانە سىبايلاس جەمقورلىققا قارسى ءىس- قيمىل ماسەلەلەرى بويىنشا قازاقستان رەسپۋبليكاسىنىڭ كەيبىر زاڭنامالىق اكتىلەرىنە وزگەرىستەر مەن تولىقتىرۋلار ەنگىزۋ تۋرالى» زاڭنىڭ جاڭا رەداكسياسىنا سايكەس ءبىرىنشى باسشى ايىپتاۋ ۇكىمى كۇشىنە ەنگەننەن كەيىن 10 كۇنتىزبەلىك كۇن ىشىندە وتستاۆكاعا كەتۋگە مىندەتتى. وسىعان بايلانىستى، اعىمداعى جىلدىڭ 8- قىركۇيەگىندە قۇرمانعازى اۋدانىنىڭ اكىمى ق. نۇرتايەۆ قول استىنداعىلارعا قاتىستى سىبايلاس جەمقورلىق جانجالىنان كەيىن وتستاۆكاعا كەتتى، دەپ حابارلادى بريفينگتە سىبايلاس جەمقورلىققا قارسى ءىس- قيمىل اگەنتتىگىنىڭ اتىراۋ وبلىسى بويىنشا دەپارتامەنتىنىڭ ءبىرىنشى ورىنباسارى ا. مامىتوۆ.