ءبىلىم مينيسترلىگى «استانا» ۋنيۆەرسيتەتىنە حاتتاما تولتىرىپ، سوتقا بەردى

None
None
نۇر- سۇلتان. قازاقپارات - ق ر ءبىلىم جانە عىلىم مينيسترلىگى تەكسەرۋ جۇمىستارىنا كەدەرگى كەلتىرگەنى ءۇشىن «استانا» ۋنيۆەرسيتەتىنە قاتىستى اكىمشىلىك حاتتاما تولتىرىپ، سوتقا جولدادى، دەپ حابارلايدى قازاقپارات ءتىلشىسى.

حاتتاما ق ر اكىمشىلىك قۇقىق بۇزۋشىلىقتار كودەكسىنىڭ 462-بابى، 2-بولىگى (مەملەكەتتىك ينسپەكسيالار مەن مەملەكەتتىك باقىلاۋ جانە قاداعالاۋ ورگاندارىنىڭ لاۋازىمدى ادامدارىنا ءوز قىزمەتتىك مىندەتىن ورىنداۋىنا كەدەرگى كەلتىرۋ، قاۋلىلاردى، نۇسقامالاردى جانە وزگە دە تالاپتاردى ورىنداماۋ، بىر جىل ىشىندە قايتالانعان ارەكەتتەر) بويىنشا جازىلعان.

«استانا» ۋنيۆەرسيتەتىنە قاتىستى بۇگىنگى تەكسەرۋ جۇمىستارىنا كەدەرگى كەلتىرۋ جونىندە حاتتاما تولتىرىلدى. ءبىزدىڭ قىزمەتكەرلەر الدىنا ۋنيۆەرسيتەتتىڭ بىردە- ءبىر باسشىسى شىققان جوق. وتىنىشتە كورسەتىلگەن ماسەلەلەر بويىنشا سۇراعان قۇجاتتار بەرىلگەن جوق. سول سەبەپتى، اكىمشىلىك قۇقىق بۇزۋشىلىقتار تۋرالى كودەكسكە سايكەس، حاتتاما تولتىرىلىپ، بۇگىن- ەرتەڭ سوتقا جىبەرىلەدى. قۇقىق بۇزۋشىلىق ءبىر جىل ىشىندە قايتالانعانى ءۇشىن ايىپپۇل كولەمى 2-3 ەسەگە ءوسۋى مۇمكىن»، - دەدى ق ر ب ع م ءبىلىم جانە عىلىم سالاسىنداعى ساپانى قامتاماسىز ەتۋ كوميتەتى ءتوراعاسىنىڭ ورىنباسارى عالىمجان جۇماشيەۆ قازاقپارات تىلشىسىنە بەرگەن سۇحباتىندا.

ونىڭ ايتۋىنشا، سوت شەشىمى شامامەن 2 اپتا ىشىندە شىعۋى ءتيىس. سوت ءوز شەشىمىمەن مينيسترلىكتىڭ تەكسەرۋ جۇرگىزۋىن، بارلىق قۇجاتتاردىڭ كورسەتىلۋىن مىندەتتەي الادى. سونىمەن بىرگە، ع. جۇماشيەۆ «ۋنيۆەرسيتەتتىڭ ليسەنزياسى ۋاقىتشا توقتاتىلۋى مۇمكىن بە؟ ستۋدەنتتەردىڭ جاعدايى نە بولماق؟» دەگەن سۇراققا جاۋاپ بەردى.

«بۇگىن ۋنيۆەرسيتەتتە تەكسەرۋ جۇرگىزگەن جوقپىز، ءوز جۇمىسىمىزدى اياقتاي المادىق. ليسەنزيانى ۋاقىتشا توقتاتۋ ءۇشىن ءبىزدىڭ كوميتەتتىڭ قاۋلىسى شىعۋى كەرەك. قاۋلى شىعارۋ ءۇشىن تەكسەرۋ جۇمىستارىن جۇرگىزۋ قاجەت. بۇگىن حاتتاما جىبەرىپ، سوت شەشىمىن كۇتەمىز. ال ستۋدەنتتەر وقۋىن ءارى قاراي جالعاستىرا بەرەدى. بۇل پروتسەسس ولاردىڭ وقۋىنا اسەر ەتپەيدى. ال مينيسترلىككە ءوتىنىش بەرگەن 14 ستۋدەنتتىڭ ماسەلەسى شەشىلمەي قالدى»، - دەپ جاۋاپ بەردى ع. جۇماشيەۆ.

ايتا كەتەيىك، بۇگىن ق ر ءبىلىم جانە عىلىم مينيسترلىگى «استانا» ۋنيۆەرسيتەتىنە جوسپاردان تىس تەكسەرۋدى باستادى. وعان 14 ستۋدەنتتىڭ شاعىمى نەگىز بولدى. ستۋدەنتتەر ۋنيۆەرسيتەتتە وقىتۋشى جوقتىعىن، عىلىمي جەتەكشىلەردى جۇمىستان بوساتىپ، ولاردىڭ ورنىنا باسقا مامان بەكىتىلمەگەنىن، باسقا ج و و- عا اۋىسقىسى كەلگەن ستۋدەنتتەردىڭ قۇجاتتارى بەرىلمەگەنىن ايتىپ شاعىمداندى.

اۆتور: ايجان سەرىكجان قىزى

سوڭعى جاڭالىقتار