توقتار سەرىكوۆ: ءوزىن باي دەپ سىناعان جىگىتكە جاۋاپ بەردى
جەكە باسىنداعى جاعدايلار مەن بالا تاربيەسى، انشىلەردىڭ ونەردى قادىرلەمەۋى، قوعامداعى قازاق ءتىلىنىڭ جاي- كۇيى جايلى تولعاندى. توقتار سەرىكوۆ وسى سۇحباتتا ءوزىن ايىپتاعان جىگىتكە جاۋاپ بەردى.
بۇل تۋرالى قوس ءانشى جانار ايجانوۆامەن بولعان سۇحباتىندا ايتتى.
توقتار سەرىكوۆ اڭگىمەسىن ءوزىن ايىپتاعان جىگىتتەن باستادى. «توقتار باي» دەپ جەلىنى شۋلاتقان جازباعا ءانشىنىڭ ءوز ايتارى بار.
«كارانتين باستالعاندا بالا- شاعامدى الىپ تۋعان اۋىلىما كەتىپ قالدىم. ينتەرنەتكە دە، جەلىگە دە كىرگەن جوقپىن. سول كەزدە مەنى ايىپتاعان ءبىر جىگىت شىعىپتى. مەن ونى كەيىن وقىدىم. ءبىر سۇحباتىمدا كوزىمە جاس العانىم بار. ول كەزدە ءوز جەكە باسىمدى ەمەس، ەلگە قاتىستى ايتتىم. ەلىمىزدىڭ كەدەي ەكەنىن ايتتىم. قازىرگى ماسەلەلەردى ايتىپ، كوزىمە جاس الدىم. سونى كورگەن ءبىر قازاقتىڭ جىگىتى مەنى باي دەپ سوگىپتى. ونىڭ مىڭعىرعان مالى بار، قانشا كامازى بار، بيزنەسى بار، سونداي اقشا جاساپ وتىرىپ توقتار نەگە جىلاپ وتىر دەپتى. ول جىگىتكە اللا ريزا بولسىن. قۇداي سونداي كۇنگە جەتكىزسىن. ايتقانى كەلسىن دەپ تىلەيمىن. قازىر دوستارىم سول جازبادان سوڭ مەنى توقتارباي دەيتىن بولدى»، - دەدى ءانشى.
مەيرامبەك بەسبايەۆ قازىرگى جاستاردىڭ ونەردى تابىس كوزى سانايتىنىن ايتادى. ونەردى بىلمەي جاتىپ، سول ارقىلى اقشا تاپقىسى كەلەتىن جاستارعا سىن ايتتى.
«كەزىندە مۋزارتقا ماقسات بازاربايەۆتىڭ ورنىنا ءانشى ىزدەدىك. سوندا الماتىداعى بارلىق مەيرامحانالاردى ارالادىق. ىشىندە ۇناعان انشىلەرمەن سويلەسە باستاساق، اقشا تۋرالى سۇرايدى. ايلىعى قانشا بولادى دەپ باستايتىن. ول قانشا جىل بۇرىن. سوندا جاستاردىڭ ويىندا ءبىرىنشى اقشا تۇرادى. ءبىرىنشى ونەر تۇرمايدى. ونداي انشىلەردەن بىردەن باس تارتىپ وتىردىق. قازىر تىپتەن ارزانداپ كەتتى. ءبىر- ەكى ءان جازا سالا، تويعا شىعۋدى ويلايدى. تانىمال بولسام، سولاي اقشا تاپسام دەيدى»، دەدى بەسبايەۆ.
توقتار سەرىكوۆ قازىرگى اتا- انالاردىڭ بالاعا قازاقى تاربيە بەرمەيتىنىن ايتىپ ءوتتى.
«ءبارى ەمەس، ءبىراق اتا- انالارىڭ كوپشىلىگى بالالارىنا قازاقى تاربيە بەرمەيدى. ورىسشا مۋلفيلم كورەدى. ونى كورگەن بالا مىندەتتى تۇردە ورىسشا سويلەيدى. اعىلشىنشا سويلەيدى. مەن بالالارىمدى قازاق مەكتەپكە بەردىم. قازاق تىلىندەي سويلەسەمىز. ال، ورىس پەن اعىلشىندى وزدەرى- اق ۇيرەنىپ الدى. ەسەسىنە ماتەماتيكانى وقىتتىق. قازىرگى بالالار شەتەلدىك مۋلتفيلم كەيىپكەرلەرىنە ەلىكتەيدى. نەگە قابانبايعا ەلىكتەمەيدى، نەگە الپامىسقا ەلىكتەمەيدى. نەگە قازاق ەرتەگىلەرىنىڭ كەيىپكەرلەرىنە ۇقساعىسى كەلمەيدى. نەگە شرەكتى بىلەدى. سەبەبى ەشكىم وقىتپايدى. اتا- اناسى دا ۇيرەتپەيدى. تەلەديداردان كورگەنىن عانا بىلەدى. ءبىزدىڭ كورگەنىمىز باسقا ەدى. ءبىز باسقا كەيىپكەرلەرگە ۇقساعىمىز كەلەتىن»، - دەدى توقتار سەرىكوۆ.