بىزگە ابايدان اسقان اقىلشى جوق - قىرىمبەك كوشەربايەۆ
بۇل تۋرالى ق ر مەملەكەتتىك حاتشىسى قىرىمبەك كوشەربايەۆ الماتىدا دوستىق ۇيىندە ءوتىپ جاتقان پرەزيدەنت جولداۋىن تالقىلاۋ وتىرىسىندا ايتتى، دەپ حابارلايدى قازاقپارات ءتىلشىسى.
«ۇلتىمىز بەن جۇرتىمىزدىڭ جاڭا بولمىسىن قالىپتاستىرۋ ءۇشىن بىزگە ابايدان اسقان اقىلشى جوق. وسىناۋ مارتەبەلى مىندەت جولىندا ۇلى اقىن مۇراسىنا سۇيەنىپ ارەكەت جاساساق، بەرەكەت تاباتىنىمىز انىق. ءبىز ىزدەگەن بارلىق ساۋالدىڭ جاۋابى حاكىم ابايدىڭ ولمەس ولەڭىندە، ساليقالى سوزىندە تۇر. اباي اڭساعان قوعام - ويى وزىق، ساناسى سەرگەك «تولىق ادامنىڭ» تولىققاندى قوعامى. ءبىز اقىن مۇراسىنا جانە زيالىلار الەۋەتىنە سۇيەنىپ، وسىنداي قوعام ورناتۋىمىز كەرەك. ول قوعامنىڭ ۇلتتىق يدەياسى ءبىلىم مەن ىلىمگە جەتەلەيتىن تاۋەلسىز ەلدىڭ اعارتۋشىلىق ۇستانىمى بولۋعا ءتيىس. ۇلت بولمىسىن جاڭعىرتۋ بارىسىندا ابايدى تولعاندىرعان جاعىمسىز قاسيەتتەردەن ارىلۋىمىز كەرەك»، - دەدى ول.
مەملەكەتتىك حاتشى زيالى قاۋىمنىڭ جاڭا كەزەڭدەگى جاڭا ميسسياسى تۋرالى ايتىپ ءوتتى.
«قاي داۋىردە دە قازاق زيالىلارى ءوز قوعامىندا مارتەبەلى ميسسياسىن اتقارىپ كەلەدى. مىسالى، وتكەن عاسىردىڭ الپىسىنشى جىلدارىندا قالامگەرلەر ۇلتتىڭ رۋحىن كوتەردى. ۇلت جازۋشىلارى جىلىمىق كەزەڭدە (وتتەپەل) ەل مۇددەسىمەن وزەكتەس شىعارمالاردى ومىرگە اكەلدى. تاۋەلسىزدىكتىڭ العاشقى جىلدارىندا زيالىلار حالىقتى بەرەكە- بىرلىككە شاقىردى، ۇلتتىق قۇندىلىقتاردى تۇگەندەپ، تاريحىمىزدى جاڭعىرتۋعا ولشەۋسىز ۇلەس قوستى. جاڭا تاريحي كەزەڭدە قازاق زيالىلارىنىڭ ەندىگى مىندەتى - ۇلت بولمىسىنىڭ جاڭا قاعيداتتارىن قالىپتاستىرۋ، ۇلت ساپاسىن ارتتىرۋعا اتسالىسۋ. سىزدەر - قازاق زيالىلارى - ۇلتتىڭ ۇلى ماقساتىنا اداستىرماي اپاراتىن تەمىرقازىعى بولۋلارىڭىز كەرەك»، - دەدى قىرىمبەك كوشەربايەۆ.
ايتا كەتۋ كەرەك، الماتىدا مەملەكەتتىك حاتشى قىرىمبەك كوشەربايەۆتىڭ قاتىسۋىمەن زيالى قاۋىم وكىلدەرى پرەزيدەنت جولداۋىن تالقىلاپ جاتىر.