قانداسىمىز «قاراعايباستاۋىم» اتتى جىرلارىن وقىرماندارىنا تارتۋ ەتتى
شىنىمەن دە شىڭجاڭداعى قازاق ادەبيەتىنىڭ شوقتىعى بيىك تۇلعالارىنىڭ ءبىرتالايى وسى قاسيەتتى بۇلاق بويىندا تۋىپ-وسكەن.
بۇگىندە اتاجۇرتىنا كەلىپ، «قاراعايباستاۋىم» دەگەن اتپەن قالىڭ قاۋىمعا جىرلارىن تارتۋ ەتىپ جاتقان تولقىن اقان ۇلى دا سول ەلدىڭ تۋماسى.
جاقىندا نۇر-سۇلتانداعى جازۋشىلار ۇيىندە قازاقستان جازۋشىلار وداعىنىڭ مۇشەسى، اقىن، سازگەر تولقىن اقان ۇلىنىڭ «قاراعايباستاۋىم» اتتى كىتابىنىڭ تۇساۋكەسەرى ءوتتى. وسىعان دەيىن «ءۇمىت سىيلاعىم كەلەدى» ولەڭدەر جيناعى جارىق كورگەن اۆتوردىڭ نەگىزگى ماماندىعى - دارىگەر، مەديتسينا سالاسىندا 30 جىلدان استام ۋاقىت ەڭبەك ەتىپ كەلەدى. ادامنىڭ جانى مەن ءتانىن بىردەي ەمدەيمىن دەپ جۇرگەن شيپاگەردىڭ ەڭبەگىنە تۇساۋكەسەرگە جينالعان اعالارى دا جوعارى باعا بەردى.
وسى كىتاپقا العى ءسوز جازىپ، تۇساۋكەسەردە العاش ءسوز العان مەملەكەتتىك سىيلىقتىڭ يەگەرى، اقىن نەسىپبەك ايت ۇلى جيناقتا تۋعان جەرگە ساعىنىش پەن وتانعا دەگەن سۇيىسپەنشىلىكتىڭ ادەمى ورنەكتەلگەنىن ايتتى.
«اقىندىقتى وقىمايدى، اقىندىق وقىتىلمايدى. قاراعايباستاۋدان قانشاما الىپتار شىققان. ول - اق ولەڭدى اكەلگەن ومارعازى ايتان ۇلى، اقىن جاركەن بودەش ۇلى. تۋعان ولكە، ەلدىڭ، جەردىڭ، قازاقتىڭ بولىنگەنىنىڭ قاسىرەتىن تارتىپ، ساعىنىشتىڭ نە ەكەنىن كوكىرەگىندە شىمىرلاتىپ، قايناتىپ جۇرگەن جىگىتتىڭ ءبىرى - وسى تولقىن. سونىڭ ءبارى ولەڭ بولىپ شىققان بولۋ كەرەك. ينە، دارىڭمەن سىرقاتتاردى ەمدەسەڭ، ولەڭدەرىڭمەن اۋىرعان جۇرەكتەردى، ساعىنعان، اڭساعان، قاڭىراعان كوڭىلدەردى ەمدەي بەر»، دەدى اقىن.
سازگەرلىك قىرىنان دا تانىلعان تولقىن اقان ۇلىنىڭ 30 عا تارتا ءانى بار. ونىڭ ولەڭىنە جازىلعان اندەردىڭ ۇزىن سانى دا 100 دەن اسادى. كوبىن نۇرلان ونەربايەۆ، ماقپال ءجۇنىسوۆا قاتارلى ونەر جۇلدىزدارى ورىنداپ ءجۇر. تۇساۋكەسەرگە ارنايى ات باسىن بۇرعان ءانشى نۇرلان ونەربايەۆ تا اقجارما تىلەگىن ايتىپ، اعىنان جارىلدى.
«تولقىنمەن وسىدان ەكى جىل بۇرىن شىعارماشىلىق كەشىمە دايىندالىپ جاتقاندا ستۋديادا كەزدەسىپ، سۇحباتتاستىم. كوكەيدە جۇرگەن وي-تولعامىمدى انمەن ءورىلىپ ايتىلسا دەگەن ءوتىنىشىمدى ءبىلدىردىم، اراعا 2-3 كۇن سالىپ «ونەرىم - ءومىرىم» دەگەن ولەڭ جازىپ الىپ كەلىپ، قولىما تاپسىردى. جاڭا ءان سول كونسەرتتە ورىندالدى، قازىر رەپەرتۋارىمداعى ورتان بەل اندەردىڭ ءبىرى. سول كەزدە مەن تولقىندى ونەرگە جاقىن، جاناشىر، ولەڭگە قالام تارتىپ جۇرگەن ازامات رەتىندە تانىسام، دارىگەرلىگىن كەيىن ءبىلدىم. ءبىلدىم دە قايران قالدىم. اللانىڭ ونىڭ بويىنا دارىتقان ەكى قاسيەتى دە شيپاگەرلىك دەپ ايتار ەدىم. بىرەۋى ولەڭدەرىمەن ادامنىڭ جانىن ەمدەيتىندىگى بولسا، ەكىنشىسى - ادامنىڭ ءتانىن ەمدەيتىنى. جاقىندا سىرقاتتانعان كەزدە دە تولقىن باۋىرىمىزعا جۇگىنىپ ەدىك، اينالدىرعان ءبىر جۇمانىڭ ىشىندە اياقتان تۇرعىزدى»، دەدى ول.
كەش بارىسىندا «جىگىتكە جەتى ونەر دە از» دەگەن ءسوز وسى تولقىن اعامىزعا قاراتا ايتىلعانداي كورىندى. سونداي-اق اعالارى القاعان ازاماتتىڭ جاڭا جىر جيناعىمەن قوسا، ەمشىلىك ونەردىڭ قىرى مەن سىرى باياندالعان «ەمشى كادەسى» اتتى ەڭبەگى دە وقىرمانعا جول تارتىپ جاتقانىنا كۋا بولدىق.
egemen.kz