قىتايداعى قانداسىمىز گيننەستىڭ رەكوردتار كىتابىنا ەندى - شەتەلدەگى قازاق ءتىلدى ب ا ق- قا شولۋ

نۇر-سۇلتان. قازاقپارات- «قازاقپارات» ح ا ا ادەتتەگىدەي شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

ۋحاندا قارا جورعا بيلەگەن باھارگۇل ەندى ەرىكتىلەر توبىندا - قىتايدىڭ «ورتالىق حالىق راديوسى» (CNR)

بيىل جىل باسىندا ىندەت تارالعان كەزدە ۋحان قالاسىنا كومەككە بارىپ، فاڭساڭ ەمحاناسىندا قاراجورعا بيلەگەن ۇرىمجىلىك باھارگۇل تولقىن قىزى وسى جولى ءوز قالاسىندا ىندەت تارالعاندا ەرىكتىلەر قاتارىنا قوسىلدى، دەپ جازادى قىتايلىق CNR.

اتالعان اقپارات كوزىنىڭ دەرەگىنە سۇيەنسەك، باھارگۇل تولقىن قىزى شىنجاڭ ۇيعۇر اۆتونوميالى ولكەلىك ۇيعۇر ەمشىلىگى ەمحاناسىنىڭ قىزمەتكەرى، سونداي-اق ول ءوزى تۇراتىن اۋماقتاعى ەرىكتىلەر توبىنىڭ بەلسەندى مۇشەسى. وسى جولى ۇرىمجىدەگى كارانتين كەزىندە، ول ءوز جۇمىس ورنىنىڭ تاپسىرماسى بويىنشا ۇيدە قىزمەت ىستەيدى. سونداي-اق، ۆولونتەرلەر قاتارىندا كارانتيندەگى تۇرعىنداردىڭ قاجەتتى زاتتارىن جەتكىزىپ بەرۋمەن اينالىسقان. ادامداردىڭ دەنە تەمپەراتۋراسىن ولشەۋ، ءۇي اۋلالارىن تازالاۋ، دەزينفەكسيالاۋ قاتارلى جۇمىستاردى ىستەپ، حالىققا پايداسىن تيگىزگەن.

«ول اۋرۋحاناداعى جانساقتاۋ بولىمدە جاتقان ءبىر قارياعا قان كەرەك بولعانىن ەستيدى. ۆولونتەر باھارگۇل ناۋقاستانعان قارتتىڭ وتباسىنداعىلارمەن حابارلاسىپ، ءوزىنىڭ 2013 -جىلدان بەرى اقىسىز قان بەرىپ كەلە جاتقانىن، ەگەر قاجەت بولسا كومەك قولىن سوزاتىنىن ايتادى. ءسويتىپ، ول ءوزى تۇراتىن شاعىن اۋداننىڭ باسشىلارىنا حابارلاسىپ، سولاردىڭ كومەگىمەن اۆتوكولىك دايىنداپ، ناۋقاستى ءوز ەمحاناسىنا جەتكىزەدى. تولىقتاي تەكسەرۋدەن كەيىن، ەرىكتى تۇردە اقىسىز قان بەردى. جاس دارىگەر باھارگۇل وسىنداي يگى ىستەرىمەن اينالاسىنداعى ادامدارعا ۇلگى بولۋدا...» دەپ جازادى قىتايلىق ب ا ق.

شۋمەر جازۋى بار 3 مىڭ 400 جىلدىق تاقتايشا تابىلدى - TRT

تۇركيانىڭ حاتاي پروۆينسياسىنداعى رەيحانلى اۋدانىنداعى اشانا قورعانىندا بايىرعى الالاح قالاسىندا جۇرگىزىلگەن ارحەولوگيالىق قازبادا مولشەرمەن 3 مىڭ 400 جىلدىق تاريحى بار تاقتايشا تابىلدى، دەپ حابارلايدى تۇركيا راديو تەلەۆيزيا پورتالى.

شۋمەر جازۋى (سىنا جازۋى) جازىلعان تاقتايشادا پاديشاعا جاسالعان تولەمنىڭ ءتىزىمى بولعانى انىقتالعان. قازبا دەلەگاتسياسىنىڭ ءتوراعاسى جانە حاتاي مۇستافا كەمال ۋنيۆەرسيتەتى ارحەولوگيا كافەدراسىنىڭ ءمۇعالىمى دوتسەنت دوكتور مۇرات اكار قازبا جۇمىستارىندا ماڭىزدى مۇرالار تابىلعانىن ايتقان. تۇركيالىق باق- تىڭ دەرەگىنشە، بۇرىنعى الالاح قالاسىنىڭ تاريحتاعى اميك جازىعىنا ورنالاسقان ايماقتىق مۋسش پاتشالىعىنىڭ استاناسى بولعان. زەرتتەۋشىلەر 20 جىلدان بەرى ارحەولوگيالىق زەرتتەۋمەن ايماقتىڭ قولا ءداۋىرى كەزەڭىندەگى داستۇرلەرى مەن مادەنيەتتەرىن جانە الەۋمەتتىك قۇرىلىمىن انىقتاۋعا كۇش سالعان.

«دوكتور مۇرات اكاردىڭ ايتۋىنشا، قورعانداعى قازبالاردان تابىلعان شۋمەر جازۋلى تاقتايشا وتە ماڭىزدى تاريحي مۇرا بولىپ ەسەپتەلەدى. قولا ءداۋىرى ىشىندە شۋمەر جازۋى جازىلعان ماتىندەرگە كەزدەسۋ وڭاي ەمەس. سوندىقتان بۇل مۇراعاتتىڭ قۇنى جوعارى. مۇرات اكار تاقتايشا بەتىندەگى جازۋلار ءالى دە زەرتتەلۋ ۇستىندە ەكەندىگىن ايتتى...»، دەپ تۇيىندەيدى TRT.

يراندا كوروناۆيرۋستى جىلدام انىقتايتىن قۇرالدىڭ تۇساۋكەسەر ءراسىمى ءوتتى - «فارس» اقپارات اگەنتتىگى

تەھران ۋنيۆەرسيتەتىنىڭ زەرتتەۋشىلەرى ناۋقاستىڭ قاقىرىعىنان ونىڭ COVID-19-قا شالدىققان- شالدىقپاعانىن انىقتايتىن قۇرال جاساپ شىعاردى، دەپ حابارلايدى «فارس» اقپارات اگەنتتىگى. تەھران ۋنيۆەرسيتەتىنىڭ كومپيۋتەر جانە ەلەكتر ينجەنەرياسى فاكۋلتەتىنىڭ نانوبيوەلەكترونيكالىق قۇرالدار زەرتحاناسىنىڭ زەرتتەۋشىسى مۇحامماد ابدۋلاحاد وسى عىلىمي جەتىستىكتى تانىستىرۋ راسىمىندە اتالمىش قۇرالدى تولىقتاي تانىستىرعان.

«كوروناۆيرۋسقا شالدىققان ادامداردا اۋرۋدىڭ بەلگىلەرى بايقالماعان كۇننىڭ وزىندە قاقىرىعىنداعى بەلسەندى وتتەگى تۇرلەرىنىڭ دەڭگەيى وزگەرەدى. بۇل سەزگىش قۇرال وسى كورسەتكىشتى پايدالانىپ، اۋرۋدىڭ بار-جوعىن انىقتايدى. بۇل جوبا كوممەرتسيالانۋ كەزەڭىن باستان وتكەرىپ جاتىر. ءقازىر جاپپاي ءوندىرۋ ساتىسىنا جەتتى. وسى كۇنگە دەيىن بۇل قۇرالدىڭ جۇمىسى تەھراننىڭ بىرنەشە اۋرۋحاناسىنداعى 600 دەن اسا ناۋقاسقا تەكسەرىلىپ، وڭ ناتيجە بەردى»، - دەيدى مۇحامماد ابدۋلاحاد.

يراندىق ب ا ق-تىڭ دەرەگىنە سۇيەنسەك، اتالمىش قۇرال تەك COVID-19-دى انىقتاپ قويمايدى، باسقا دا تىنىس جولدارى اۋرۋلارىن انىقتاۋعا دا پايدالانۋعا بولادى.

موڭعولياعا جەكە ىستەرىمەن كەلىپ، قالىپ قالعان ق ر- نىڭ ازاماتتارى نازارىنا - Kaznews

موڭعولياداعى Kaznews اقپاراتتىق پورتالىندا وسىنداي تاقىرىپتاعى اقپارات اپتا باسىندا جارىق كوردى.

«قۇرمەتتى وتانداستار! موڭعوليانىڭ توتەنشە جاعدايلار جونىندەگى كوميسسياسىنىڭ شەشىمىنە سايكەس، 2020 -جىلعى 30-تامىزدا ۋلاانبااتار - نۇر-سۇلتان باعىتى بويىنشا ۇشاق تاڭەرتەڭگى ساعات 8.00 دە «شىڭعىس حان» اۋەجايىنان ۇشادى. وسىعان وراي، COVID-19 پاندەمياسى ۋاقىتىندا موڭعولياعا جەكە ىستەرىمەن كەلىپ، قالىپ قالعان نەمەسە ەڭبەك- شارتى نەگىزىندە جۇمىس ىستەيتىن تەك قازاقستان رەسپۋبليكاسىنىڭ ازاماتتارىنا ۋلاانبااتار - نۇر-سۇلتان باعىتى بويىنشا ۇشاققا وتىرۋ مۇمكىندىكتەرى بار ەكەنىنە نازار اۋدارامىز. وسى مۇمكىندىكتى جىبەرىپ الماۋدى ەسكە سالامىز. وسى سەبەپتى، اتالعان ۇشاقپەن تەك قازاقستان رەسپۋبليكاسى ازاماتتارىنىڭ ەلگە قايتۋ ماسەلەسىنە قاتىستى تۋىنداعان سۇراقتار بويىنشا ۋلاانبااتار قالاسىندا ورنالاسقان قازاقستان رەسپۋبليكاسىنىڭ ەلشىلىگىنە حابارلاسۋدى سۇرايمىز. بايلانىس تەلەفونى: 97611345408+. قۇرمەتپەن، قازاقستان ەلشىلىگى»، دەپ جازدى موڭعوليالىق ب ا ق.

تاشكەنتتەگى تەست سىناقتارىنا ارنالعان ورىندىقتار جاۋىن استىندا قالدى - «ءوزا» اقپاراتتىق اگەنتتى

وزبەكستاندا 2020-2021 جاڭا وقۋ جىلىنا ج و و-عا ءتۇسۋ ەمتيحاندارى اشىق الاڭداردا وتكىزىلۋى جوسپارلانعان ەدى. سوعان بايلانىستى قىزۋ قايىندىق باستالعان ەدى، دەپ حابارلايدى uza.uz. «تابيعاتتىڭ توسىن مىنەزىنەن تاشكەنتتەگى تەست سىناقتارىنا ارنالعان ورىندىقتار مەن پارتالار جاۋىن استىندا قالدى. جاۋعان جاڭبىردىڭ سالدارىنان تەست سىناقتارىنا ارنايى دايىندالعان «اشحابارد« كوڭىلاشار پاركى مەن «بوتانيكا» ساياباعى اۋماعىنداعى پارتا ورىندىقتار جاۋىننا قورعاۋ ماقساتىندا ءۇستى پاكەتپەن جابىلۋدا» دەپ جازادى وزبەكستاندىق ب ا ق.

قانداسىمىز گيننەستىڭ رەكوردتار كىتابىنا ەندى - قىتايدىڭ «ورتالىق حالىق راديوسى» (CNR)

قىتايدىڭ شيحۋ قالاسىنىڭ تۇرعىنى گۇلزار دالەلحان قىزى مارجاننان توقىعان قولونەرلىك بۇيىمى ارقىلى الەم رەكوردىن جاڭارتتى، دەپ حابارلايدى قىتايدىڭ «ورتالىق حالىق راديوسى».

زەينەتكە شىققان گۇلزار ۋاقىتىن بوس وتكىزبەۋ ءۇشىن قولونەرمەن اينالىسا باستاعان.

ول 2018 -جىلى قىتاي استاناسى بەيجىڭدەگى تيانانمەن الاڭىنىڭ مودەلىن مارجاننان جاساۋدى قولعا الادى. قىتايلىق ب ا ق-تىڭ دەرەگىنشە، گۇلزار دالەلحان قىزى 50 مىڭ دانا ءتۇسى ءارتۇرلى مارجاندى ساتىپ الادى. ونىڭ ىشىنەن ءتۇسى، كولەمى ۇقسامايتىن 10 مىڭ مارجان تاڭداپ الىپ، توقۋعا كىرىسەدى.

ۇزىندىعى 2.15 مەتر، كەڭدىگى 1.2 مەتر، بيىكتىگى 1.2 مەتر كەلەتىن، جيىنى 600 مىڭ دانا، سالماعى 100 كيلودان اساتىن مارجاننان ەكى جىل ۋاقىت جۇمساپ، ءوزى ويىنا العان جۇمىسىن ءساتتى اياقتاعان.

«شيحۋ قالاسىنىڭ تۇرعىنى گۇلزار دالەلحان قىزى مەرۋەرتتەي جالتىلداعان مارجاننان توقىعان «تيانانمەن مودەلى» دەپ اتالعان قولونەرلىك جۇمىسى دۇنيە جۇزىلىك رەكوردىن كۋالاندىرۋ مەكەمەسى (WRCA) جاعىنان تەكسەرۋدەن ءوتىپ، «دۇنيە جۇزىندەگى ەڭ ۇلكەن مەرۋەرت مودەلى» رەتىندە بەكىتىلگەن» دەپ جازادى kazakcnr.com.

ءسويتىپ، گيننەستىڭ رەكوردتار كىتابىنا ەنۋدى جوسپارلاعان قانداسىمىز ارمانىنا جەتەدى. گيننەستىڭ رەكوردىن جاڭارتقانى تۋرالى اقپارات رەسمي راستالىپ، سەرتيفيكات گۇلزار دالەلحان قىزىنىڭ قولىنا تابىستالعان.

اۆتور: بەيسەن سۇلتان