تۇركىستان وبلىسىندا اباي اتىنداعى ساياباق اشىلدى

سوزاق. قازاقپارات - تۇركىستان وبلىسى سوزاق اۋدانى شولاققورعان اۋىلىندا كونستيتۋتسيا كۇنى قارساڭىندا ەكى بىردەي ساياباق اشىلدى. دەمالىس ورنىنىڭ بىرىنە قازاقتىڭ ۇلى اقىنى، اعارتۋشى، عۇلاما ويشىل ابايدىڭ ەسىمى بەرىلدى.

ساياباقتا ۇلى اقىننىڭ ءمۇسىنى بەينەلەنگەن ءزاۋلىم ەسكەرتكىشى ورناتىلعان، دەپ حابارلايدى قازاقپارات وبلىس اكىمىنىڭ باسپا ءسوز قىزمەتىنە سىلتەمە جاساپ.

ساياباقتىڭ جالپى اۋماعى - 2 گەكتار. وندا قازىردىڭ وزىندە 400 ءتۇپ تال ەگىلىپ، اينالاسى اباتتاندىرىلعان. ءتۇرلى- ءتۇستى شامدار ورناتىلىپ، اياق جولدار توسەلگەن. الداعى ۋاقىتتا جەرگىلىكتى تۇرعىنداردىڭ جانعا سايا تاباتىن سۇيىكتى دەمالىس ورنى بولماق. جاڭا دەمالىس ورنىنىڭ سالتاناتتى اشىلۋىنا اۋدان اكىمى سالىحان پولاتوۆ، اۋداندىق ارداگەرلەر كەڭەسىنىڭ ءتوراعاسى قابىلبەك ەسپەنبەتوۆ قاتىسىپ، جۇرتشىلىقتى كونستيتۋتسيا كۇنىمەن قۇتتىقتادى.

«بيىل ۇلى اقىن ابايدىڭ تۋعانىنا 175 جىل تولىپ وتىر. مەملەكەت باسشىسى قاسىم- جومارت توقايەۆتىڭ باستاماسىمەن 10 تامىز اباي كۇنى بولىپ بەلگىلەندى. بۇل اقىنعا كورسەتىلگەن ۇلكەن قۇرمەت. بىزدە تۋعان جەر توسىنەن ءسانى مەن سالتاناتى كەلىسكەن ەكى بىردەي جاڭا دەمالىس ورنىن اشىپ وتىرمىز. بۇل جەر حالىقتىڭ كوڭىل كوتەرىپ، بالالاردىڭ وينايتىن سۇيىكتى ورىنعا اينالادى. بارشاڭىزدى كەلە جاتقان كونستيتۋتسيا كۇنىمەن قۇتتىقتايمىن» ، - دەدى اۋدان اكىمى.

ەكىنشى اشىلعان ساياباق «تەرىسكەي» دەپ اتالادى. ەل يگىلىگىنە پايدالانۋعا بەرىلگەن دەمالىس ورنىنىڭ اۋماعىندا 1000 ءتۇپ تال ەگىلگەن. جالپى اۋماعى - 4 گەكتار. ساياباق ىشىندەگى بۇلاق ۇستىندە كوپىر سالىنىپ، جاياۋ جۇرگىنشى جولى توسەلگەن. كوپشىلىككە ارناپ سوعىلعان توبەسى جابىق ساكىلەر دە ساياباققا كورىك بەرىپ تۇر. الداعى ۋاقىتتا مۇندا كوپجىلدىق گۇلدەر ەگىلىپ، بالالار ويىن الاڭشاسى مەن اتتراكتسيوندار اشىلادى دەپ جوسپارلانىپ وتىر.