توي، مەرەكەلەر تۋرالى حابارلاعاندار سىياقى الاتىن بولدى

ورال. قازاقپارات - باتىس قازاقستان وبلىسىندا كارانتيندىك شەكتەۋ شارالارىن بۇزعاندار تۋرالى حابارلاعان ازاماتتار سىياقى الادى، دەپ حابارلايدى قازاقپارات ءتىلشىسى.

ب ق و اكىمىنىڭ باسپا ءسوز قىزمەتىنەن ءمالىم ەتكەنىندەي، بۇل تۋرالى قوعامدىق ءتارتىپتى ساقتاۋعا قاتىساتىن ازاماتتاردى ىنتالاندىرۋ ماسەلەلەرىن قاراۋ جونىندەگى وبلىستىق كوميسسيانىڭ وتىرىسىندا شەشىلدى.

بانكەت، ۇيلەنۋ تويى، سالتاناتتى، وتباسىلىق، ەسكە الۋ، سالت-جورالىق جانە باسقا دا بۇقارالىق (سونىڭ ىشىندە ۇيدە وتەتىن) ءىس-شارالار تۋرالى حابارلاعان ازاماتتارعا 20 مىڭ تەڭگە كولەمىندە اقشالاي سىياقى بەرىلەدى.

اتالمىش شەشىم «قوعامدىق ءتارتىپتى قامتاماسىز ەتۋگە ازاماتتاردىڭ قاتىسۋى تۋرالى» زاڭىنىڭ 8-بابى 3-تارماعىنا سايكەس ءبىراۋىزدان قابىلداندى. ەگەر كەز كەلگەن تۇرعىن كوپشىلىكتىڭ قاتىسۋىمەن ءوتىپ جاتقان شارانى بايقاسا، دەرەۋ 102 نەمەسە 112 نومىرلەرى ارقىلى قۇزىرلى ورگاندارعا حابارلاسا الادى.

وقيعا ورنىنا پوليتسيا مەن سانيتارلىق-ەپيدەميولوگيالىق قىزمەتكەرلەرىنەن قۇرىلعان ارنايى مونيتورينگ توبى كەلىپ، قۇقىق بۇزۋشىلىق دەرەگىن تىركەيدى. ەگەر ول دەرەك راستالسا، سول ازاماتقا سىياقى تولەۋ ماسەلەسى كوميسسيادا قارالىپ، شەشىلەتىن بولادى.

ىندەتتى بىرلەسىپ قانا جەڭۋگە بولادى. بۇل شارا دا شەكتەۋ شارالارىنىڭ بۇزىلۋىنا توسقاۋىل قويۋعا سەپتەسەرى انىق.