ەشبىر اۋدارما ابايدىڭ نە ايتقىسى كەلەتىنىن جەتكىزە المايدى - ق ح ا مۇشەسى

نۇر- سۇلتان. قازاقپارات - نۇر- سۇلتان قالاسى وزبەك ەتنومادەني ورتالىعىنىڭ ءتوراعاسى، قازاقستان حالقى اسسامبلەياسىنىڭ مۇشەسى شەرزور پۋلاتوۆ اباي تۋرالى كىتاپتىڭ تۇساۋكەسەرىندە ۇلى ويشىلدىڭ تۋىندىلارى تۋرالى پىكىر ءبىلدىردى، دەپ حابارلايدى قازاقپارات ءتىلشىسى.

«ۇلى ابايدىڭ 175 جىلدىعىن اتاپ وتىرعان ءبىز ونىڭ ەڭبەكتەرىن قازاق ادەبيەتىنە عانا ەمەس، الەم ادەبيەتىنە قوسقان ۇلەسى ءۇشىن قۇرمەت تۇتامىز. ابايدىڭ ولەڭدەرى كەز كەلگەن ادامنىڭ جۇرەگىنە جول تارتادى. شىن مانىندە ۇلى ويشىلدىڭ شىعارمالارىمەن تانىسا وتىرىپ ءوز جانىمىزدى تۇسىنە باستايمىز. اباي بۇكىل عۇمىرىن ادىلدىك، ىزگىلىك ىزدەۋگە ارنادى.

«ادامزاتتىڭ ءبارىن ءسۇي باۋىرىم دەپ». بۇل - ەرەكشە كۇش بەرەتىن، تەرەڭ ماعىنالى ءسوز. مەن ونىڭ وسى ۇستانىمىن ءوز ومىرىمدە قولدانامىن»، - دەيدى شەرزور پۋلاتوۆ.

ونىڭ ايتۋىنشا، ق ر پرەزيدەنتى قاسىم- جومارت توقايەۆ « 19 - عاسىرداعى اباي جانە قازاقستان» اتتى ماقالاسىندا قازاق حالقىنىڭ الدىندا ۇلى ابايدىڭ ەڭبەكتەرىن زەردەلەپ، ءوزىن ءوزى تانىپ جانە قازاق حالقىنىڭ قۇندىلىقتارىن الەمدىك مادەنيەتكە تانىتۋ مىندەتى تۇرعانىن ايتقان.

«اباي ءوز تۋىندىلارى ارقىلى ءتۇرلى سالاداعى كەمشىلىكتەرگە توقتالىپ وتەدى. بۇل - قازاق حالقىنا عانا ەمەس، ادامزاتقا ءتان نارسە بولىپ قالا بەرەدى. قازاق ادەبيەتىنىڭ نەگىزىن قالاۋشى تۇركى حالىقتارىنىڭ تىلدەرىن زەرتتەۋدى جاقسى كورگەنىن اتاپ وتكەن ءجون. ەشبىر اۋدارما ويشىلدىڭ نە ايتقىسى كەلگەنىن تولىق جەتكىزە المايدى. بۇگىن تۇساۋى كەسىلەتىن كىتاپ - وتە مازمۇندى جانە جوعارى باعا بەرۋگە بولاتىن تۋىندى. كىتاپتى شىعارۋعا اتسالىسقانداردىڭ بارىنە العىس ايتامىن»، - دەيدى ول.

ەسكە سالا كەتسەك، بۇگىن Facebook-تەگى قازاقستان حالقى اسسامبلەياسىنىڭ پاراقشاسىندا اباي تۋرالى «الەمدى ايالاعان ءسوز» اتتى كىتاپتىڭ تۇساۋكەسەرى بولدى.

اۆتور: زارينا قاھارمان