قوستانايدا جازبا اقىنداردىڭ رەسپۋبليكالىق ايتىسى ءوتتى
وسىدان ءۇش جىل بۇرىن «رۋحاني جاڭعىرۋ» باعدارلاماسى اياسىندا وبلىستىق «قوستاناي تاڭى» گازەتى مەن وبلىستىڭ ىشكى ساياسات باسقارماسى بىرلەسىپ قولعا العان ءداستۇرلى جوبا بيىل اقپان ايىنىڭ اياعىندا باستالىپ، تامىز ايىنا دەيىن جالعاستى.
جىر سايىسىنا قوستاناي، الماتى، قاراعاندى، اتىراۋ وبلىستارىنان جانە نۇر-سۇلتان قالاسىنان ۇزىن سانى 18 اقىن قاتىسىپ، التى اي بويى سىنعا ءتۇستى.
«بۇل جولعى ايتىسقا قازاق حالقىنىڭ باس اقىنى، ۇلى ويشىل اباي قۇنانبايەۆتىڭ 175 جىلدىعى ارقاۋ بولدى. جالپى، جوبا باستالعالى جازبا ايتىستا باعى مەن بابىن سىناۋعا 50 شاقتى ۇمىتكەر نيەت بىلدىرگەن.
ولاردىڭ ىشىندە تاجىريبەلى ورتا جاستاعى اقىندارمەن قوسا، ستۋدەنت جاستار، ءتىپتى تالاپتى وقۋشىلار دا بايگەگە قوسىلدى. بۇل دا شىن دارىننىڭ جاس تالعامايتىنىنا ايقىن دالەل بولسا كەرەك.
ءداستۇرلى جوبانىڭ جاڭا ماۋسىمىندا اقىندارىمىز ناعىز دارىن ەكەندەرىن تاعى دا دالەلدەپ، جىرسۇيەر جۇرتقا تاماشا تارتۋ جاساي الدى. جوبا بارىسىندا بويلارىنا تابيعات بەرگەن ەرەك قابىلەتتەرىن عانا ەمەس، ۇلتتىق تەرەڭ تانىم، جان-جاقتى بىلىمدەرىن كورسەتىپ، الىپ ابايدىڭ رۋحاني مۇراسىن زەردەلەپ، ورنەكتەپ ولەڭمەن ورە ءبىلدى.
ودان بولەك، الەمدى جاۋلاعان زاۋالعا، قازىرگى قوعامداعى وزەكتى ماسەلەلەرگە قاتىستى وزىندىك پىكىرلەرگە، ازاماتتىق ۇستانىمدارعا كۋا بولا الدىق. اقىندارىمىزدىڭ قالامدارىنان تۋعان جولدارعا ەلدىك مۇرات- مۇددە، وتانعا دەگەن سۇيىسپەنشىلىك، ىنتىماق- بىرلىك سىندى قۇندىلىقتار ارقاۋ بولعانىن دا اڭعارۋ قيىن ەمەس.
سوندىقتان ءسوز ونەرى سايىسىنا مەيلىنشە جاۋاپكەرشىلىكپەن قاراپ، جان سالىپ ۇلەس قوسقاندارى ءۇشىن، وقىرمانداردى جىرمەن سۋسىنداتىپ، جازبا ايتىستىڭ كورىگىن قىزدىرعان اقىنداردىڭ بارلىعىنا ايتار العىسىمىز شەكسىز»، - دەدى وبلىستىق ىشكى ساياسات باسقارماسىنىڭ باسشىسى زاۋرە بايمەنوۆا.
اقىندار التى اي بويى ينتەرنەت ارقىلى الامانعا ءتۇستى. ارالارىنان ۇزدىكتەرى ىرىكتەلىپ، شىن جۇيرىكتەرى العا سۋىرىلىپ شىقتى. ءبىر ايتا كەتەرلىگى، بيىل پاندەميا جاعدايىنا، كارانتيندىك شەكتەۋ شارالارىنا بايلانىستى، جىلداعىداي جۇلدەگەرلەردى ماراپاتتاۋ ءراسىمى وتكەن جوق.
«جەڭىمپازدار ەسىمى گازەت جانە رەسمي سايت ارقىلى جاريا ەتىلىپ وتىر. جالپى ۇمىتكەرلەردىڭ قاي-قايسىسى دا قال-قادىرلەرىنشە حاكىم ابايدىڭ رۋحاني باي مۇراسىنان سىر شەرتىپ، جاۋھار سوزدەرىن ۇلگى ەتىپ ۇگىتتەدى، الىپ اقىننىڭ ارمان- مۇراتى مەن قازاقتىڭ بۇگىنگى بەت- بەينەسىن استاستىرۋعا ۇمتىلدى. قالامگەر ايتىسكەرلەر تاقىرىپقا دەندەپ قانا قويماي، بۇگىنگى قوعامنىڭ «اياق الىسى، جۇرەك قاعىسىن» اڭداپ، ەلدىڭ مۇڭى مەن مۇقتاجىن تۇگەندەدى، وزەكتى ماسەلەلەردى تولعادى.
ەلدىك، ۇلتتىق، رۋحاني قۇندىلىقتاردى قالامىنا ارقاۋ ەتىپ، جازبا ايتىستىڭ تابيعاتىن جان-جاقتى اشا ءبىلدى.
ايتا كەتەيىك، ءۇش جىل بويى وتكەن جىر سايىستارى بيىل جەكە جيناق بولىپ شىقتى.
«جازبا ايتىس - جىر-جاۋھار» اتتى ەتجەڭدى كىتاپقا ۇزدىك ايتىستار ەنگىزىلىپ، قالىڭ وقىرمانعا جول تارتىپ وتىر»، - دەيدى «جازبا ايتىس» جوباسىنىڭ ۇيلەستىرۋشىسى، بەلگىلى اقىن جاندوس جۇسىپبەك.
اقىنداردى جۇپتاپ، ولاردىڭ ايتىستارىن سىن-ساراپتان قازىلار القاسى وتكىزىپ وتىردى. جىر باسەكەسىنە قازاقستان جازۋشىلار وداعىنىڭ قوستانايداعى فيليالى ءتوراعاسى، ادەبيەت سىنشىسى جانۇزاق ايازبەكوۆ، «Egemen Qazaqstan» گازەتىنىڭ قوستاناي وبلىسىنداعى مەنشىكتى ءتىلشىسى نۇرقانات قۇلابايەۆ، «قوستاناي» تەلەارناسى ديرەكتورىنىڭ ورىنباسارى ابىلاي ماۋدانوۆ تورەلىك جاسادى. قازىلار القاسىنىڭ شەشىمىمەن ارقالىقتىق اقىن باتىرلان ساعىنتايەۆ جازبا ايتىستىڭ جەڭىمپازى اتاندى. 2-ورىن ەلوردالىق ۇلانبەك باقىتقا بۇيىرسا، 3-ورىندى نۇر-سۇلتان قالاسىنىڭ اقىنى نۇرداۋلەت عالىمجان ۇلى مەن جانگەلدين اۋدانىنىڭ اقىنى زليحا كەنجەعوزينا ءوزارا ءبولىسىپ الدى.