قازاقستاندىق جاس سۋرەتشى ا ق ش- تاعى حالىقارالىق بايقاۋدىڭ ەكىنشى كەزەڭىنە ءوتتى
وسى ورايدا ا ق ش استاناسى ۆاشينگتوندا وتەتىن بايقاۋعا قاتىسۋ مۇمكىندىگىن العان جاس ونەرپاز قازاقپارات تىلشىسىنە سۇحبات بەردى.
«سۋرەت سالۋ ونەرىمەن 7 جىل بويى اينالىسىپ كەلەمىن. تاراز قالاسىنداعى كوركەمونەر مەكتەبىن ۇزدىك ءتامامدادىم. قازىر نازاربايەۆ زياتكەرلىك مەكتەبىندە وقيمىن. بۇعان دەيىن كوركەمونەر مەكتەبىندە ءبىلىم الىپ جۇرگەندە سۋرەت سالۋدان ءتۇرلى دەڭگەيدەگى قالالىق، وبلىستىق جانە رەسپۋبليكالىق سايىستارعا قاتىسىپ جەڭىمپاز اتاندىم. بۇگىندە سۋرەت سالۋ مەنىڭ ەڭ سۇيىكتى ءىسىم. جەتەكشىم بەرگەن ءبىلىم مەن قولداۋدىڭ ارقاسىندا ەندىگى ۋاقىتتا حالىقارالىق دەڭگەيدەگى بايقاۋلاردا دا باق سىناي باستادىم. جۋىردا ا ق ش- تا وتەتىن ونەر وليمپياداسىنا (Art olimpiad) قاتىسۋعا شاقىرتۋ الدىم»، - دەدى س. قاينار قىزى.
ونىڭ ايتۋىنشا، بايقاۋدىڭ العاشقى كەزەڭى ونلاين تۇردە وتكەن.
«ءبىرىنشى كەزەڭدە اۆتورلىق جۇمىسىمىزدىڭ ءتۇپ نۇسقاسىن جىبەردىك. كوپ ۇزاماي ءسىز ەكىنشى كەزەڭگە ءوتتىڭىز دەگەن حات الدىم. ەندى شەشۋشى كەزەڭ ا ق ش استاناسى ۆاشينگتون قالاسىندا وتەدى جانە وعان 50 دەن استام ەلدەن جاس ونەرپازدار قاتىسادى. وندا بەلگىلى ءبىر تاقىرىپقا سول جەردە سۋرەت سالاتىن بولامىز. ودان بولەك، بايقاۋعا قاتىسۋشىلار «الەم مەنىڭ كوزىممەن» تاقىرىبىندا اۆتورلىق كارتينا سالادى. نەگىزى بايقاۋ بيىل ءوتۋى ءتيىس ەدى، ءبىراق كوروناۆيرۋس ىندەتىنە بايلانىستى كەلەسى جىلعا شەگەرىلدى. ەسەسىنە مەندە سۋرەت سالۋ بىلىكتىلىگىمدى شىڭدايتىن قوسىمشا ۋاقىت بار. سونداي-اق، كاراتە سپورتىمەن اينالىسامىن. بۇل سپورت ءتۇرىنىڭ ادامنىڭ شارشاعانىن باسىپ، سەرگەك جۇرۋىنە ىقپالى زور. وسى ورايدا بايقاۋدىڭ بىرىنشە كەزەڭىنە جىبەرگەن جۇمىسىمدى سۇيىكتى سپورتىما ارناپ، اتاۋىن «كاراتە - مەنىڭ جاقسىلىعىمنىڭ فيلوسوفياسى» (كاراتە - مويا فيلوسوفيا دوبرا) دەپ قويدىم»، - دەيدى ول.
جاس ونەرپاز سۋرەت سالۋ مەن سپورتتان بولەك، دومبىرا تارتۋ، ءبي جانە گيمناستيكا ونەرىمەن شۇعىلدانادى.
«بۇل بايقاۋعا قاتىسۋدىڭ مەن ءۇشىن ورنى ەرەكشە. ويتكەنى، وعان الەمنىڭ تۇكپىر-تۇكپىرىنەن ءوزىم سەكىلدى جاس سۋرەتشىلەر كەلەدى. جانە بايقاۋ بارىسىندا الەمگە تانىمال سۋرەتشىلەرمەن تانىسىپ، اقىل-كەڭەس سۇراپ، تاجىريبە الماسۋ مۇمكىندىگى بار. مەندە ءوز كەزەگىمدە باسقا ۇلت وكىلدەرىنە ەلىم، تۋعان جەرىم تۋرالى ايتىپ، تانىستىرعىم كەلەدى. سايىستى اسىعا كۇتۋدەمىن، ءبىر جاعىنان ەل نامىسىن قورعايتىن بولعاندىقتان قوبالجۋدا بار. وسى ورايدا جاقىندارىم مەن دوستارىم ماعان قولداۋ ءبىلدىرىپ، شابىتتاندىرادى»، - دەدى تارازدىق وقۋشى.
ودان بولەك، جاس سۋرەتشى بولاشاقتا ارحيتەكتور بولعىسى كەلەتىنىن تىلگە تيەك ەتتى.