باسكەتبولدان قىتاي چەمپيوناتىندا وينايتىن تۇڭعىش قازاق - شەتەلدەگى قازاق ءتىلدى ب ا ق- قا شولۋ

نۇر- سۇلتان. قازاقپارات - «قازاقپارات» ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

جاۋىنگەر قويشان ۇلى باسكەتبولدان قىتاي چەمپيوناتىندا ونەر كورسەتەدى - قىتايدىڭ «ورتالىق حالىق راديوسى» (CNR)

قىتايدا تۇراتىن قانداسىمىز جاۋىنگەر قويشان ۇلى قىتايدىڭ ەرلەر كوماندالارى اراسىنداعى ۇلتتىق ليگا ويىندارىندا (CBA) ونەر كورسەتەتىن ويىنشىلاردىڭ ءبىرى بولىپ تاڭدالدى، دەپ جازادى قىتايلىق kazakcnr.com سايتى.

«21- تامىز كۇنى فۋتسزياندا 2020-2021- جىلدارداعى قىتايدىڭ ەرلەر كوماندالارى اراسىنداعى ۇلتتىق ليگاسى اياسىندا (CBA) وينايتىن ويىنشىلاردى تاڭداۋ جينالىسىندا قازاق ازاماتى جاۋىنگەر قويشان ۇلى (بويى - 210 س م. , سالماعى - 107 كەلى) «نانكين تۇڭشي داشىڭ» كلۋبىنا قابىلدانىپ، CBA- عا قاتىسۋعا جولداما الدى. وسى جولعى ەل چەمپيوناتىنا قاتىساتىن سپورتشىلاردى تاڭداۋعا جينالعان ماماندار توبىنا قىتايدىڭ تانىمالى باسكەتبول شەبەرى، قىتاي باسكەتبول قاۋىمداستىعىنىڭ ءتوراعاسى، ەلدەگى ەڭ داۋلەتتى سپورتشىلاردىڭ ءبىرى ياو مين ءتوراعالىق ەتتى»، - دەپ جازادى CNR.

تۇركيا تاريحىنداعى ەڭ ءىرى تابيعي گاز قورى قارا تەڭىزدە تابىلدى – TRT

ىستانبۇلداعى دولماباحچە رەزيدەنتسياسىندا باسپا سوزگە ارنايى مالىمدەمە جاساعان پرەزيدەنت ەردوعان تۇركيا تاريحىنداعى ەڭ ۇلكەن تابيعي گاز رەزەرۆىنىڭ قاراتەڭىزدە اشىلعانىن جاريالادى، - دەپ حابارلايدى تۇركيا راديو تەليەۆيزيا پورتالى.

ءوز مالىمدەمەسىندە پرەزيدەنت ەردوعان: «فاتيح» بۇرعىلاۋ كەمەمىز، 2020 -جىلى 20 -شىلدە كۇنى باستاعان Tuna-1 تابيعي گاز قۇدىعىن بۇرعىلاۋ بارىسىندا، 320 ميلليارد تەكشەمەتر مولشەرىندە تابيعي گاز قورىن تاپتى. بۇل جۇمىستار تولىعىمەن وتاندىق مۇمكىندىكتەرمەن جۇزەگە استى. الداعى ماقساتىمىز - 2023-شى جىلى قارا تەڭىز تابيعي گازىن ۇلتىمىزدىڭ يگىلىگىنە ۇسىنۋ» ، - دەپ اتاپ وتكەن.

وتەگەن ەستاي ۇلى موڭعوليادا ۇزدىك فۋتبولشىلار قاتارىنان كورىندى - KAZNEWS

موڭعوليانىڭ فۋتبول فەدەراتسياسىنىڭ جوعارى ليگاسىنىڭ سەگىزىنشى تۋرىندا ليگاداعى مىقتى كوماندالاردى جەڭىپ كەلگەن دەرەن كلۋبى «اتلەتيك 220» دان ۇتىلىپ قالدى، دەپ حابارلايدى موڭعوليانىڭ KAZNEWS اقپاراتتىق پورتالى.

«كوشباسشىلاردىڭ ءوزارا باسەكەلەسىنەن وزگە قىزىقتى ويىن «ۇلانباتىر مازاالاينۋۋد» پەن «سۋميدا- جيپرو» كلۋبتارىنىڭ اراسىندا ءوتتى. ويتكەنى ولاردىڭ قاي قايسىسى دا ماۋسىمنىڭ العاشقى ويىنىندا جەڭىسكە جەتۋ مۇمكىندىگى زور بولاتىن. «ۇلانباتىر مازاالاينۋۋد» كلۋبىنىڭ سول قاناتتاعى جارتىلاي قورعاۋشىسى وتەگەن ەستاي ۇلى «سۋميدا- جيپرو» كلۋبىنىڭ قاقپاسىنا ءبىرىنشى جانە ماتچتاعى بىردەن- ءبىر گولدى سالىپ، 1:0 ەسەبىمەن جەڭىس تۋىن جەلبىرەتتى»، - دەپ جازادى KAZNEWS پورتالى.

توقايەۆ قوجا احمەت ياساۋي كەسەنەسىنە باردى - «فارس» اقپارات اگەنتتىگى

«قازاقستان پرەزيدەنتى قاسىم- جومارت توقايەۆ تۇركىستان وبلىسىنا جاساعان ساپارىندا 12-عاسىردىڭ ۇلكەن اقىنى، سوپى قوجا احمەت ياساۋي كەسەنەسىنە باردى. توقايەۆ كۇمبەزدىڭ تاريحي كەلبەتىن ساقتاي وتىرىپ جۇرگىزىلگەن جاڭارتۋ جۇمىستارىنىڭ ناتيجەلەرىمەن تانىستى»، - دەپ جازادى دەرەككوز.

نۇر- سۇلتانعا 30- تامىزدا ارنايى ۇشاق ۇشادى - KAZNEWS

مەملەكەتتىك توتەنشە كوميسسيانىڭ شەشىمى بويىنشا 2020 -جىلى 30 - تامىز كۇنى قازاقستان رەسپۋبليكاسىنىڭ استاناسى نۇر- سۇلتان قالاسىنا، 31 - تامىز كۇنى ا ق ش- تىڭ سياتل قالاسىنا موڭعوليانىڭ ارنايى ۇشاعى ۇشادى. بۇل تۋرالى ۆيتسە پرەمەر- ءمينيستردىڭ باسپا ءسوز قىزمەتى حابارلاپ وتىر، دەپ حابارلايدى موڭعوليالىق KAZNEWS اقپاراتتىق پورتالى.

«نۇر- سۇلتان قالاسىنا جاسالاتىن رەيس جولدا قىرعىز رەسپۋبليكاسىنىڭ بىشكەك قالاسىنا ايالداپ، سول ەلدە كوروناۆيرۋس ينفەكتسياسى سالدارىنان بوگەلىپ قالعان موڭعوليانىڭ 30 عا جۋىق ازاماتىن الىپ قايتادى. بۇل رەيستەردە بارلىعى 520 گە جۋىق جولاۋشى تاسىمالدانادى. وسى ايدا بارلىعى 17 رەيسپەن 4,240 ازامات ەلگە ورالعان» ، - دەپ جازادى KAZNEWS پورتالى.

سامارقاندتا تۇركيا رەسپۋبليكاسىنىڭ باس كونسۋلدىعى اشىلادى - «ءو ز ا» اقپاراتتىق اگەنتتىگى

ۇكىمەتتىڭ «وزبەكستان رەسپۋبليكاسى مەن تۇركيا رەسپۋبليكاسى اراسىنداعى ستراتەگيالىق سەرىكتەستىكتى ودان ءارى نىعايتۋ جانە جان- جاقتى ىنتىماقتاستىقتى كەڭەيتۋ جونىندەگى شارالار تۋرالى» قاۋلىسى قابىلداندى، دەپ جازادى وزبەكستاننىڭ «ءو ز ا» مەملەكەتتىك اقپاراتتىق اگەنتتىگى.

«قاۋلىدا وزبەك- تۇرىك قاتىناستارىن ساپالى جاڭا دەڭگەيگە كوتەرۋ جونىندەگى شارالار باعدارلاماسى ماقۇلداندى جانە تۇركيامەن جان- جاقتى ىنتىماقتاستىقتى كەڭەيتۋ بويىنشا ۇيلەستىرۋ كەڭەسى قۇرىلدى. ۇكىمەت قاۋلىسىندا، تۇركيا ۇكىمەتىنىڭ تەحنيكالىق كومەگى ءتۇرلى باعىتتاردا كەڭەيتىلىپ، جەتەكشى تۇرىك ساراپشىلارى تارتىلادى. سونداي- اق، 2020 -جىلدىڭ سوڭىنا دەيىن سامارقاندتا تۇركيا رەسپۋبليكاسىنىڭ باس كونسۋلدىعىن اشۋ كوزدەلگەن»، - دەپ اتاپ وتەدى «ءوزا» اقپاراتتىق اگەنتتىگى.

اۆتور: باقىتجول كاكەش