قازاقستاندىق ءانشىنىڭ پولشاداعى جانكۇيەرلەرى «ديماش» راديوسىن اشتى

نۇر- سۇلتان. قازاقپارات - الەمگە تانىمال قازاقستاندىق ءانشىنىڭ پولشاداعى جانكۇيەرلەرى «ديماش» راديوسىن اشتى، دەپ حابارلايدى قازاقپارات.

«بۇگىننەن باستاپ RadioDimash.pl رەسمي تۇردە جۇمىسىن باستايتىنىن قۋانا حابارلايمىز. بۇل رەسمي تۇردە تىركەلگەن حابار تاراتۋ ستانتسياسى، ول جەردە قويىلاتىن اندەردىڭ اۆتورى مەن ورىنداۋشىلارىنا قالاماقى تولەنەدى. RadioDimash.pl ءدىڭ ماقساتى - ديماش قۇدايبەرگەننىڭ شىعارماشىلىعىن ناسيحاتتاۋ»، - دەلىنگەن Facebook-تەگى «Dimash Kudaibergen Fan Club Poland» دەپ اتالاتىن ديماشتىڭ فان- كلۋب پاراقشاسىندا.

RadioDimash.pl - ءدىڭ حابار تاراتۋ ستۋدياسى بار. ول جەردە قانداي باعدارلاما بولاتىنى جوسپارلانىپ، كەستە قۇرىلادى. سونداي- اق ونلاين حابار تاراتاتىن جانە باعدارلاما شىعاراتىن ستۋدياسى بار. راديو تاقىرىپتىق مۋزىكالار، رەپورتاج، سۇحبات، تۋريزم باعىتىنداعى باعدارلاما، بالالار مەن ەرەسەكتەرگە ارنالعان اۆتورلىق باعدارلامالار ۇسىنادى دەپ جوسپارلانۋدا.

«نەگىزىندە ديماشتىڭ اندەرى كوبىرەك قويىلادى. ءبىراق ديماشتىڭ باعىتىنا جاقىن پولشالىق جانە شەتەل انشىلەرىنە دە ورىن تابىلادى. اتالعان راديو ديماشتىڭ الەمنىڭ تۇكپىر- تۇكپىرىندەگى فان- كلۋبتارىمەن بايلانىس ورناتۋعا، بىرگە جۇمىس ىستەۋگە دايىن. ءبىز ديماشتىڭ كونتسەرتى پولشادا دا وتكەنىن ارماندايمىز»، - دەپ جازىلعان فان- كلۋب پاراقشاسىندا.