الماتى وبلىسىندا سەلفي جاساماق بولعان ەكى جاس ءوسپىرىم مەرت بولدى

تالدىقورعان. قازاقپارات - الماتى وبلىسىندا سمارتفون كامەراسىنىڭ كومەگىمەن اۆتوپورترەت جاساۋ، ياعني بىرەگەي سەلفي ءتۇسىرۋ ارەكەتىنىڭ سوڭى قايعىلى جاعدايعا اكەلىپ سوقتى، دەپ حابارلايدى قازاقپارات ءتىلشىسى.

«20- تامىز كۇنى ساعات 19:19 شاماسىندا الماتى وبلىسى الاكول اۋدانى بەسكول اۋىلىندا بالىق زاۋىتىنىڭ ماڭىندا بولەك تۇرعان عيماراتتا 2004 جانە 2005-جىلى تۋعان ەكى جاس ءوسپىرىم سۋرەتكە ءتۇسۋ كەزىندە قازا تاپتى. 2004-جىلى تۋعان ءۇشىنشى ادام وڭ اياعى سىنىپ، ءۇشارال قالاسىنداعى ورتالىق اۋداندىق اۋرۋحاناعا جەتكىزىلدى»، - دەپ حابارلادى وبلىستىق توتەنشە جاعدايلار دەپارتامەنتىنىڭ باسپا ءسوز قىزمەتى.

قۇتقارۋشىلار وقيعا ورنىنا كەلگەن بويدا جاس وسپىرىمدەردى 1991-جىلدان بەرى جۇمىس ىستەمەي تۇرعان 2 قاباتتى عيماراتتىڭ ىشىندە بەتون پليتا باسىپ قالعانىن انىقتادى.

«قۇتقارۋ جۇمىسىن جۇرگىزۋگە الماتى وبلىسىنىڭ توتەنشە جاعدايلار دەپارتامەنتىنەن 7 قۇتقارۋشى مەن 3 تەحنيكا جانە باسقا مەكەمەلەردەن 7 قىزمەتكەر مەن 3 تەحنيكا تارتىلدى» دەپ تولىقتىردى ۆەدومستۆودان.