قازاقستاندىق جاس ءانشى ا ق ش- تاعى تالانتتار شوۋىنىڭ جارتىلاي فينالىنا ءوتتى
تانىمال الەمدىك شوۋدىڭ شيرەك فينالى ءبىر كۇن بۇرىن تىكەلەي ەفيردە ءوتتى.
جارتىلاي فيناليستەر كورەرمەندەردىڭ داۋىسى ارقىلى تاڭدالدى. داۋىس بەرۋ ا ق ش- تاعى NBC سايتىندا وتكىزىلدى. بىرنەشە قاتىسۋشى قازىلار القاسىنان قوسىمشا ۇپاي الدى.
«لوس-اندجەلەستە مەنىڭ جانىمدا انام جانە ۇستازىم ناتاليا الەكساندروۆنا بار. ءبىز ساحناعا شىعاردىڭ الدىندا قاتتى قوبالجىدىق. مەن اكادەميالىق پەداگوگ گۇلزات داۋربايەۆامەن قوسىمشا دايىندالدىم. اۋىرىپ تا قالدىم. باقىتىمىزعا وراي، ءبارى تەز ءوتتى. بارشاڭىزعا راحمەت! قولداۋ كورسەتكەندەرىڭىز ءۇشىن العىسىم شەكسىز. مەن ءقازىر قانداي كۇيدە تۇرعانىمدى سوزبەن ايتىپ جەتكىزە المايمىن. كەرەمەت اتموسفەرا! شابىتتاندىرادى ەكەن. مەن ەندى كەلەسى تۋرعا دايىندالامىن»، - دەپ ءبولىستى دانەليا.
بۇگىن شوۋعا قاتىسۋشىلار باسپا ءسوز ءماسليحاتىن وتكىزىپ، ا ق ش- تىڭ ب ا ق وكىلدەرىنە سۇحبات بەرەدى.
ەستەرىڭىزگە سالا كەتەيىك، شيرەك فينالدا قازاقستاندىق 14 جاسار جۇلدىز گارري ستايلزدىڭ «Sign of the Times» ءانىن تاماشا ورىنداپ شىقتى.
وعان كورەرمەندەر مەن قازىلار القاسى ورىندارىنان تىك تۇرىپ قول سوقتى. سوفيا ۆەرگارا جاس ءانشىنىڭ ونەرىن جوعارى باعالادى. دانەليا، اناسى جانە ۇستازى ا ق ش- قا بىرنەشە كۇن بۇرىن باردى. شوۋدىڭ بارلىق قاتىسۋشىلارى ءۇشىن مىندەتتى شارت - بۇل كارانتيندىك شارالاردى قاتاڭ ساقتاۋ.
«ءبىز ۇشار الدىندا كوروناۆيرۋسقا تەست تاپسىردىق. ا ق ش- قا كەلگەن سوڭ باسقا قاتىسۋشىلار سياقتى، مىندەتتى كارانتين شارالارىن ساقتادىق، تاعىدا تەست تاپسىردىق. ءبىز قاۋىپسىزدىك شارالارىن قاداعالايمىز، ءتىپتى قىزمەت كورسەتۋدە ەشقانداي بايلانىس بولماس ءۇشىن قوناقۇيدەگى تاماق ەسىككە جەتكىزىلەدى»، - دەيدى دانەليانىڭ ۇستازى ناتاليا چۋراكوۆا.
«America’s Got Talent» جارتىلاي فينالىنىڭ ۋاقىتى مەن قازاقستاندىق جۇلدىزدىڭ قانداي كومپوزياتسيا ورىندايتىنى ازىرگە بەلگىسىز.