قازاقستاندىق ونەرتاپقىش بالانىڭ دەنساۋلىعىن باقىلايتىن سمارت-بىلەزىك ويلاپ تاپتى
تارازدىق ءمولدىر ايجارىق ءوزىنىڭ ونەرتابىسىن «Your friend» دەگەن اتاۋ بەردى. ول يمپۋلستى، تەمپەراتۋرانى، سونداي-اق بالانىڭ گەولوكاتسياسىن قاداعالاي الادى جانە بۇل تۋرالى اتا-اناعا حابارلاما جىبەرەدى.
«مەن بۇل بيزنەس- جوبانى 11-سىنىپتان باستاپ جەتەكشىم ءاليا جۋسانبايەۆانىڭ كومەگىمەن ەكونوميكا ساباعىندا جاساي باستادىم. قوعامنىڭ پروبلەمالارىن زەرتتەي وتىرىپ، كوپتەگەن اتا-انالار بالاسىنىڭ دەنساۋلىعىنا جەتكىلىكتى ۋاقىت بولە المايتىندىعىن بايقادىم، ويتكەنى ولار كوپ ۋاقىتىن جۇمىستا وتكىزەدى. وسى ورايدا ماعان بالالاردىڭ دەنساۋلىعىن باقىلايتىن جانە اتا-اناسىنا مالىمەت جىبەرە الاتىن سمارت-بىلەزىك جاساۋ يدەياسى كەلدى، - دەيدى ءمولدىر.
ءمولدىر ايجارىق «ZhasCamp Accelerator» الەۋمەتتىك جوبالاردى دامىتۋ باعدارلاماسىنىڭ تۇلەگى.
وسى باعدارلامانىڭ ارقاسىندا وقۋشى قىز وزىنە تالىمگەر تاپتى. ول - قازاقستاندىق عالىم جانە «Technologies Lab» باس ديرەكتورى تيمۋر رىسپەكوۆ.
مەنتوردىڭ جەتەكشىلىگىمەن ءمولدىر كود جازىپ، قۇرىلعىنىڭ جۇمىس ءپروتوتيپىن جاساپ شىققان. الايدا، جاقىندا «ApplE « كومپانياسى ءدال وسىنداي مۇمكىندىكتەرى بار اقىلدى ساعاتتاردىڭ جاڭارتىلعان نۇسقاسىن ۇسىندى. سودان كەيىن كوماندا ءوز الدىنا ءونىمدى باسەكەگە قابىلەتتى ەتۋ مىندەتىن قويدى.
ولار بىلەزىككە گازدىڭ اعىپ كەتۋىنە جاۋاپ بەرەتىن سەنسور مەن كورۋ قابىلەتى ناشار بالالارعا ارنالعان زاتتار سەنسورىن قوستى. سونداي-اق، ءمولدىر ويلاپ تاپقان قۇرىلعى پايدالانۋشى سەنسورلاردى ءوز قاجەتتىلىگىنە ساي اۋىستىرا الاتىندىعىمەن ەرەكشەلەنەدى. ازىرگە تەك ءوندىرىس پەن جوبانى ودان ءارى دامىتۋ ءۇشىن ينۆەستيتسيالار تارتۋ عانا قالىپ وتىر.
جوبا 3 جاستان 8 جاسقا دەيىنگى بالالارعا ارنالعان. اۆتوردىڭ ايتۋىنشا، ولار وسى جاستا وسال جانە كوبىنەسە اتا-اناسىنىڭ قاراۋىنسىز قالادى. ەندى ءمولدىر ماقساتتى اۋديتوريانى كەڭەيتىپ، مۇمكىندىگى شەكتەۋلى جانداردى دا قامتۋدى جوسپارلاۋدا. قازىر جاس ونەرتاپقىش بيزنەس-جوسپار بويىنشا بەلسەندى جۇمىس ىستەۋدە، ال ۋنيۆەرسيتەتكە تۇسكەننەن كەيىن ءارتۇرلى ماماندىق ستۋدەنتتەرىنەن جوبالىق توپ قۇرعىسى كەلەدى.