قاسىم- جومارت توقايەۆ: ءشامشى شىعارماشىلىعى - ۇلتتىڭ باعا جەتپەس بايلىعى

نۇر-سۇلتان. قازاقپارات - ءشامشى شىعارماشىلىعى - ۇلتتىڭ باعا جەتپەس بايلىعى. ق ر پرەزيدەنتى قاسىم-جومارت توقايەۆ وسىلاي ءمالىم ەتتى، دەپ حابارلايدى قازاقپارات.

«بۇگىن ەلىمىزدىڭ ءانۇرانى «مەنىڭ قازاقستانىم» ءانىنىڭ اۆتورى، ۇلت رۋحانياتىنا تالاي سىرلى ساز بەن اسەم اۋەن سىيلاعان كومپوزيتور ءشامشى قالداياقوۆتىڭ تۋعانىنا 90 جىل تولدى. ءشامشى شىعارماشىلىعى - ۇلتتىڭ باعا جەتپەس بايلىعى. ونىڭ تۋىندىلارىن كەڭىنەن ناسيحاتتاۋ - بۇگىنگى ۇرپاقتىڭ پارىزى»، دەپ جازدى قاسىم-جومارت توقايەۆ Twitter- دەگى پاراقشاسىندا.

ەسكە سالا كەتسەك، بۇگىن اتى اڭىزعا اينالعان سازگەر، قازاق ءۆالسىنىڭ كورولى ءشامشى قالداياقوۆتىڭ تۋعانىنا 90 جىل تولدى. سازگەردىڭ ۇلى مۇحتار قالداياقوۆ حالىق ءارتىسىنىڭ ءومىرى مەن وتباسىلىق قۇندىلىقتارى تۋرالى ايتىپ بەردى.

ق ر مادەنيەت جانە سپورت مينيسترلىگىنىڭ ۇيىمداستىرۋىمەن «مەنىڭ قازاقستانىم» حالىقارالىق مۋزىكالىق چەللەندجى باستالدى. اۋەندى مارافون قازاقستاننىڭ حالىق ءارتىسى، ق ر ءانۇرانى اۋەنىنىڭ اۆتورى ءشامشى قالداياقوۆتىڭ تۋعان كۇنىنە ارنالدى. تۇركىستان وبلىسىنىڭ وتىرار اۋدانىندا تۋىپ-ءوسىپ، «قازاق ءۆالسىنىڭ كورولى» اتانعان ءشامشى قالداياقوۆقا تۋعان جەرىندە مۋزەي اشىلدى.