22:03, 14 - تامىز 2020 | GMT +6
قازاقستاندىق تۋىندى شۆەيتسارياداعى كينوفەستيۆالدە ماراپاتقا يە بولدى
نۇر- سۇلتان. قازاقپارات - قازاقستاندىق رەجيسسەر جاننات الشانوۆانىڭ «وركەنيەت تاريحى» اتتى قىسقا مەتراجدى فيلمى شۆەيتسارياداعى حالىقارالىق كينوفەستيۆالدە ماراپاتقا يە بولدى، دەپ حابارلايدى قازاقپارات ءتىلشىسى.
«بۇل مۇلدەم تاڭ قالارلىق جايت. ءبىزدىڭ «وركەنيەت تاريحى» فيلمىمىز لوكارنوداعى حالىقارالىق كينوفەستيۆالدە كۇمىس قابىلانعا (pardini d'argento) يە بولدى»، - دەپ جازدى جاننات الشانوۆا Facebook پاراقشاسىندا.
ونىڭ اتاپ وتۋىنشە، ماراپات ونىڭ كومانداسىنا ۇزدىك قىسقا مەتراجدى فيلمى اتالىمى ءۇشىن بەرىلگەن. لوكارنوداعى حالىقارالىق كينوفەستيۆال ماڭىزدىلىعى جاعىنان ەۋروپاداعى كانن، ۆەنەتسيا جانە بەرلين كينوفەستيۆالدەرىنەن كەيىن ءتورتىنشى ورىندا تۇر. فەستيۆال شۆەيتساريانىڭ تيچينو كانتونىنداعى يتاليان تىلدەس شاعىن قالاشىقتا وتكەنىنە قاراماستان، جىل سايىن وزىنە كينو كورەرمەندەردىڭ، كينوماتوگرافيستەردىڭ جانە كينوشولۋشىلاردىڭ ۇلكەن شوعىرىن وزىنە باۋراپ وتىر. فەستيۆالدىڭ باس جۇلدەسى- «التىن قابىلان» دەپ اتالادى. فەستيۆال اياسىندا كينوفورۋم ءوتىپ تۇرادى.