ازيا ەلدەرىن سۋ باسسا، ا ق ش- تا ورمان ءورتى ءورشىپ تۇر
تابيعات اپاتىنان بانگلادەش حالقى دا زارداپ شەگىپ وتىر. مۇندا ەل اۋماعىنىڭ ۇشتەن ءبىر بولىگىن سۋ باستى. ال ا ق ش- تىڭ كاليفورنيا شتاتى مەن برازيلياداعى امازونيا ورماندارىندا، كەرىسىنشە، ءورت ىرىققا كونبەي تۇر.
ماۋسىمنىڭ باسىنان بەرى تاسقىن قىتايدىڭ بارلىق ءوڭىرىنىڭ تۇرعىندارىن الەككە سالدى. ءسويتىپ تابيعات اپاتىنان 63 ميلليوننان اسا تۇرعىن زارداپ شەكتى. 219 ادام كوز جۇمعان نە ءىز- ءتۇزسىز جوعالىپ كەتكەن. ال كەلتىرىلگەن ماتەريالدىق شىعىن 25 ميلليارد دوللارعا باعالانىپ وتىر. ەلدە 634 وزەن ارناسىنان تاسىعان. جاۋىننىڭ بەتى ءالى دە قايتاتىن ەمەس.
جوۋ سيۋەۆەن، قىتاي توتەنشە جاعدايلار ۆيتسە- ءمينيسترى:
- قۇتقارۋشىلارىمىز 4 ميلليوننان اسا تۇرعىندى قاۋىپسىز جەرگە ەۆاكۋاتسيالاعان. بۇل سوڭعى بىرنەشە جىلداعى ەڭ ۇلكەن كورسەتكىش بولىپ وتىر.
ال كورشىلەس سولتۇستىك كورەيادا نەگىزگى يادرولىق كەشەننىڭ عىلىمي- زەرتتەۋ ورتالىعىن سۋ باسقان. بۇل تۋرالى ا ق ش- تىڭ ساراپتاما ورتالىعىنا سىلتەمە جاساي وتىرىپ رەيتەر اگەنتتىگى حابارلايدى. ازياداعى تاعى ءبىر ەل بانگلادەش حالقى سوڭعى 20 -جىلداعى ەڭ الاپات سۋ تاسقىنىنان زارداپ شەگىپ وتىر. ءبىر ايدان اسا ۋاقىت ىشىندە مۇندا تابيعي اپاتتان 161 ادام كوز جۇمعان. سوڭعى دەرەكتەر بويىنشا، ەل اۋماعىنىڭ ۇشتەن ءبىر بولىگىن سۋ باسقان.
سامرات، جەرگىلىكتى تۇرعىن:
- تاسقىننان ءۇيىم قيرادى. ونىڭ ىشىندەگى سۋ تاماقتان كەلەدى. ەندى قالعان زاتتارىمدى اكەتۋگە بارا جاتىرمىن.
ورمان ءورتى ىرىق بەرمەي تۇر بۇل ەلدەر سۋ تاسقىنان زارداپ شەگىپ وتىرسا، امەريكالىقتاردى ورمان ءورتى الەككە سالدى. ءتىلسىز جاۋ كاليفورنيا شتاتىنداعى ۇلتتىق قورىق اۋماعىندا باستالىپ، لەزدە جان- جاققا تارالعان. ءسويتىپ قىزىل جالىن 4 جارىم مىڭ گەكتار اۋماقتى شارپىدى. قاۋىپتى اۋدانداردان مىڭداعان تۇرعىن ەۆاكۋاتسيالاندى. وتپەن مىڭنان اسا مامان ارپالىسىپ جاتىر. الايدا كۇننىڭ ىستىعى مەن قۇرعاقشىلىق كەسىرىنەن ءتىلسىز جاۋ ىرىق بەرەر ەمەس.
دەريل وسبي، ءورت ءسوندىرۋ قىزمەتىنىڭ باسشىسى:
- بۇگىن كۇن بۇلتتانىپ تۇر. سوندىقتان دۇرىس كورە الماي تۇرمىز. الايدا دەمالىس كۇندەرى بۇلت سەيىلگەندە، ءورتتىڭ جاڭا وشاقتارى كوبەيە مە دەپ قاۋىپتەنىپ وتىرمىز.
برازيلياداعى امازونيا وڭىرىندە دە ورمان ءورتى ءورشىپ تۇر. مۇندا تامىزدىڭ العاشقى 10 كۇنىنىڭ وزىندە 10 مىڭنان اسا ءورت وشاعى تىركەلگەن. ماماندار بۇل سوڭعى 10 -جىلداعى رەكوردتىق كورسەتكىش ەكەنىن ايتادى.
اۆتورى: جۇلدىز اتاگەلديەۆا