سىبايلاس جەمقورلىقپەن كۇرەس اگەنتتىگى ەلەكتروندىق بىلەزىكتەر ەنگىزبەك

نۇر- سۇلتان. قازاقپارات - قازاقستاندا قاماۋدا ۇستاۋعا بايلانىستى ەمەس بۇلتارتپاۋ شاراسى قولدانىلعان ازاماتتارعا ەلەكتروندىق بىلەزىكتەر تاعىلۋى مۇمكىن، دەپ حابارلايدى قازاقپارات ءتىلشىسى.

«ق ر سىبايلاس جەمقورلىققا قارسى ءىس- قيمىل اگەنتتىگى قاماۋدا ۇستاۋعا بايلانىستى ەمەس بۇلتارتپاۋ شاراسى قولدانىلعان كەزدە ەلەكتروندىق باقىلاۋ قۇرالدارىن (ەلەكتروندىق بىلەزىكتەر) قولدانۋ ماسەلەسىن پىسىقتاۋدا. وزىق حالىقارالىق تاجىريبەگە سۇيەنە وتىرىپ، اتالعان جوبا قىلمىستىق پروتسەستى ىزگىلەندىرۋگە جانە قاماۋدا وتىرعان ادامداردى ازايتۋعا ىقپال ەتەدى»، - دەيدى سيفرلاندىرۋ ماسەلەلەرى بويىنشا اگەنتتىك ءتوراعاسىنىڭ كومەكشىسى اسلان قۇسايىنوۆ.

سونداي- اق، جوعارىدا كورسەتىلگەن شارالاردى قولدانۋ شارتتارىن بۇزۋ فاكتىلەرىنە جەدەل دەن قويۋعا جانە تەرگەۋ مەن سوتتان جاسىرىنۋ ارەكەتتەرىنىڭ جولىن كەسۋگە مۇمكىندىك بەرەدى.

«بۇدان باسقا، بۇل سىبايلاس جەمقورلىققا قارسى قىزمەتتىڭ كۇشتەرى مەن قۇرالدارىن ءتيىمدى پايدالانۋعا ىقپال ەتەدى»، - دەيدى ول.