كاۆاساكي سيندرومى جايلى نە ءبىلۋ كەرەك؟
جىل باسىنان بەرى نۇر- سۇلتان، الماتى، پەتروپاۆلدا كاۆاساكي سيندرومىنىڭ 3 دەرەگى تىركەلگەن.
كاۆاساكي اۋرۋى كوروناۆيرۋس پاندەمياسىنا دەيىن دە كەزدەسكەن. الايدا قازىر كوروناۆيرۋسپەن اۋىرعان بالالاردا كاۆاساكي سيندرومىنا ۇقساس اۋرۋ بەلگىلەرى انىقتالىپ جاتىر. كوروناۆيرۋستىڭ جەڭىل نە سيمپتومسىز تۇرىمەن اۋىرعان بالالاردا 2-3 اپتادان سوڭ جۇقپالى اۋرۋدان كەيىنگى اسقىنۋ بايقالادى. دارىگەرلەر مۇنى العاش ۇلى بريتانيا، ا ق ش جانە يتاليادا بايقاعان. كاۆاساكي اۋرۋى ورتا تامىرلاردىڭ زاقىمدالۋىمەن، ونىڭ ىشىندە كوبىنە كورونارلىق ارتەريالاردىڭ زاقىمدالۋىمەن بايلانىستى.
عالىمدار كاۆاساكي سيندرومى تيپتەس اۋرۋعا كوپ جۇيەلى قابىنۋ سيندرومى دەگەن اتاۋ بەردى.
بۇعان دەيىن ەلىمىزدە جىلىنا 2-3 بالا كاۆاساكي سيندرومىمەن اۋىراتىن بولعان. ادەتتە بۇل اۋرۋعا 5 جاسقا دەيىنگە بالالار شالدىعادى. الايدا كوروناۆيرۋس پاندەمياسىنىڭ سالدارىنان كاۆاساكي سيندرومىنا ۇقساس اۋرۋ بەلگىلەرى بالالارمەن قوسا جاسوسپىرىمدەردەن دە بايقالىپ جاتىر.
كوروناۆيرۋستان جازىلىپ، تەست ونىڭ جوق ەكەنىن كورسەتكەن ساتتەن باستاپ 2-3 اپتا وتكەندە كاۆاسكي سيندرومىنا ۇقساس اۋرۋدىڭ بەلگىلەرى بايقالۋى مۇمكىن. بالانىڭ دەنە قىزۋى كوتەرىلىپ، 2-3 تاۋلىك بويى تۇسپەي قويۋى مۇمكىن. دەنەگە بورتپە شىعىپ، ليمفوتۇيىندەر ۇلكەيە تۇسەدى. ءتىل قىزعىلت تۇسكە بويالىپ، ەرىندەر بوزارادى.
جالپى بالالارداعى مۋلتيجۇيەلىك قابىنۋ سيندرومىنىڭ كلينيكالىق بەلگىلەرى - قالتىراۋ، 1 تاۋلىك نەمەسە ودان دا كوپ ۋاقىت بويى 38 گرادۋستان جوعارى دەنە قىزۋى، بورتپە، كونيۋنكتيۆيت، سكلەريت، ليمفادەنوپاتيا، الاقاننىڭ، اياقتىڭ ءىسىنۋى، تىنىس الۋدىڭ قيىنداۋى، اسقازان- ىشەك جولدارىنىڭ زاقىمدانۋى.
بالادا كاۆاساكي سيندرومىنىڭ بەلگىلەرى بايقالعان كەزدە جەرگىلىكتى دارىگەرگە نەمەسە پەدياترعا جۇگىنۋ كەرەك. مۇنداي سيندروممەن بالالار مىندەتتى تۇردە اۋرۋحاناعا جاتقىزىلادى. بۇل سيندروم بالا كوروناۆيرۋس جۇقتىرىپ، ەكى- ءۇش اپتا وتكەن سوڭ، ياعني جازىلعاننان كەيىن بايقالعاندىقتان تولىققاندى دياگنوز بەن زەرتتەۋلەر جاسالادى. زەرتتەۋلەرگە بيوحيميالىق قان تالداۋى، گەموستازدى باقىلاۋ، كواگۋلوگرامما، ەحوكارديوگرامما، ەكگ، ۋدز، كەۋدە رەنتگەنى نەمەسە كت كىرۋى مۇمكىن.
massaget.kz