قازاقستانعا كەلەتىن شەتەل ازاماتتارىنا قانداي تالاپ قويىلادى

نۇر- سۇلتان. قازاقپارات - ق ر باس مەملەكەتتىك سانيتار دارىگەرى ايجان ەسماعامبەتوۆا قازاقستانعا كەلەتىن شەتەل ازاماتتارىنا قانداي تالاپتار قويىلاتىنىن ايتتى، دەپ حابارلايدى قازاقپارات ءتىلشىسى.

ا. ەسماعامبەتوۆا ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا شەتەلمەن اۋە بايلانىسىن جانداندىرۋ كوميسسيادا مىندەتتى تۇردە قارالاتىنىن جەتكىزدى. سايكەسىنشە، شەتەل ازاماتتارىنىڭ كەلۋىنە رۇقسات بەرۋدىڭ ءتيىستى ولشەمدەرى دايىندالعان. وسى ورايدا ءۇش ولشەم ەسكەرىلگەن.

«بىرىنشىدەن، ەپيدەميولوگيالىق جاعداي (جولاۋشى كەلەتىن مەملەكەتتە) بىزگە قاراعاندا جاقسى بولسا. قازاقستاندا قوعامدىق دەنساۋلىق ساقتاۋ ۇلتتىق ورتالىعى بار. ولار كۇن سايىن ەلىمىزدەگى جاعدايدى، سونداي- اق تىكەلەي حالىقارالىق بايلانىس بار باسقا دا مەملەكەتتەردەگى ەپيدەميولوگيالىق جاعدايعا مونيتورينگ جۇرگىزەدى. ەگەر دە وسى ەلدەردە كوروناۆيرۋسقا شالدىعۋ بويىنشا ەپيدەميولوگيالىق جاعداي ءبىرقاتار كورسەتكىشتەرمەن سيپاتتالسا، وندا بۇل مەملەكەتتەردەن ۇشىپ كەلگەن جولاۋشىلار ەلىمىزگە قانداي دا ءبىر شەكتەۋسىز كىرەدى.

ەكىنشىدەن، ەپيدەميولوگيالىق جاعداي ءبىزدىڭ ەلىمىز دەڭگەيىندە، ياعني اۋرۋعا شالدىعۋ نەمەسە باسقا كورسەتكىشتەر بويىنشا قازاقستانداعى جاعدايمەن بىردەي بولسا، وندا ەلگە كەلەتىن ادام تەرىس اناليز جونىندە پ ت ر- انىقتامانى ۇسىنۋى كەرەك. انىقتاما مەرزىمى 5 كۇننەن اسپاۋى ءتيىس. ەگەر وسى انىقتاما بولماسا، بۇل جولاۋشىنىڭ مالىمەتتەرى موبيلدى قوسىمشاعا ەنگىزىلەدى. سونىمەن قاتار جولاۋشى ەكى تاۋلىك ىشىندە ەل ىشىندە پ ت ر- تەستىدەن وتەتىندىگى تۋرالى قولحاتقا قول قويادى نەمەسە 14 كۇن بويى ءۇي كارانتينىندە وتىرادى. ءۇشىنشى توپقا ءبىزدىڭ ەلگە قاراعاندا ەپيدەميولوگيالىق جاعدايى ناشار مەملەكەتتەر ەنىپ وتىر. وندا وسى ەلدەرمەن اۋە بايلانىسىنا تىيىم سالىنادى»، - دەدى ا. ەسماعامبەتوۆ.

ايتا كەتەيىك، قازاقستان 17- تامىزدان باستاپ 7 ەلمەن حالىقارالىق اۋە رەيستەرىن كەزەڭ- كەزەڭىمەن قايتا ىسكە قوسادى.

اۆتور: رۋسلان عابباسوۆ