مونشا مەن ساۋنالار قانداي تالاپپەن جۇمىس ىستەي باستايدى
«مونشا مەن ساۋنانىڭ جۇمىس ىستەۋىنە رۇقسات ەتىلەدى. باستاپقى كەزەڭدە مونشا مەن ساۋنالاردىڭ جۇمىسى باسسەينسىز جۇزەگە اسىرىلادى. نىساننىڭ ءىشى % 50 بوس بولۋى كەرەك جانە ءار كەلۋشىگە كەم دەگەندە 4 شارشى مەتر اۋماقتان كەلۋى ءتيىس»، - دەدى ق ر باس مەملەكەتتىك سانيتارلىق دارىگەرى ايجان ەسماعامبەتوۆا.
ا. ەسماعامبەتوۆا اتاپ وتكەندەي، كوروناۆيرۋستىڭ تارالۋ سانىن ازايتۋ بويىنشا قول جەتكىزىلگەن ديناميكانى ساقتاپ قالۋ قاجەت.
«ياعني، قازاقستانداعى كوروناۆيرۋس بويىنشا ەپيدەميولوگيالىق جاعدايدىڭ تۇراقتانۋىن سيپاتتايتىن ديناميكانى ساقتاپ قالۋ كەرەك. سوندىقتان، ءبىرىنشى كەزەڭدە قاشىقتان جۇمىس ىستەۋ بويىنشا 80/20 قاتىناسى ساقتالادى. مۇمكىندىگىنشە، قاشىقتان جۇمىس فورماتىن ساقتاپ، جۇمىسقا قىزمەتكەرلەردىڭ % 20 عانا كەلگەنى دۇرىس»، - دەيدى ول.
بۇدان بۇرىن حابارلانعانداي، 13 - تامىزدا ق ر پرەمەر- ءمينيسترى اسقار ماميننىڭ توراعالىعىمەن وتكەن مەملەكەتتىك كوميسسيا وتىرىسىندا كارانتين شارالارىن كەزەڭ- كەزەڭىمەن الىپ تاستاۋ جوسپارى بەكىتىلدى.
اۆتور: زارينا قاھارمان