دارىگەرلەر وسىنداي: قوستانايلىق دارىگەر كوروناۆيرۋسپەن قالاي كۇرەس جۇرگىزىلگەنى تۋرالى ايتىپ بەردى
پاندەميا كەزىندەگى جاعدايدىڭ قالاي بولعانى تۋرالى دارىگەردىڭ ءوزى اڭگىمەلەپ بەردى، دەپ حابارلايدى قازاقپارات.
- قاراعاندى مەديتسينالىق ۋنيۆەرسيتەتىن ويداعىداي ءتامامداپ، وتكەن كۇزدە مەن، ىنتا- جىگەرى مول، امبيتسياسى مىقتى رەتىندە تۋعان جەرىم - قوستاناي قالاسىنا ورالدىم. جالپى پراكتيكا دارىگەرى رەتىندە قابىلداۋ جۇرگىزە باستادىم. الايدا مامىر ايىندا ەمحاناداعى جۇمىسىمنان ۋاقىتشا باس تارتۋعا تۋرا كەلدى. ادامدار اۋىرىپ، قالادا كارانتين باستالدى، ەمحانا جانىنداعى پروۆيزور بولىمىنە ماماندار قاجەت بولدى. باسشىلىق ۇسىنىس جاساپ، وسى جۇمىسقا كەلىستىم. بۇل - دارىگەرگە قاجەتتى تاجىريبە.
ارينە، جاقىندارىم ءۇشىن الاڭداپ، قورىقتىم، سول سەبەپتى دە بىردەن ولاردان وقشاۋلاندىم. وتباسىما راحمەت، مەنىڭ شەشىمىمىممەن كەلىسىپ، قولداۋ جاسادى. ءبىر- بىرىمىزگە بەينەقوڭىراۋ شالىپ، سويلەسىپ تۇرامىز، وعان دا ەتىمىز ۇيرەنىپ قالدى. كەيىننەن موبيلدى بريگادا قۇرامىندا شاقىرتۋعا شىعىپ ءجۇردىم. شىلدە ايىنىڭ باسىندا جاعداي اسا اۋىر بولدى، ءبىر كۇندە شالىناتىن قوڭىراۋ سانى مىڭنان اسىپ جىعىلاتىن. تاڭەرتەڭنەن كەشكە دەيىن جۇمىس تولاستامادى.
سونداي كۇندەردىڭ بىرىندە، جۇمىستىڭ سوڭىنا قاراي تەلەفوننان توبىل قالاسىنىڭ جۇقپالى اۋرۋلار اۋرۋحاناسىندا پنيەۆمونياعا شالدىققان ناۋقاستار كوبەيگەنى، جاعداي ۋشىعىپ، دارىگەرلەردىڭ ۇلگەرمەي جاتقانى جايىندا حابار كەلدى. ۋاقىت كەشكى جەتى- سەگىزدەر شاماسى، ەمحانادا مەن جانە ارىپتەسىم ەكەۋمىز عانا قالعان بولاتىنبىز. حاباردى الا سالا، وسىناۋ قيىن- قىستاۋ كەزەڭدە، فورس- ماجور جاعدايىن ەسكەرىپ، ءبىز بىردەن ارىپتەستەرىمىزگە كومەككە اتتاندىق.
سوعىستا سياقتى
- العاشقى كۇندەر اسا قيىن بولدى. ءبولىم جاقىندا عانا اشىلعان، ال وبلىستا ناۋقاستار سانى كۇن ساناپ كۇرت ءوسىپ كەلەدى. كۇن ىستىق، «جەدەل جاردەم» ماشينالارى بىرنەشە ساعات قاتارىنان كەزەكتە تۇرادى، ىشىندە - پنيەۆمونياعا شالدىققان، جاعدايى وتە اۋىر ناۋقاستار. ولاردىڭ بارلىعىنا جەدەل كومەك قاجەت. سوندىقتان بىزگە دەمالىسسىز، تاڭعى سەگىزدەن كەشكى سەگىزگە دەيىن تولاسسىز جۇمىس ىستەۋگە تۋرا كەلدى. كۇشىمىز دە ازايا باستاعان سياقتى. كۇنىنە 70-كە دەيىن ناۋقاستى تەكسەرىپ جۇردىك. ۆيرۋس ايماقتان اۋا الماسپايتىن قورعانىس كيىمىمەن تەرلەپ، مالماڭداي سۋ بولىپ شىعاتىنبىز.
ءوز- ءوزىمدى مىعىم ۇستاۋعا نە سەبەپ بولعانىن بىلمەيمىن، مۇمكىن، جاستىق پەن ىنتا، كومەك كورسەتۋگە دەگەن قۇلشىنىس شىعار. ءبىر تاۋلىك بويى اياعىمنان تىك تۇرىپ، كەزەكشىلىگىمدى اتقارىپ، ارتىنان بىرنەشە ساعات قانا دەمالىپ، قايتادان تاۋلىك بويعى كەزەكشىلىككە شىعاتىنمىن. وسىنداي كەزدە تەك مورالدىق تۇرعىدان قاتتى شارشايتىنمىن.
اعا بۋىن ارىپتەستەرىمە دە اۋىر قورعانىس كوستيۋمىن كيىپ ءجۇرۋ وڭايعا سوققان جوق. ءبىز قازىر سوعىستا جۇرگەندەيمىز. تەك كورىنبەيتىن جاۋ - ۆيرۋسپەن كۇرەسىپ جاتىرمىز. سوڭعى ناۋقاس دەرتىنەن ايىعىپ شىقپايىنشا، مەن دە وسى ستاتسيوناردا بولامىن. وسىلاي بۇل جاعدايدى حالىقپەن بىرگە باستان وتكەرەمىز. بۇل ماڭگى تۇراتىن جاعداي ەمەس ءبارى وزگەرەدى عوي… دارىگەر رەتىندە بۇل جاعداي مەن ءۇشىن ۇلكەن تاجىريبە بولدى. ۇيرەنگەنىم كوپ.
كۇلىمدەيتىن كەز كەلدى
- مەن پاتسيەنتتەردىڭ، ءبىزدى، مەديتسينا قىزمەتكەرلەرىن، تۇسىنگەنىن قالار ەدىم. ءبىز ولاردان ازبىز، سوندىقتان ولاردىڭ بارلىعىنا بىردەن نازار اۋدارۋ قيىن. كوپتەگەن اۋىر ناۋقاستار بولدى، ءبارىن قۇتقارۋ مۇمكىن ەمەس ەدى - جاسى ۇلعايعان، سوزىلمالى اۋرۋى بارلار، وكپەنىڭ زاقىمدانۋى 90-95 پايىز بولعان ناۋقاستار... ءبىز ولاردىڭ ءارقايسىسى ءۇشىن قولدان كەلگەننىڭ ءبارىن جاسادىق جانە ءالى دە جاساۋدامىز ءبىراق ۆيرۋس ەشكىمدى دە اياپ جاتقان جوق...
مەديتسينالىق ۋنيۆەرسيتەتتىڭ ءبىرىنشى كۋرسىندا وقىپ جۇرگەن شاعىمدا پرورەكتور، كەرەمەت دارىگەر جانە وقىتۋشى ۆيلەن مولوتوۆ- لۋچانسكيدىڭ «دارىگەر - بۇل سالقىنقاندىلىق، مەيىرىمگە تولى جۇرەك، جىلى قول» دەگەن سوزدەرى مەنىڭ جۇرەگىمدە ماڭگى ساقتالىپ قالعان ەدى. اسا ءبىر اۋىر كەزەڭدەردە (پاتسيەنتتەر ءارتۇرلى بولادى عوي)، مەن ۇنەمى ىشىمنەن وسى سوزدەردى قايتالايمىن. كەز- كەلگەن جاعدايدا ادام بولىپ قالۋ ماڭىزدى دەپ سانايمىن. بىرەۋگە جىلى قاباق، مەيىرىمدى سوزدەر، ال بىرەۋگە قاتالدىق قاجەت.
ارينە، پاتسيەنتتەردىڭ ناۋقاسىنان ايىعىپ، اۋرۋحانادان شىعۋى دارىگەر ءۇشىن ءبىر عانيبەت قوي. ولاردىڭ باقىتتان بال- بۇل جانعان جۇزدەرىن، كۇلىپ، العىس بىلدىرگەنىن كورۋدىڭ ءوزى ءبىر كەرەمەت سەزىم. ولاردىڭ سوزدەرى، شىناي ايتقان تىلەكتەرى بويمىزعا كۇش- قۋات بەرىپ، ءوزىمىزدىڭ قاجەتتىلىگىمىزدى سەزىندىرەدى. پاتسيەنتتەر ءبىزدى ەستەرىنە ساقتاپ قالا المايدى، ادەتتە تانىمايدى دا، ويتكەنى ولارعا ءبىز قورعانىس كيىمىن كيىپ، باستان اياق تۇمشالانىپ كەلەمىز. تەك اۋرۋحانادان شىعارار ۋاقىتتا، ولارعا ۇسىنىستار جازىلعان اۋرۋحانا پاراعىن بەرۋ ءۇشىن جاي ماسكامەن بارعان كەزدە، ولاردىڭ «دارىگەر، ءسىزدىڭ ءتۇرىڭىز وسىنداي ەكەن عوي!» دەپ تاڭقالا ايتقان ءسوزىن ەستيمىن.