14:03, 14 - تامىز 2020 | GMT +6
ق ر باس سانيتارلىق دارىگەرى دەمالىس كۇندەرگى شەكتەۋلەردى ءتۇسىندىردى
نۇر- سۇلتان. قازاقپارات - ق ر باس مەملەكەتتىك سانيتار دارىگەرى ايجان ەسماعامبەتوۆا دەمالىس كۇندەرى كارانتين نەلىكتەن ساقتالاتىنىن ايتتى، دەپ حابارلايدى قازاقپارات ءتىلشىسى.
ايتا كەتەيىك، كوروناۆيرۋسقا قاتىستى ەپيدەميولوگيالىق جاعدايدى ودان ءارى تۇراقتاندىرۋ ماقساتىندا دەمالىس كۇندەرى شەكتەۋ شارالارى ساقتالادى.
«نە سەبەپتى دەمالىس كۇندەرى لوكداۋندى ساقتايمىز؟ ءبىرىنشى ماقسات - قول جەتكىزىلگەن كورسەتكىشتەردىڭ وڭتايلى ديناميكاسىن ساقتاۋ. ينفەكسيانىڭ تارالۋىندا باستى سەبەپ نە؟ ول - ادامداردىڭ قارىم- قاتىناسى. وزدەرىڭىز جاقسى بىلەسىزدەر، دەمالىس كۇندەرى ادامداردىڭ ءوزارا قارىم- قاتىناسى كوبەيەدى، تۇرعىنداردىڭ ساپارعا شىعۋى ارتادى»، - دەدى ول ورتالىق كوممۋنيكاتسيالار قىزمەتىندە.
بۇدان بۇرىن حابارلانعانداي، ا. ەسماعامبەتوۆا قازاقستاندا قاتاڭ شەكتەۋ شارالارى ەنگىزىلگەننەن باستاپ، كوروناۆيرۋسپەن سىرقاتتانۋشىلىقتىڭ تاۋلىكتىك ءوسىمى 0,5 پايىزعا دەيىن تومەندەگەنىن ايتتى.
اۆتور: رۋسلان عابباسوۆ