اۋاعا «تاراتىلاتىن» گازعا قاتىستى ايجان ەسماعامبەتوۆا جاۋاپ بەردى

نۇر- سۇلتان. قازاقپارات - ق ر باس مەملەكەتتىك سانيتار دارىگەرى ايجان ەسماعامبەتوۆا الەۋمەتتىك جەلىدە اۋاعا بەلگىسىز گازدىڭ تارالۋىنا قاتىستى جاريالانىپ جۇرگەن قاۋەسەتكە سەنبەۋگە شاقىردى، دەپ حابارلايدى قازاقپارات ءتىلشىسى.

ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا وسى ماسەلەگە قاتىستى سۇراق قويىلدى.

«تۇندە اۋاعا بەلگىسىز گازدى شاشۋ جاعدايى بولىپ جاتقاندىعى تۋرالى تۇرعىندار اراسىندا حابارلاما تارالۋدا. وسى ورايدا تۇندە ءۇيدىڭ تەرەزەلەرىن جابۋ، بالالاردى دالاعا شىعارماۋ كەرەكتىگى ايتىلىپ جاتىر. وسى اقپارات قانشالىقتى شىندىققا جاناسادى؟»، - دەلىنگەن قويىلعان ساۋالدا.

ءوز كەزەگىندە ايجان ەسماعامبەتوۆا بۇل قاۋەسەت شىندىققا ساي ەمەستىگىن جەتكىزدى.

«قانداي دا ءبىر قوسپالاردى اۋاعا شاشۋعا بايلانىستى اقپارات دۇرىس ەمەس ءارى شىندىققا جاناسپايدى. بۇل تۇرعىدا تەك تەكسەرىلگەن اقپاراتتى، سونداي- اق رەسمي اقپارات كوزدەرىنەن الۋدى سۇرايمىن»، - دەدى باس مەملەكەتتىك سانيتار دارىگەر.

اۆتور: رۋسلان عابباسوۆ