لۋكاشەنكو حالىقىنا شۇعىل مالىمدەمە جاساماق - ب ا ق

نۇر-سۇلتان. قازاقپارات - بەلارۋس پرەزيدەنتى الەكساندر لۋكاشەنكو حالىققا شۇعىل مالىمدەمە جاساۋعا دايىندالىپ جاتىر.

بۇل تۋرالى «كوممەرسانت FM» راديوستانتسياسى Twitter جەلىسىندەگى پاراقشاسىندا مەملەكەت باسشىسىنىڭ باسپا ءسوز حاتشىسى ناتاليا ەيسمونتكە سىلتەمە جاساپ جازدى، - دەپ حابارلايدى Tengrinews.kz ءتىلشىسى.

«لەكساندر لۋكاشەنكو حالىققا شۇعىل مالىمدەمە جاساۋعا دايىندالىپ جاتىر - پرەزيدەنتتىڭ باسپا ءسوز حاتشىسى ەيسمونت»، - دەلىنگەن حابارلامادا.

كەيىن بۇل اقپارات انونيم Telegram كانالدا پايدا بولعانى جانە بۇل مالىمەتتىڭ ءالى ناقتىلانباعانى حابارلاندى.

سونداي-اق، رەسپۋبليكا كەڭەسىنىڭ ءتوراعاسى ناتاليا كوچانوۆا لۋكاشەنكونىڭ اتىنان نارازىلىققا شىققان تۇرعىنداردى ۇستاۋ ماسەلەسىنە قاتىستى پىكىر ءبىلدىردى. ونىڭ ايتۋىنشا، زاڭسىز ميتينگىگە قاتىسىپ ۇستالعان مىڭنان اسا ادام ۇيىنە جىبەرىلگەن. ول «بەلارۋس 1» تەلەارناسىنىڭ ەفيرىندە بەلارۋستارعا «توبەلەس تە، سوعىس تا كەرەك ەمەس» دەدى.

«پرەزيدەنت ەڭبەك ۇجىمدارىنداعى ادامداردىڭ پىكىرىن ەستىپ، ماعان نارازىلىققا شىققان تۇرعىنداردى ۇستاۋ ماسەلەسىن شەشۋدى تاپسىردى. بۇل سوڭعى كۇندەرى بولعان وقيعاعا قاتىستى. قازىرگى تاڭدا وسى باعىتتا بەلسەندى جۇمىس جۇرگىزىلىپ جاتىر. بۇگىن كەشكە رۇقسات ەتىلمەگەن شارالارعا قاتىسقان مىڭنان اسا ادام ۇيىنە جىبەرىلدى. ال كامەلەتكە تولماعاندار قولحاتپەن اتا-انالارىنا جىبەرىلدى»، - دەيدى ناتاليا كوچانوۆا Telegram-داعى «پۋل پەرۆوگو» كانالىندا.