ەلباسى: ىشكى تۇراقتىلىقتى ساقتاۋىمىز كەرەك
بۇل تۋرالى قازاقپارات elbasy.kz سايتىنا سىلتەمە جاساپ حابارلايدى.
كەزدەسۋ بارىسىندا بيىلعى 7 ايدىڭ قورىتىندىسى بويىنشا ەلىمىزدىڭ ەكونوميكالىق دامۋ ناتيجەلەرى مەن پاندەميادان كەيىنگى كەزەڭگە ارنالعان جۇمىس جوسپارى تالقىلاندى.
پرەمەر-ءمينيستردىڭ ۇسىنعان مالىمەتى بويىنشا، جىل باسىنان بەرى ەكونوميكانىڭ ماشينا جاساۋ، وڭدەۋ جانە تاۋ-كەن ءوندىرىسى، قۇرىلىس، باسقا دا نەگىزگى سالالارىنداعى كورسەتكىشتەر وڭ قارقىن العان.
ەلباسى قازاقستاندا بۇعان دەيىن قابىلدانعان مەملەكەتتىك باعدارلامالار قازىرگى داعدارىستىڭ ۇلتتىق ەكونوميكاعا تەرىس اسەرىن ازايتۋعا مۇمكىندىك بەرگەنىن اتاپ ءوتتى.
«ءبىز تاۋەلسىزدىك جىلدارىنداعى ەڭ كۇردەلى كەزەڭدى باستان وتكەرىپ جاتىرمىز. وسى ۋاقىت ىشىندە تالاي داعدارىستى ەڭسەردىك. قازىرگى قيىندىق الەمنىڭ بۇكىل ەلىن قامتىپ وتىر. بارلىق جەردە جۇمىسسىزدىقتىڭ كوبەيۋى بايقالۋدا، بيزنەس قيىندىقتارعا تاپ بولىپ، مەملەكەتتەر اراسىنداعى ساۋدا-ساتتىق دەڭگەيى تومەندەدى. الايدا بۇعان دەيىن قابىلدانعان شارالار داعدارىستىڭ ەكونوميكامىزعا اسەرىن ازايتۋعا كومەكتەستى. ءبىزدىڭ ەكونوميكالىق كورسەتكىشتەردىڭ تومەندەۋى باسقا ەلدەرمەن سالىستىرعاندا ءۇش ەسە از»، - دەدى نۇرسۇلتان نازاربايەۆ.
قازاقستاننىڭ تۇڭعىش پرەزيدەنتى كۇردەلى كەزەڭدەگى ەلدىڭ الەۋمەتتىك-ەكونوميكالىق دامۋىن قولداۋ باعىتىندا وتاندىق بيزنەستىڭ بەلسەندىلىگى جوعارى ەكەنىن اتاپ ءوتتى.
«ءىرى بيزنەس جۇمىس ورىندارىن ساقتاپ قالۋعا كومەكتەستى، حالىقتىڭ ءالسىز توپتارىن قولداۋعا قاراجات ءبولدى، سونداي-اق «ءبىز بىرگەمىز» باستاماسىن ىلگەرىلەتۋگە ۇلەسىن قوستى. مەن بارلىق بيزنەس وكىلدەرىنە ريزاشىلىعىمدى بىلدىرەمىن. «Birgemiz» قورى ارقىلى ءبىز 2,3 ميلليون قازاقستاندىققا قولداۋ كورسەتە الدىق»، - دەدى ەلباسى.
نۇرسۇلتان نازاربايەۆ داعدارىستان كەيىنگى كەزەڭدەگى ەكونوميكالىق ءوسىم ماسەلەسىن قاراستىرىپ، وتاندىق بيزنەستى جانداندىرۋ جانە ازاماتتاردىڭ ءال-اۋقاتىن جاقسارتۋ قاجەتتىگىن اتاپ ءوتتى. ۇكىمەت ەكونوميكانىڭ ءتۇرلى سالاسىنداعى ءوسىمدى قامتاماسىز ەتۋ ءۇشىن ناقتى شارالار قابىلداۋى كەرەك ەكەندىگى ايتىلدى.
«قازىرگى ۋاقىتتا ساراپشىلار ەكونوميكالىق داعدارىس پەن پاندەميانىڭ ەكىنشى تولقىنى كەلەتىنىن بولجاۋدا. ماماندار بۇل ماسەلەنى مۇقيات زەرتتەپ، وسى جاعدايعا ارناۋلى باعدارلاما ازىرلەۋى كەرەك. جاڭا تاسىلدەر مەن ءتيىستى شارالار قاجەت»، - دەدى قازاقستاننىڭ تۇڭعىش پرەزيدەنتى.
سونىمەن قاتار ەلباسى كوروناۆيرۋس ينفەكتسياسىنىڭ تارالۋىنا قارسى كۇرەس اياسىنداعى اقپاراتتىق- ءتۇسىندىرۋ جۇمىستارى ماسەلەسىنە توقتالدى.
«قاۋىپتى دەرتتى جۇقتىرىپ الماۋ ادامنىڭ وزىنە جانە تارتىبىنە بايلانىستى ەكەنىن تۇسىندىرگەن مەملەكەتتەر ۇتىلعان جوق. كەيبىر ەلدەردە كارانتين شارالارى قابىلدانبادى، ويتكەنى ادامدار ساقتىق شارالارىن ساقتاپ، مامانداردىڭ تالابىن ورىندادى»، - دەدى نۇرسۇلتان نازاربايەۆ.
قازاقستاننىڭ تۇڭعىش پرەزيدەنتى گەوساياسي قاقتىعىستار مەن قاراما-قايشىلىقتار ءورشىپ تۇرعان جاعدايدا قازاقستان قوعامىنىڭ بىرلىگى مەن تۇراقتىلىعىن ساقتاۋدىڭ ماڭىزدىلىعىن اتاپ ءوتتى.
«ءبىزدىڭ باستى مىندەتىمىز - داعدارىسقا قاراماي، ەلىمىزدىڭ ۇلتتىق قاۋىپسىزدىگىن قامتاماسىز ەتۋ. ىشكى تۇراقتىلىقتى ساقتاۋىمىز كەرەك. قوعام تۇتاستىعى مەن ساياسي تۇراقتىلىق - ءبىزدىڭ العا جىلجۋىمىزدىڭ نەگىزى ەكەنىن جۇرتشىلىق ەستەن شىعارماعانى ءجون. ءبىز ءاردايىم مەملەكەتتىڭ جانە «Nur Otan» پارتياسى سياقتى ساياسي كۇشتىڭ اينالاسىنا توپتاسۋ ارقىلى داعدارىستاردى ەڭسەرە بىلدىك. بۇل سىناقتان دا امان وتەتىنىمىزگە سەنىمدىمىن. ەكونوميكانىڭ ءوسىمى قامتاماسىز ەتىلەتىن بولادى. بۇل قازاقستاندىقتاردىڭ تۇرمىس- تىرشىلىگىنە وڭ ىقپال ەتەدى. مەملەكەت قايتادان قارجى جيناقتايدى. ول قاراجات قازاقستاندىقتاردىڭ يگىلىگى ءۇشىن، سونداي- اق «قازاقستان-2050» ستراتەگيالىق باعدارلاسىنىڭ ورىندالۋىنا پايدالانىلاتىن بولادى»، - دەدى ەلباسى.
كەزدەسۋ سوڭىندا نۇرسۇلتان نازاربايەۆ جاھاندىق ەكونوميكالىق داعدارىستاردان وتۋدە قازاقستاننىڭ مول تاجىريبەسى، سونداي- اق ەكونوميكانىڭ تۇراقتى ءوسىمىن قامتاماسىز ەتۋگە مۇمكىندىگى بار ەكەنىن اتاپ ءوتتى.
«جۇرت جۇمىسقا شىعىپ، اقشا تابۋى ءۇشىن ۇكىمەت جۇمىس ورىندارىن كوبەيتۋگە تىرىسۋى كەرەك. بىزدە ۇلكەن تاجىريبە، قاراجات، مۇمكىندىكتەر بار. وسىنىڭ بارىنەن سۇرىنبەي وتەمىز»، - دەدى قازاقستاننىڭ تۇڭعىش پرەزيدەنتى.