ەلوردادا كارانتين كەزىندە دۇكەندەر، ءدامحانالار جۇمىس ىستەگەن

نۇر-سۇلتان. قازاقپارات - ەلوردادا دۇكەندەر، مەيرامحانالار مەن جالعا بەرۋ كەڭسەلەرى كارانتين كەزىندە جۇمىس ىستەگەن، دەپ حابارلايدى قازاقپارات قالا اكىمدىگىنە سىلتەمە جاساپ.

ەلوردادا كارانتين ءتارتىبىن ساقتاۋ بويىنشا رەيدتەر جالعاسۋدا. تەكسەرۋ كەزىندە 11- تامىز كۇنى تۇندە ەرىمبەتوۆ كوشەسىندە «شاشلىك» جانە «بەلىي دوم» ءدامحانالارى جۇمىس ىستەگەنى انىقتالدى.

پوليتسيا، ەپيدەميولوگتەر، ەرىكتىلەر، جەرگىلىكتى اتقارۋشى ورگانداردىڭ وكىلدەرىنەن قۇرالعان موبيلدى توپ كەلگەن كەزدە مەكەمەدە 11 كليەنت بولدى. سونداي-اق بالقانتاۋ كوشەسىندەگى «كەنتاۋ»، سارىارقا داڭعىلىنداعى «اسقار» دۇكەندەرىنىڭ تۇنگى 22.00 دەن كەيىن جۇمىس ىستەپ، باس سانيتارلىق دارىگەردىڭ شەشىمىن بۇزعانى انىقتالدى.

سونىمەن قاتار، كۇندىزگى تەكسەرۋ كەزىندە دوستىق كوشەسىندەگى «كاريما» مەيرامحاناسىندا كەلۋشىلەر الەۋمەتتىك قاشىقتىق ساقتاماعانى بەلگىلى بولدى. سونداي-اق بالالار ويىنشىق كولىگىن جالعا بەرۋ، ساياباقتىڭ بىرىندە بالمۇزداق ساتىلعان.

«بارلىق بۇزۋشىلارعا قاتىستى ماتەريالدار جينالىپ، شەشىم قابىلداۋ ءۇشىن تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ باسقارماسىنا جىبەرىلدى. 5- شىلدەدەن باستاپ نۇر-سۇلتان قالاسىندا 722 زاڭ بۇزۋشىلىق تىركەلدى، ولاردىڭ 487 ءسى تىيىم سالىنعان ۋاقىتتا قىزمەتىن جۇزەگە اسىراتىن كاسىپكەرلىك سۋبەكتىلەرى»، - دەپ حابارلادى نۇر-سۇلتان قالاسىنىڭ پوليتسيا دەپارتامەنتى.