اكىم الماتىلىقتاردى «بيۋجەتكە قاتىسۋ» جوباسىنا بەلسەندى قاتىسۋعا شاقىردى

الماتى. قازاقپارات - «بيۋجەتكە قاتىسۋ» جوباسى ارقىلى تۇرعىندار قالا كەڭىستىگىن جاقسارتۋ جونىندەگى جوبالارعا بەلسەندى اتسالىسىپ كەلەدى.

بۇل تۋرالى قالا اكىمى باقىتجان ساعىنتايەۆ «الماتى» تەلەارناسىنداعى Akimat Live باعدارلاماسىنىڭ تىكەلەي ەفيرىندە ايتتى، دەپ حابارلايدى قازاقپارات ءتىلشىسى.

ب. ساعىنتايەۆ وسى جوبا اياسىندا تۇرعىنداردىڭ باستامالارى مەن ۇسىنىستارى نەگىزىندە جالپى قۇنى 14,5 ميلليارد تەڭگە بولاتىن 333 جوباعا ءوتىنىش بەرىلگەنىن ايتتى. 2020-جىلى جالپى قۇنى 1,4 ميلليارد تەڭگە بولاتىن 55 جوبا ىسكە اسادى.

«بۇگىنگى ەفيردى پايدالانىپ، الماتىلىقتاردى «بيۋجەتكە قاتىسۋ» جوباسىنا بەلسەندى قاتىسۋعا شاقىرامىن. كەلەر جىلى ورىندالاتىن جوبالارعا دا ىرىكتەۋ جۇرگىزىلەدى. قازىرگى كەزدە وتىنىشتەر قابىلدانۋدا. وزدەرىڭىزدىڭ اۋلالارىڭىز بەن ىقشاماۋداندارىڭىزدا قانداي جوبانى جۇزەگە اسىرۋ قاجەتتىگىن وزدەرىڭىز شەشەتىن بولاسىزدار»، - دەدى الماتى اكىمى.

بىلتىر ءار اۋدانعا 500 ميلليون تەڭگەگە قاراجات قاراستىرىلعان بولاتىن. بۇگىندە «بيۋجەتكە قاتىسۋ» جوباسىنىڭ سوماسىن ەكى ەسە كوبەيتۋ ماسەلەسى قاراستىرىلىپ جاتىر.