ۇلى بريتانيادا قىمىز قانشادان ساتىلادى؟

ۇلى بريتانيا. قازاقپارات - بۇعان دەيىن نازاردان تىس قالىپ كەلگەن جىلقى ءسۇتى ەۋروپالىقتاردىڭ جانە امەريكالىقتاردىڭ قىزىعۋشىلىعىن وياتىپ جاتىر.

وعان زەرتتەۋشى ميشەل فاكسيا جانە ونىڭ ارىپتەستەرى Animals جۋرنالىندا جاريالاعان عىلىمي ماقالاسى دالەل.

جىلقى سۇتىنەن جاسالعان قىشقىل ءسۇت ءونىمىنىڭ دەنساۋلىققا پايدالى ەكەندىگىن بىلگەن بريتانيالىق كومپانيالار دا قىمىز ساتۋمەن اينالىسىپ ءجۇر، دەپ حابارلايدى قازاقپارات ءتىلشىسى.

بۇگىندە سيىر ءسۇتى بۇكىل الەم تۇتىناتىن ءسۇتتىڭ %82 قۇرايدى. قالعان بولىگى ەشكى جانە قوي سياقتى جانۋارلارعا تيەسىلى. تەك 1 پايىزعا جەتەر جەتپەس ءسۇت جىلقى، تۇيە، ەسەك جانە قوداستان ساۋىلادى.

«بۇگىنگى تاڭدا سوڭعىلارىنىڭ ءسۇتى تەك يننوۆاتسيالىق ءونىم ەمەس، سونىمەن قاتار دەنساۋلىققا پايدالى ەكەندىگىن دالەلدەيتىن عىلىمي ىزدەنىستەر كوپ»، دەيدى عالىمدار.

الەم بويىنشا جىلقى سانى 60 ميلليوننان اسادى. سيىر سۇتىنە قاراعاندا جىلقى ءسۇتىنىڭ مايى جانە اقۋىزى از، ءبىراق لاكتوزاعا باي جانە ادام سۇتىنە ۇقساس ەكەن.

پاندەميا كەزىندە قىمىزعا دەگەن سۇرانىس ارتقان. سۋسىننىڭ قۇرامىندا ۆيرۋستان قورعاپ، يممۋنيتەتتى نىعايتۋ ءۇشىن كەرەك c دارۋمەنى بار. سوندىقتان دارىگەرلەر اۋرۋدىڭ الدىن الۋ ءۇشىن نەمەسە ودان وڭالعان كەزدە قىمىز ىشۋگە كەڭەس بەرەدى. جىلقى ءسۇتى، سونىمەن قاتار، ومىرلىك ماڭىزى بار a ، b 1، b 2، b 6، b 12، k سياقتى دارۋمەندەرگە باي.

ولاردان بولەك قۇرامىندا جوعارى قان قىسىمىن تومەندەتىپ، ۋايىمشىلدىقتان قۇتقاراتىن كالي

مينەرالى بار. سونىمەن قاتار جىلقى ءسۇتى تەز قورىتىلادى. اس قورىتۋ جۇيەسىنە ول جەڭىل اسەر ەتىپ، ءىشتىڭ كەبۋى جانە قاتۋى، اسقازاننىڭ بۇزىلۋى سياقتى سيمپتومداردىڭ ازايۋىنا ىقپال ەتەدى.

اتتاي شاۋىپ كەتۋگە كومەكتەسىپ، قۋات بەرەتىن تەمىر، كالتسي جانە فوسفور سياقتى مينەرالدار دا وسى قىمىزدان تابىلادى. ونىڭ ادام تەرىسىنە تيگىزەتىن پايداسى دا شاش ەتەكتەن. پسورياز جانە ەكزەمامەن اۋىراتىن ادامدارعا تاپتىرماس ەم.

جىلقى ءسۇتى قۇرامىندا ميكروبقا قارسى قاسيەتى بار ليزوتسيم فەرمەنتى بار، دەيدى بريتانيالىق كرومۆەل فەرماسىنا تيەسىلى ينتەرنەت دۇكەن.

ۇلى بريتانيادا كوپشىلىكتىڭ سۇرانىسىنا يە بولىپ كەلە جاتقان كومپانيانىڭ پاراقشاسىندا جازىلعانداي مۇندا جىلقى سۇتىنەن جاسالعان ونىمدەردىڭ ءتۇر-ءتۇرى ساۋدالانادى. باعاسىنا كەلەتىن بولساق ورتا ەسەپپەن العاندا ورگانيكالىق، پاستەرلەنگەن قۇتىداعى قىمىزدىڭ 250 گرامى ۇلتتىق ۆاليۋتامىزعا شاققاندا 3650 تەڭگە تۇرادى. بۇدان بولەك كومپانيا جىلقى سۇتىنەن جاسالعان قول كۇتىمىنە ارنالعان 50 ميلليگرام كرەمدەردى 10000 تەڭگەگە ساتادى. كرومۆەل فەرماسى انگليانىڭ وڭتۇستىك باتىسىنداعى سومەرسەت اعىلشىن گرافتىعىنداعى كومب-حەي اۋىلىندا ورنالاسقان. بۇل 40 جىلدان بەرى كەلە جاتقان وتباسىلىق بيزنەس جانە ۇلى بريتانياداعى جىلقى ءسۇتىنىڭ ساۋداسىمەن اينالىساتىن جالعىز كومپانيا، دەلىنگەن سايتتا.