بريتانيالىقتار اباي ولەڭدەرىن وقىدى

ۇلى بريتانيا. قازاقپارات - ۇلى بريتانيا جۇرتشىلىعى اباي ولەڭدەرىن وقۋدان چەللەندجگە قاتىستى.

ساياساتكەرلەر، عالىمدار جانە شىعارماشىلىق ينتەلليگەنتسيا وكىلدەرى قازاقتىڭ ۇلى ويشىلىنىڭ تۋىندىلارىن اعىلشىن تىلىندە وقىپ، الەۋمەتتىك جەلىدە جاريالادى، دەپ حابارلايدى قازاقپارات ءتىلشىسى.

جوباعا قاتىسۋشىلاردىڭ قاتارىندا ۇلى بريتانيا پارلامەنتى بەدەلدى مۇشەلەرىنىڭ ءبىرى، كونسەرۆاتور بوب ستيۋارت بار. ول ابايدىڭ «پايدا ويلاما، ار ويلا» ولەڭىن وقىدى. چەللەندجدىڭ تاعى ءبىر قاتىسۋشىسى بارني كروكەتت - ابەردين قالاسىنىڭ لورد-مەرى. ول ۇلى اقىننىڭ ءتۇپسىز تەرەڭ فيلوسوفياعا تولى «اللانىڭ ءوزى دە راس، ءسوزى دە راس» ولەڭىنەن ءۇزىندى كەلتىردى.

قازاقستاننىڭ ۋەلستەگى قۇرمەتتى كونسۋلى جانە ۋەلستىڭ كونسۋلدىق قاۋىمداستىعىنىڭ مۇشەسى، بريتان-قازاقستان قوعامىنىڭ مۇشەسى دۋگلاس تاۋنسەند وقىرماندارىنا «كوك تۇمان — الدىڭداعى كەلەر زامان» دەپ باستالاتىن جىر جولدارىن جولدادى.

«Yntegrative Media Ltd» كومپانياسىنىڭ اتقارۋشى ديرەكتورى الان سپەنس اباي پوەزياسىنا ارنالعان چەللەندجگە «قىس» اتتى ولەڭىنىڭ ءبىر شۋماعىن وقىپ بەردى. ونىڭ پايىمداۋىنشا، اللەگوريالىق تۇرعىدا ولەڭ اقىن زامانىنان ءبىزدىڭ زامانىمىزعا دەيىنگى ۋاقىتتى مەڭزەيدى.

«اباي XIX - عاسىرداعى تاۋ مەن دالا اتىنان بۇگىندە باستان كەشىپ جاتقان بارلىق اۋىرتپالىقتار تۋرالى سىر شەرتەدى: COVID داعدارىسى، ەكونوميكالىق حاوس، شۋلى جاھاندىق قارىم-قاتىناس، ءبىز بىرگە مەكەن ەتىپ جاتقان پلانەتانى قورعاي الماي وتىرعان ساياسات. جاھاندىق پاندەميا كەزىندە ىلمەگىنە ىلگەن ىندەتكە - «قىسپەن بىرگە تۇمسىعىن سالعان قاسقىرلارعا» الەم توتەپ بەرە الادى. ءبىراق الداعى ۋاقىتتا بولۋى مۇمكىن باسقا دا الاپاتتارعا دايىن بولۋىمىز ماڭىزدى. ءبىز ابايدىڭ بۇل ەسكەرتۋىنە قۇلاق اسۋىمىز كەرەك»، دەدى الان سپەنس.

ۇلى بريتانيا ساياسي تۇلعالارىنىڭ، عىلىمي جانە شىعارماشىلىق ينتەلليگەنتسياسى وكىلدەرىنىڭ پايىمداۋىنشا، اباي پوەزياسى وتانداستارى شەكسپيردىڭ شىعارماشىلىعىمەن پارا پار - ءاردايىم وزەكتى جانە زور سۇرانىسقا يە. جوبا ۇيىمداستىرۋشىلارىنىڭ ايتۋىنشا، چەللەندج - ابايدىڭ 175 جىلدىعىنا وراي قازاقستاننىڭ ۇلى بريتانياداعى ەلشىلىگى جوسپارلاعان ءبىرقاتار شارانىڭ ءبىر پاراسى.

جىل سوڭىندا اباي شىعارمالارىنىڭ اعىلشىن تىلىندەگى جاڭا جيناعىنىڭ تۇساۋكەسەرى بريتان كىتاپحاناسىندا وتپەك. سونىمەن قاتار، اباي اندەرىنىڭ كىتابى تاريحتا تۇڭعىش رەت اعىلشىن تىلىندە جارىق كورمەك. بۇدان بولەك ايتۋلى داتا قۇرمەتىنە قازاقستاندىق جانە بريتانيالىق ورىنداۋشىلاردىڭ ونلاين كونسەرتى ۇيىمداستىرىلادى.

«ابايدىڭ ءاربىر ولەڭى ادامزاتقا دەگەن، ادام بالاسىنا دەگەن سۇيىسپەنشىلىكتى ناسيحاتتايدى. سوندىقتان ابايدىڭ ولەڭدەرىن ءوزىمىز عانا وقىپ قويماي، سونىمەن بىرگە بارشا الەم حالىقتارىمەن ءبولىسۋىمىز كەرەك، دەپ ويلايمىز. وسى ارقىلى ءبىز ابايدى دارىپتەۋ، ناسيحاتتاۋ، ابايدىڭ مۇراسىمەن ءبولىسۋ ىسىنە كىشكەنە عانا ۇلەسىمىزدى قوسا الامىز دەپ ۇمىتتەنەمىز»، دەدى قازاقستاننىڭ ۇلى بريتانياداعى ەلشىلىگىنىڭ حاتشىسى كامشات كۇمىسباي.