بولگاريادا اباي بارەلەفى اشىلدى
شارا قازاقستاننىڭ بولگارياداعى ەلشىلىگىنىڭ باستاماسىمەن، سونداي-اق «پاميات بولگاري - براتيەۆ دينيەۆي» اتتى قورىنىڭ قولداۋىمەن جۇزەگە اسىرىلدى.
ءىس-شاراعا قازاقستاننىڭ بولگارياداعى ەلشىسى تەمىرتاي ءىزباستين، بولگاريانىڭ بۇرىڭعى سىرتقى ىستەر ءمينيسترى جانە جەرگىلىكتى اتلانتيكالىق كلۋبىنىڭ جەتەكشىسى سولومون پاسسي، سۆەتي ۆلاس قالاسى اكىمشىلىگىنىڭ (مەريا) وكىلى، «پاميات بولگاري - براتيەۆ دينيەۆي» اتتى قورىنىڭ باسشىلارى دينكو جانە يوردان دينيەۆتار، بولگار تەلەگراف اگەنتتىگىنىڭ ءتوراعاسى ماكسيم مينچيەۆ، بولگاريا س ءى م جانىنداعى مادەني ورتالىعىنىڭ باسشىسى سنەجانا يوۆيەۆا، تاريحشى جانە ەتنوگراف ستويان رايچيەۆسكي جانە وتانداستارىمىز قاتىستى.
ءىس-شارانى اشۋ بارىسىندا ەلشى ابايدىڭ 175 جىلدىق مەرەيتويى تەك قازاقستاندا ەمەس، الەمنىڭ كوپتەگەن ەلدەرىندە تويلانىپ جاتقانىن جانە اباي قازاق ۇلتى جاڭا ادەبيەتىنىڭ نەگىزىن قالاۋشىسى، ورىس كورنەكتى اقىندارى ا. پۋشكيننىڭ، م. لەرمونتوۆتىڭ، ي. كرىلوۆتىڭ شىعارمالارىن اۋدارۋشى جانە كومپوزيتور رەتىندە ەل تاريحىندا وشپەس ءىز قالدىرعاندىعىن، سونداي-اق بارەلەفتىڭ اشىلۋى ەكى ەل اراسىنداعى مادەنيەتارالىق ىنتىماقتاستىقتىڭ ودان ءارى دامۋىنا سەپتىگىن تيگىزەتىنىن اتاپ ءوتتى.
بولگاريانىڭ تاريحشىسى جانە ەتنوگرافى س. رايچيەۆسكي اباي قۇنانباي ۇلى تەك ورتا ازيادان ەمەس، جالپى الەمدە بەلگىلى، امبەباپ تۇلعا دەپ اتاپ ءوتتى.
سونىمەن قاتار، اباي بارەلەفى ۆاسيل لەۆسكي، حريستو بوتيەۆ، ادميرالدار فەدور ۋشاكوۆ جانە گوراتسيو نەلسون، گانس حريستيان اندەرسەن، دجۋزەپپە گاريبالدي، دجانيۋاريۋس ماگكاحان، شاندور پەتەفي، فرانسۋز مارشالى فيليپپ دە كلەرك، فريدريح شيلەر سياقتى باسقا ەلدەردىڭ تانىمال تۇلعالاردىڭ بارەلەفتەرى اراسىندا ءوزىنىڭ لايىقتى ورنىن تاپقانىنا توقتالىپ ءوتتى.
يوردان دينيەۆ بولگاريادا ابايدىڭ بارەلەفىن ورناتۋعا بايلانىستى ريزاشىلىعىن ءبىلدىرىپ، اباي بارەلەفىندە جازىلعان 37 قارا ءسوز - «ادام بالاسىن زامان وسىرەدى، كىمدە-كىم جامان بولسا، ونىڭ زامانداسىنىڭ ءبارى كىنالى» - بۇگىنگى كۇنگە دەيىن وزەكتى ەكەندىگىن جەتكىزدى.